Hlăm dŭm hrue mlan 4 hƀuê ênuk, ktuê êlan truh kơ krah să Quảng Trực, kdriêk Tuy Đức, čar Dak Nông bŏ hŏng hla čhiăm gru hrah mtŭ kñĭ. Hlăm klei mĭn mơ̆ng phung nao êlâo yăl dliê mơ̆ng phung knuă druh cách mạng êlâo dih, hlăm ênuk bi blah hlŏng truh kơ hrue lăn čar mâo klei êngiê, hluh lir lăn čar bŏ hŏng klei myưng mơang. Điểu Đi, khua mduôn Bon Bu Păng 2, Khua knơ̆ng bruă sang čư̆ êa să Quảng Trực lŏ bi hdơr mơ̆ng thŭn 1965 truh kơ hrue čar Daknông mâo klei êngiê, alŭ wăl knông lăn să knông lăn să Quảng Trực truh kơ Bình Phước tuôm hŏng klei phung Mi lehanăn Việt Nam Cộng hoà mplĕ bom bi rai. Ƀiădah hŏng klei jhŏng ktang, phung ƀuôn sang bi kuan lăn, kiă ƀuôn, lu phung hđeh êdam mơ̆ng dŭm boh ƀuôn nao tui hlue cách mạng:

“Bon Bu Păng anei jing lăn ala aê aduôn pô đưm leh. Mmông bi blah, phung Mi lehanăn knŭk kna hđăp mgô̆ mnuih ƀuôn sang mbĕ ƀuôn, ƀiădah mnuih ƀuôn sang kut kat amâo mâo đuĕ djiê hdĭp hŏng ƀuôn sang pô. Hlwm ênuk bi blah mbĭt hŏng cách mạng bi blah răng mgang krĭng lăn anei, leh mâo klei êngiê bi ktuh êyuh duh ƀơ̆ng, lŏ rŭ mdơ̆ng ƀuôn sang pô. Ară anei Quảng Trực mâo leh klei đĭ kyar, klei hdĭp bi mlih leh, ăt kyua mâo Đảng, knŭk kna mđing uêñ, duh bi liê kơ mnuih ƀuôn sang.”

Hŏng knhuah gru hƀuê ênuk kdrăm k’ah, jhŏng ktang, kmlăn ai tiê bi blah, truh thŭn 2019, să Quảng Trực mâo leh khua knŭk kna tŭ yap jing să êđăp ênang lehanăn drông mă klei tŭ yap jing knhuah gru gưl čar. Ăt mơ̆ng anăn să Quảng Trực mâo leh čar Dak Nông mđing hĭn, dơ̆ng duh bi liê rŭ mkra êlan klông pưk sang. Krĭng lăn hrah bazan čăt jing bŏ hŏng klei mtah da đang kphê, anan măkka, jing leh klei čang hmăng kơ klei dưi msir klei ư̆ êpa bi hrŏ klei ƀun knap, lehanăn kpưn đĭ nao kơ mdrŏng sah. Dôk ti đang ana măkka prŏng truh 2ha pla pluă hlăm đang kphê, aduôn Thị Nớ, sa čô knuă druh să Quảng Trực brei thâo, mâo hŏng anei hlăm brô 10 năm, ana măkka dơ̆ng ba pla hlăm lăn anei. Hŏng ai tiê jing knuă druh, đảng viên nao êlâo, ƀuôn sang tui tluôn. Grăp ha leh truh thŭn mâo pĕ srăng dưi ba wĭt mơ̆ng 300-500 êklăk prăk/thŭn:

“Kâo bŏ hŏng klei mơak kyuadah jing mnuih amĭ kkiêng lehanăn hriê kơ prŏng hlăm ƀuôn hmei anei, mâo nao sang hră mơar, nao mă bruă lehanăn dôk hlăm krĭng lăn cách mạng Quảng Trực anei mă bruă knuă. Kyua mâo klei Đảng, knŭk kna bi duh mkra êlan klông pưk sang, phung ƀuôn sang thâo dưn yua klei kreh knhâo, mlih ba pla mjing dŭm mta ana tŭ dưn, rông mnơ̆ng djŏ hdră. Lu gŏ êsei dưi găn leh jih klei dleh dlan kpưn đĭ kơ mdrŏng sah.”

Nguyễn Hải Lý, Khua knơ̆ng bruă sang čư̆ êa să Quảng Trực, kdriêk Tuy Đức, čar Dak Nông brei thâo, kluôm să ară anei mâo giăm 3.000 gŏ êsei, êbeh 10.000 čô mnuih, hnơ̆ng ênoh mnuih djuê ƀiă truh êbeh 50%. Hŏng klei knŭk kna mđing duh bi liê mnuih ƀuôn sang mâo klei bi mlih pral mơh hlăm klei mĭn dơ̆ng thâo hlăm klei duh ƀơ̆ng, hnơ̆ng ênoh gŏ êsei ƀun hlăm să hlăk hrŏ pral, mơ̆ng 69% akŏ thŭn 2022 ară anei hrŏ leh adôk 49%. Nguyễn Hải Lý kjăp ai tiê bi êdah, hŏng dŭm klei jăk găl mơ̆ng lăn ala yan adiê, jing yuôm bhăn kơ klei mđĭ kyar klei duh mkra ala ƀuôn msĕ si ară anei, amâo mâo srăng sui ôh, Quảng Trực srăng tlaih yơh mơ̆ng klei pia să dleh dlan hĭn êdi hlăm kdriêk ƀun 30a”:

“Hlăm jih jang hdră kñăm duh bi liê kơ mnuih ƀuôn sang snăn hmei mđing êdi kơ bruă lŏ hma kơ mnơ̆ng pla, mnơ̆ng rông, ba yua klei kreh knhâo hlăm bruă knuă. Kñăm mđĭ hĭn bruă klam mơ̆ng knŭk kna, dưn yua jih ai ktang mơ̆ng knŭk kna, lehanăn klei bi sa ai mơ̆ưng mnuih ƀuôn sang bi đru hlăm klei duh ƀơ̆ng, čiăng kơ mnuih ƀuôn sang mâo klei đĭ kyar hĭn. Mơ̆ng anăn, drru leh kơ să ba anăp hlăm bruă mđĭ kyar hdră êlan čuăl mkă krĭng pla mjing bi djŏ guôp hŏng anôk ala ênuk ară anei”.

 Điểu Thái, K’iăng khua bruă Đảng kdriêk Tuy Đức brei thâo, să Quảng Trực mâo bruă klam yuôm bhăn hlăm ênuk bi blah, lehanăn ară anei ăt jing yuôm bhăn mơh hlăm ênuk mđĭ kyar klei hdĭp mda mơ̆ng kdriêk. Ară anei kdriêk hlăk mâo klei mđing lu hĭn duh bi liê kơ Quảng Trực, mđĭ kyar bruă duh mkra, lehanăn bi kriê pioh mđĭ bi lar knhuah gru yuôm bhăn mơ̆ng dhar kreh, lehanăn ai tiê thâo khăp kơ lăn čar:

“Să Quảng Trực mnuih ƀuôn sang mâo knhuah gru cách mạng. Hlăm wưng leh êgao, lehanăn hlăm wưng kơ anăp hmei ngă 3 hdră ala čar kñăm anei yơh jing bruă tal êlâo hmei lŏ dơ̆ng duh bi liê ti Quảng Trực, mđĭ bi lar knhuah gru dhar kreh djăp djuê ana, mđĭ kyar klei duh mkra ala ƀuôn”.

             48 thŭn leh kwar dhŭng mâo klei êngiê, mhluh lir lăn čar mâo klei knŭk kna duh bi liê, lehanăn klei thâo bi đru mơ̆ng mnuih ƀuôn sang hlăm alŭ wăl, Quảng Trực sa knông lăn dleh dlan hlăk dôk kpưn đĭ. Bruă Đảng, bruă sang čư̆ êa, lehanăn mnuih ƀuôn sang hlăm să hlăk amâo mâo mdei mđĭ bi lar knhuah gru cách mạng, gĭr atăt să êđăp ênang anei jing anôk ba akŏ hlăm klei duh mkra mơ̆ng kdriêk ƀun 30a Tuy Đức./.