VOV4.Êđê- Leh dŭm hruê mdei Tết, mniê bi ala Bruă kƀĭn ala gưl XV mnuih Brâu ti čar Kon Tum Nàng Xô Vi lŏ wĭt ti adŭ mtô hđeh sang hră khăp hơiêng. Pô čih klei mrâo Khoa Điềm, dôk jưh ti Lăn Dap Kngư čih lač kơ klei čang hmăng akŏ Yan Mnga pô bi ala bruă kƀĭn ala dôk mprăp mŭt hlăm thŭn 26 anei.

Mơ̆ng sang nao truh ti anôk mă bruă ti Sang hră gưl tlâo knŭk kna čiêm rông hđeh mnuih djuê ƀiă čar Kon Tum ti kdriêk knông lăn Ia H’Drai, mniê bi ala anôk bruă kƀĭn ala gưl XV Nàng Xô Vi găn leh truh 150 km êlan hŏng êdeh p’phŭt. Klei mdê, ktuê êlan mâo mniê bi ala anôk bruă kƀĭn ala anei truh hŏng phung hđeh khăp h’iêng anei đĭ găn krĭng knông lăn siă knông hŏng dua ala čar Lao lehanăn Campuchia. Ti jhưng jŭ mtô hđeh leh dŭm hruê mdei Têt, dưi bi tuôm hŏng phung hđeh jing anak aneh mnuih djuê ƀiă ti sang hră krĭng knông lăn, mniê bi ala anôk bruă kƀĭn ala Nàng Xô Vi hưn mthâo klei mĭn mơ̆ng pô:

“Bruă mtô bi hriăm kơ mnuih djuê ƀiă jing klei kâo mđing dlăng êdi. Kâo čang hmăng si srăng ngă čiăng ba m’ĭt kơ anôk bruă Đảng, kơ gưl dlông dŭm klei mđing mĭn mơ̆ng phung nai mtô ti krĭng knông lăn lehanăn dŭm klei mĭn mơ̆ng phung amĭ ama, boh nik mđing dlăng truh kơ klei dleh dlan mơ̆ng phung hđeh dôk tuôm. Klei ruă Covid 19, anôk bruă sang hră m’ar jing anôk bruă hmăi djŏ klă anăp mtam lehanăn anôk bruă anei čang hmăng pral dưi msưh kdŭn klei ruă anei, phung hđeh dưi lŏ hdĭp msĕ aguah tlam lehanăn dưi hriăm lu klei mrâo hĭn”.

Y Thanh Hà Niê KĐăm, Khua Êpul gơ̆ng djuê ana mơ̆ng bruă kƀĭn ala hŏng pô bi ala Nàng Xô Vi mđup brei mnơ̆ng kơ mnuih Brâu ƀri gưl Tết  nguyên đán Nhâm dần 2022

        Jing cử nhân sư phạm địa lý, nai mtô ti Sang hră gưl tlâo knŭk kna čiêm rông hđeh mnuih djuê ƀiă čar Kon Tum ti kdriêk knông lăn Ia H’Drai, hưn lač klei mĭn mơ̆ng pô ti klei bi kƀĭn tal 1, anôk bruă kƀĭn ala gưl XV. Mniê bi ala anôk bruă kƀĭn ala Nàng Xô Vi lač: Hŏng sa čô mniê mrâo nao truh ti ƀuôn prŏng phŭn, truh ti sang bruă kƀĭn ala, klei ƀuh tal êlâo mơ̆ng ñu jing mdê mdô, huĭ mơh đa. Mơ̆ng dŭm klei bi tuôm hŏng phung bi ala mkăn, hlăm hdră mă bruă hŏng Dhar bruă, klei Nàng Xô Vi ƀuh brei ngă mtam anăn jing bi mlih pô lehanăn mâo klei mĭn mdê hĭn.

“Truh ti klei bi kƀĭn tal 2 snăn kâo ăt tui ksiêm lehanăn dlăng hră m’ar lu hĭn mơh. Leh nao bi tuôm hŏng mnuih ƀuôn sang wĭt hưn mthâo kơ hdră ngă bruă mơ̆ng klei bi kƀĭn mrâo êgao mơ̆ng pô snăn kâo đăo knang lehanăn klă sĭt hlăm êdei anăp anei kâo srăng lŏ gĭr ktưn hĭn”.

Pô bi ala bruă kƀĭn ala Nàng Xô Vi hŏng êpul mă bruă kƀĭn ala hlăm sa gưl nao mă bruă ti să Pờ Y, kdriêk Ngọc Hồi, čar Kon Tum

        Mniê bi ala anôk bruă kƀĭn ala Nàng Xô Vi, hlăm êpul bi ala anôk bruă kƀĭn ala čar Kon Tum jing anak čô mnuih djuê ana Brâu. Ară anei, djuê ana Brâu lu jing dôk ti alŭ Đăk Mê̆, să knông lăn Pờ Y, kdriêk Ngọc Hồi, čar Kon Tum. Jih jang djuê ana knŏng mâo 173 gŏ êsei hŏng 558 čô mnuih. Pô bi ala anôk bruă kƀĭn ala Nàng Xô Vi jing klei ktưn hưn mơ̆ng mnuih djuê ana Brâu lehanăn ăt jing gru mngač kơ ai tiê thâo hgao klei dleh dlan, mñă klă pô hŏng dŭm klei đru mguôp prŏng prĭn kơ êpul êya. Hưn lač kơ dŭm klei mđing mĭn lehanăn klei čang hmăng hlăm akŏ yan mnga Nhâm Dần 2022, mniê bi ala anôk bruă kƀĭn ala Nàng Xô Vi, brei thâo:

“Grăp čô bi ala mâo s’aĭ dŭm klei mĭn, klei mđing uêñ kơ pô si srăng ngă čiăng kơ mnuih ƀuôn sang pô bi hrŏ klei ƀun knap, dul ƀiă klei dleh dlan. Mŭt hlăm thŭn mrâo čang hmăng mơ̆ng kâo jing dưi msưh kdŭn klei ruă Covid 19 čiăng kơ jih jang mnuih ƀuôn sang drei dưi mđĭ kyar bruă duh mkra msĕ yang đar. Jing sa čô bi ala anôk bruă kƀĭn ala, thŭn mrâo kâo srăng gĭr lu hĭn, hưn lač klă nik klei mĭn, klei čang hmăng mơ̆ng mnuih ƀuôn sang truh kơ anôk bruă kƀĭn ala”./.

Pô mblang: H’Nêč Êñuôl