Mơak mbĭt hŏng krĭng mnuih ƀuôn sang dôk Thắng Kiên, să Đề Gi, Khua knŭk kna Phạm Minh Chính mñă klă, hruê mơak Bi hgŭm mguôp jih jang djuê ana dưi mkŏ mjing hlăk angĭn êbŭ mrô 13 mrâo tlă ngă lu klei luič liê kjham ka tuôm mâo hlăm hƀuê ênuk. Hlăm wưng dleh dlan nei ăt mâo klei jưh knang kjăp jing klei gĭt gai djŏ klă, knhâo mơ̆ng Đảng; klei hgŭm mbĭt mơ̆ng kluôm anôk bruă kđi čar, mơ̆ng mnuih ƀuôn sang, klei gĭt gai mơ̆ng bruă knŭk kna dŭm gưl; ai tiê bi hgŭm mguôp jih jang djuê ana. Bi myuôm, bi mni kơ dŭm boh tŭ mâo Đảng, bruă knŭk kna lehanăn mnuih ƀuôn sang lač kluôm, să Đè Gi lač hjăn dưi mâo hlăm wưng êgao, đru mguôp leh hlăm boh tŭ dưn mbĭt mơ̆ng kluôm ala, Khua knŭk kna mtă kơ bruă Đảng, bruă knŭk kna alŭ wăl mđing msir mghaih klei truh jhat mơ̆ng angĭn êbŭ mrô 13 ngă:

 "Êlâo hĭn brei lŏ mơ̆ng sang kơ dŭm gŏ sang dlưh, kpŏk čuôr mơ̆ng ară anei truh kơ hruê 15/12 hluê hruê mlan ƀlĕ; mkra sang jhat rai; krŭ wĭt anôk bruă êlan klông, mdrao mgŭn, mjuăt bi hriăm; rơ̆ng hdră krŭ wĭt pral anôk bruă pui kmlă, hâo hưn êlan kbưi, pral bi mdoh wăl hdĭp mda; krŭ wĭt hdră pla mjing, mnia mblei, mjing hdră duh ƀơ̆ng kơ mnuih ƀuôn sang. Êpul lĭng kahan, kahan ksiêm, êdam êra hrăm mbĭt bi đru kơ mnuih ƀuôn sang msir mghaih klei truh mơ̆ng angĭn êbŭ ngă; hluê ngă kjăp hdră ba yua anôk bruă knŭk kna 2 gưl; mđĭ kyar bruă duh mkra – ala ƀuôn, mjing bruă mă kơ mnuih ƀuôn sang.

           Khua knŭk kna ăt mtă kơ čar Gia Lai lŏ mkŏ dăp krĭng anôk dôk mrâo, krĭng nah tluôn, krĭng mnia mblei nah êngao; mnuih ƀuôn sang brei nao hdĭp hlăm krĭng hlăm lam kñăm rơ̆ng klei êđăp ênang. Pŏk ngă hdră mkŏ anôk dôk mrâo kơ mnuih ƀuôn sang; mtă brei mprăp mđing dlăng Têt kơ mnuih ƀuôn sang. Lŏ dơ̆ng mđĭ klei thâo săng kơ mnuih ƀuôn sang anăp mnêč jhat čiăng bi rai, čiăng bi kah ana mbha djuê mơ̆ng phung roh mčhua hŏng klei dôk mâo. Rơ̆ng kjăp klei êđăp ênang, mkŏ mjing “să amâo mâo matuĭ”, “să amâo mâo phung ngă soh”, “să amâo mâo mnuih ƀun”.

Ăt hlăm hruê kăm êgao, Kơiăng khua knŭk kna Mai Văn Chính nao leh ti Hruê mơak bi hgŭm mguôp jih jang djuê ana ti krĭng mnuih ƀuôn sang dôk alŭ Suối Cau - Suối Sâu - Bến Khế, să Dưr Khánh Vĩnh, čar Khánh Hòa. Anei jing krĭng čư̆ čhiăng mâo lu mnuih ƀuôn sang Raglay, mbĭt hŏng 9 djuê ana hrăm mbĭt hdĭp mda bi hgŭm mguôp, ƀrư̆ bi mlih krĭng ƀuôn sang čư̆ čhiăng anei. Krĭng mnuih ƀuôn sang dôk mâo êbeh 1.100 gŏ sang, êbeh 4.600 čô mnuih hdĭp mda mâo djuê ana Yuăn, Raglay, Êđê, Tày, Nùng, Dao, Mường, Hoa, T’Rin… Dŭm thŭn êgao, mnuih ƀuôn sang jhŏng bi mlih hdră mkŏ dăp mnơ̆ng pla, mnơ̆ng rông; lu gru hmô bruă duh mkra msĕ si pla boh durian, boh kruê̆ adŭng klĭt mtah, mguôp hŏng bruă rông mnơ̆ng, ba leh hnư hrui wĭt hơĭt kjăp.

Blŭ hrăm ti Hruê mơak, Kơiăng khua knŭk kna Mai Văn Chính mñă, Hruê mơak Bi hgŭm mguôp djuê ana jing wưng bi mni kơ knhuah gru bi mguôp, jing anôk krŭ wĭt ai tiê čang hmăng, klei gĭr ktưn kpưn đĭ, jing boh kdrŭt “čiăng mlih mrâo klei mĭn, mlih mrâo hdră ngă, jhŏng mĭn, jhŏng ngă, jhŏng đua klam”, mjing boh kdrŭt đĭ kyar kơ alŭ wăl krĭng čư̆ čhiăng. Să brei ruah gru hmô jăk kơ klei bi lŭ hrăm hlăm ala ƀuôn, gru hmô kơ hdră đru hlăm êpul êya, mkŏ mjing “Mlan hmư̆ mnuih ƀuôn sang lač”, ba yua pŏk hră kak mrô hlăm hdră đru, mđing dlăng kơ gŏ sang ƀun, giăm ƀun. Kơiăng khua knŭk kna Mai Văn Chính lač klă:

          “Brei mđĭ lar knhuah gru kreh kriăng, pral kdal, mĭn mrâo mơ̆ng mnuih ƀuôn sang djuê ana ƀiă, mđĭ lar jih klei găl mâo kơ lăn ala, yan adiê, dliê kmrơ̆ng lehanăn lăn ala čiăng mđĭ kyar bruă lŏ hma hơĭt khăp, bruă lŏ hma lăn êa, bi mguôp hŏng hdră hiu čhưn ênguê êpul êya, hiu čhưn ênguê tui ksiêm. Mđing kơ bruă răng mgang dliê, phŭn mkăp êa, răng mgang wăl hdĭp mda lăn êa – anăn jing hdră ngă klă sĭt čiăng mđĭ kyar sui thŭn. Bruă knŭk kna, mặt trận čar kwar lehanăn dŭm êpul êya bruă brei pral mâo hdră đru kơ phŭn mkăp mjeh, hdră mnêč, kdrăp kreh knhâo – mrâo mrang, ba yua kdrăp mrô hlăm hdră pla mjing, hrui blei mnơ̆ng dhơ̆ng, čiăng “ƀĭng ngă lŏ hma mrô, krĭng ƀuôn sang mrô” klă sĭt jing krĭng lăn Dưr Khánh Vĩnh”.

      Ƀri gưl anei, Kơiăng khua knŭk kna Mai Văn Chính mđup brei leh hnư mnơ̆ng kơ 2 gŏ sang mâo kơhưm êdah êdi, mtrŭt mjhar mnuih ƀuôn sang lŏ dơ̆ng hgŭm mguôp, mđĭ kyar bruă duh mkra, mkŏ mkra krĭng ƀuôn sang mtah – siam – doh, êđăp ênang, thâo bi khăp, bi čung ba./.