VOV4.Êđê- Hlăm dŭm hruê êgaom ti ƀuôn prŏng Hồ Chí Minh mkŏ mjing leh klei bi lông hdră mđung asăp kluôm ala tal 15 – thŭn 2022. Hŏng akŏ “Mlih hŏng klei bruă – kpưn đĭ djŏ guôp”, klei bi lông tal anei mâo lu anôk bruă nao hgŭm hĭn hŏng 86 anôk bruă leh anăn ênoh klei bi lông lu ka tuôm mâo, hŏng êbeh 500 klei bi lông. Anei klă klơ̆ng jing “Hruê knăm” prŏng hĭn mơ̆ng phung ngă bruă mđung asăp, mâo ai bi lar ktang hlăm yang ƀuôn.

Klei bi lông mđung asăp kluôm ala dưi mkŏ mjing grăp gưl 2 thŭn 1 blư̆, kñăm thâo ƀuh, mpŭ phung čih kdlưn hĭn mơ̆ng phung ngă klei mrâo mđung asăp kluôm ala. Klei bi lông kluôm ala tal XV - thŭn 2022 mâo akŏ “Mbruă mlih mrâo - mdrơ̆ng kpưn kđĭ”. Mơ̆ng êbeh 500 klei čih bi lông (lu hĭn mơ̆ng êlâo truh ară anei), Anôk bruă mkŏ mjing ruah leh 203 klei čih hlăm klei bi lông knhal tuič hlăm dŭm mta mơ̆ng klei čih, klei êmuh, klei hlăp mgưt, mđung asăp ti mmông anăn mtam… Klei mrâo mơ̆ng Klei bi lông tal anei jing Anôk bruă ăt mkŏ mjing bi lông leh anăn mđup brei klei pah mni Asăp blŭ siam, mđup brei klei pah mni kơ hdră mkŏ mjing jăk êdi leh anăn hdră ba yua kdrăp mrô…

 Anei jing gưl tal 2 Klei bi lông dưi mkŏ mjing ti ƀuôn prŏng Hồ Chí Minh leh anăn jing knăm mơak mơ̆ng phung ngă bruă klei mrâo mđung asăp hlăm kluôm ala. Phan Văn Mãi - Khua Knơ̆ng bruă mặt trận Hồ Chí Minh lač, Klei bi lông amâo djŏ knŏng jing bruă mâo kơhưm jăk ôh ƀiădah lŏ jing klei khăp phung ngă bruă klei mrâo mđung asăp hŏng ƀuôn prŏng Hồ Chí Minh, anôk êbeh 1 thŭn êlâo gĭr mdrơ̆ng hŏng klei ruă Covid-19 ka tuôm mâo ôh hlăm hƀuê ênuk:

“Phung ngă bruă klei mrâo hŏng êpul ba anăp, mnuih ƀuôn sang kluôm ala, ala tač êngao hriê hŏng anôk mâo klei ruă tưp kjham hĭn. Leh anăn kyua klei anăn, kluôm ala thâo săng hĭn, bi đru, hrăm mbĭt hŏng ƀuôn prŏng. Ƀuôn prŏng dưi mđĭ ai, gĭr ktưn hĭn čiăng hgao wưng dleh dlan hĭn. Leh anăn hlăm boh klei anăn, drei ƀuh leh hnơ̆ng yuôm bhăn mơ̆ng hdră mđung asăp sĭt dưi mđĭ lar bruă klam pô”.

Khua Sang mđung asăp VOV Đỗ Tiến Sỹ tông hgơr mphŭn pŏk Klei bi lông mđung asăp kluôm ala

 Klei bi lông mđung asăp kluôm ala tal XV ti ƀuôn prŏng Hồ Chí Minh klă sĭt jing knăm mơak klei mrâo prŏng hĭn mơ̆ng phung ngă bruă mđung asăp, mâo klei lar bra ktang phĭt hlăm êpul mnuih ƀuôn sang. Hlăm anăn, Hdră mđung asăp iêô jak klei mđing dlăng mơ̆ng ƀĭng dôk dlăng, dôk hmư̆ lehanăn phung ngă bruă mbĭt. Êngao kơ dŭm akŏ mâo lu mnuih mđing snăn phung iêô jak mơ̆ng anôk bruă bi lông ăt ba kơ klei bi lông klei jăk mơak.  Anăn jing klei yăl dliê đru phung mâo klei truh hlăm klei yan adiê ngă, êa lip, pui ƀơ̆ng. Klei yăl dliê “amâo êbuh ôh” mơ̆ng Hoàng Thị Mũ hŏng klei khăp mơ̆ng phung nai krĭng čư̆ čhiăng, klei yăl dliê mơ̆ng êpul truih mdjiê klei pui ƀơ̆ng ngă mgei ai tiê phung dôk hmư̆, dôk dlăng. Amâo pô bi dlăng kơ pô mkăn ôh, luh êa ală mgei ai tiê. Ayŏng Nguyễn Huy Hoàng, pô čih klei mrâo Hdră mđung kơ êlan klông ƀuôn prŏng Hồ Chí Minh brei thâo:

“Mơ̆ng klei bi lông mđung asăp, klei yăl dliê msĕ si thiếu tá Thành, adei Mũ ngă kơ kâo mâo klei thâo săng amâo djŏ knŏng hlăm bruă mă đuič ôh ƀiădah kơ klei khăp, klei čang hmăng anei jing klei gĭr ktưn lar bra hĭn, ăt jing sa boh kdrŭt lar bra lu hĭn čiăng kơ phung čih klei mrâo ba klei yăl dliê jăk kơ ƀĭng dôk hmư̆”.

Khua gĭt gai Đảng ƀuôn prŏng Hồ Chí Minh Nguyễn Văn Nên leh anăn Khua VOV Đỗ Tiến Sỹ mđup brei mnga kơ phung brei puăng klei bi lông.

Nguyễn Trọng Nghĩa, Khua dlăng bruă Đảng gưl dlông, Khua Anôk bruă hâo hưn mtô mblang gưl dlông lač, klei bi lông mkŏ mjing hlăm boh klei kluôm Đảng, jih jang mnuih ƀuôn sang leh anăn lĭng kahan gĭr ktưn, gĭr hlue ngă tŭ dưn Hdră mtrŭn klei bi kƀĭn phung bi ala kluôm ala tal 13 mơ̆ng Đảng, hrăm mbĭt, sa ai tiê hluê ngă hdră êlan mơ̆ng Đảng, knŭk kna kñăm kơrŭ wĭt leh anăn mđĭ kyar bruă duh mkra leh klei ruă Covid-19. Hlăm wưng bruă tuh tia mkra mjing mrâo mrang 4.0, hŏng klei đĭ kyar mơ̆ng dŭm mta klei mrâo, mta klei mrâo mrâo msĕ si hră klei mrâo điện tử leh anăn hla pŏk web ala ƀuôn leh anăn đĭ kyar ktang mjing klei bi ktưn ktang hŏng dŭm mta klei mrâo djuê ana. Kyua anăn, Sang mđung asăp blŭ Việt Nam leh anăn bruă mđung asăp Việt Nam brei mlih mrâo nanao, tui duah, mbruă mjing hdră mrâo čiăng mlih mrâo, hlue ngă hŏng hdră ngă klei mrâo hlăm wưng mrâo. Mđung asăp Việt Nam brei jing hdră lač kơ ala ƀuôn hŏng hdră kñăm mkŏ mjing hdră êlan djŏ klă, mâo hlăm boh sĭt, đru mguôp leh anăn krơ̆ng kjăp bruă kđi čar ala ƀuôn leh anăn mđĭ kyar lăn čar, pŏk mlar êngiê, mđĭ klei dưi gĭt gai mơ̆ng Đảng, kriê dlăng mơ̆ng Knŭk kna hŏng ala ƀuôn. Nguyễn Trọng Nghĩa mñă klă:    

            “Grăp pô čih klei mrâo mđung asăp brei mđĭ lar hĭn ai tiê čŏng hriăm, mđĭ klei thâo kđi čar, bruă knuă, čŏng mbŏ klei thâo ngă bruă, mâo klei mĭn êngiê, kpă hlăm djăp mta bruă. Grăp phung čih klei mrâo brei ksiêm hriăm êlam, nao dlăng boh sĭt klei hdĭp, lač djŏ kơ klei hdĭp, hlai mbĭt hŏng ƀuôn sang, hdĭp hlăm ai tiê ƀuôn sang, snăn kơh dưi čih klei mrâo mâo ênoh yuôm, tă klei mĭn, boh sĭt, klei khăp leh anăn kyua klei tŭ dưn ala čar, djuê ana.”

 Dŭm hruê mkŏ mjing Klei bi lông mđung asăp kluôm ala tal XV ti ƀuôn prŏng Hồ Chí Minh, êngao kơ dŭm bruă ngă kdrăm kơah, lŏ mâo dŭm klei bi kƀĭn kơ phung ngă bruă mđung asăp Việt Nam mjĕ êrô, bi tuôm leh anăn kah mbha klei thâo. Anăn jing dŭm bruă ngă msĕ si Klei rang mdah “Klei tŭ dưn mđĭ kyar mơ̆ng ƀuôn prŏng Hồ Chí Minh”, klei bi trông hdră mnêč “Klei lông dlăng mơ̆ng mđung asăp hlăm wưng bi mlih mrô”, klei bi kƀĭn “Mkra mjing hdră mđung asăp hlăp mbŭl hlăm boh klei bluh mâo klei hlăp mbŭl online”. Anăn klă sĭt jing knăm mơak bruă knuă prŏng mơ̆ng phung ngă bruă mđung asăp, bi êdah akŏ “Mbruă mlih mrâo - mdrơ̆ng gĭr ktưn”./.

Pô mblang: H’Zawut Ƀuôn Yă