VOV4.Êđê- Msĕ si Sang mđung mđung asăp blŭ Việt Nam hâo hưn, dŭm pluh ha dliê mơ̆ng dua Đang dliê knŭk kna mkuôm Čư̆ Yang Sin, čar Dak Lak lehanăn Bi Đoup – Čư̆ Hmŭ, ti čar Lâm Đồng čuk hli soh hŏng hdră bhiăn hlăm hdră mkra êlan Trường Sơn Đông. Dliê ka mâo anôk bruă djŏ tuôm bi mklă mkra mlih hdră ba yua, klei bi rai dliê amâo mâo klei ktuê ksiêm mơ̆ng pô dliê, anôk bruă djŏ tuôm. Mâo sa klei êmuh prŏng tinei anăn jing, wăl dliê prŏng msĕ snăn mơ̆ng Đang dliê knŭk kna mkuôm mâo arăng bi rai, hnơ̆ng kyâo kăn djŏ ƀiă mơh, ti anôk srăng dôk?

Anôk bi rai dliê čiăng mkra êlan Trường Sơn Ngŏ ti wăl dliê mrô 22 leh anăn mrô 26, ti Đang dliê Knŭk kna mkuôm Bi Đuop – Čư̆ H’Mŭ, ti să Đưng K’Nơ̆, kdriêk Lạc Dương, čar Lâm Đồng. Ti nei, sa bĭt êlan mâo boh taih êbeh 3 km dưi pŏk găn nao dŭm mta dliê mâo kyâo hla prŏng, dliê mơ ô, dliê hla êrum leh anăn lăn huâng mơ̆ng dliê Knŭk kna mkuôm Bi Đuop – Čư̆ H’Mŭ. Ktuê êlan anei knŏng adôk mă gru đa đa ana kyâo leh arăng čŭk hli, kčao mă phŭn, lăn leh anăn boh tâo dơr hĕ jih. Nao ksiêm dlăng anôk anei, Thân Văn Hữu, khua bruă Đảng hlŏng ngă khua bruă sang čư êa să Đưng k’Nơ̆, kdriêk Lạc Dương brei thâo, bruă čuk hli dliê čiăng mkra êlan anei jing hlăm thŭn 2021:

“Êlâo dih hmei ăt nao ksiêm dlăng nanao, ăt ƀuh anôk bruă dôk ngă bruă, ƀiădah anôk bruă ngă bruă anei amâo mâo ôh klei blŭ hrăm hŏng bruă sang čư êa alŭ wăl, mdưm boh klei leh anăn hưn mdah dŭm hdră êlan ngă bruă. Diñu kăn blŭ hrăm leh anăn mă bruă hŏng să lei. Hmei knŏng thâo mă êlan anei dôk mkra mjing đuč, dôk ngă êlan nao êjai. Ară anei ăt dôk gĭt gai kơ ayŏng adei nao ksiêm dlăng nanao, kjăp, amâo brei mčhua kơ klei pŏk êlan anei čiăng bi rai dliê, tlĕ mă kyâo soh hŏng hdră bhiăn.”

Sa ƀĕ ana kyâo prŏng adôk ti djiêu êlan

Nguyễn Lương Minh, k’iăng khua kiă kriê Dliê Knŭk kna mkuôm Bi Đuop – Čư̆ H’Mŭ brei thâo, čiăng đru kơ hdră mkăp êlan Trường Sơn Ngŏ, bruă sang čư êa čar Lâm Đồng mâo leh klei bi klă hrui mă 13,5 ha mơ̆ng dliê knŭk kna mkuôm jao kơ êpul kiă kriê hdră mkăp mrô 46. Hluê si klei bhiăn, klei ngă bruă knŏng dưi ngă leh gưl bruă mâo klei dưi bi klă mlih klei yua lăn, bruă sang čư êa leh anăn dhar bruă djŏ tuôm alŭ wăl ngă bruă ruh mgaih anôk ala, hrui mă kyâo dliê, ba jao anôk ala. Ƀiădah êjai ka leh ôh hră mơar, anôk bruă anei čŏng pô nao cŭk hli dliê, bruă anei soh hŏng klei bhiăn knŭk kna leh anăn ară anei ka dưi bi klă ôh ênoh kyâo dliê mâo klei hmăi:

“Ana kyâo ăt mâo mơh, anôk bruă ksiêm dlăng dliê ăt dôk nao bi klă, hruê mbruê, hruê mdih kâo ăt nao čiăng bi klă klei anei. Kơ bruă anei, bruă sang čư êa čar gĭt gai leh kơ dŭm anôk bruă djŏ tuôm nao bi klă êdei dih ksiêm mkă, leh anăn bi klă bruă đua klam mơ̆ng dŭm tĭng đuč.”

Hnơ̆ng kyâo hlăm hdră bruă Đ41 jing êbeh 260m3

Êjai anăn, tĭng kơ dliê knŭk kna mkuôm Čư̆ Yang Sin, dŭm anôk bruă djŏ tuôm ti čar Dak lak phŭn kčưm bi klă, dŭm anôk bruă mkŏ mjing êlan Trường Sơn Ngŏ hlăm klei ngă bruă mrô Đ41 čŭk hli leh êbeh 15 ha dliê găn nao 2 wăl dliê mrô 1383 leh anăn 1402 êjai ka mâo ôh klei bi klă mlih klei yua lăn dliê, ka nao ksiêm mkă kyâo dliê. Êbeh 7 km êlan dưi mkŏ mjing pŏk găn nao dŭm mta dliê mâo kyâo hla prŏng, dliê mơ ô. Nguyễn Quốc Hưng, khua kiă kriê anôk bruă ksiêm dlăng dliê čar Dak Lak brei thâo, klei ngă hră mơar kơ klei ngă bruă Đ41, hdră mkăp êlan Trường Sơn Ngŏ, anôk bruă djŏ tuôm bi klă leh ênoh kyâo jing 260m³:

“Ksiêm dlăng boh sĭt hlăm dliê, mprăp ngă hră mơar mlih klei yua lăn dliê, hlăm 16,72 ha anei mâo đa đa ênhă lăn dliê, kyâo dliê. Êjai anăn ênoh kyâo dliê dưi bi klă jing 264 m³. Kâo mâo hdră êlan ksiêm mkă kyâo kyua ka mâo ôh klei bi klă mlih klei ba yua lăn dliê. Leh mâo klei bi klă srăng mkŏ mjing hdră čiăng thâo klă ênoh kyâo, čiăng hrui mă, čih leh anăn ba hlăm ngăn prăk ala čar.”

Hŏng dŭm pluh ha dliê hrông dưi răng mgang kjăp ti 2 wăl dliê Knŭk kna mkuôm jing amâo djŏ ênoh ƀiă ôh. Ƀiădah anôk anei ară anei jih jang ana kyâo djŏ êlan mâo boh taih êbeh 10 km arăng bi rai jih leh. Ară anei knŏng adôk mă đa đa phŭn kyâo dôk dơr ti ktuê êlan, mâo boh prŏng 2 čô kmiêk. Klei phung ktuê dlăng mđing ti nei jing ênoh kyâo ti êlan anăn ti anôk ñu đuê̆ nao, leh anăn hlei srăng đua klam bruă anei.

Pô mblang: Y-Ƀel Êban