VOV4.Êđê- Bruă hiu čhưn ênguê hluê si klei găl hlăm yan adiê, klei siam mơ̆ng War mnơ̆ng gŭ lăn tar rŏng lăn UNESCO Dak Nông jing sa hlăm 3 mta knur jing tur knơ̆ng bruă duh mkra čar Dak Nông. Kyuanăn, hlăm bruă rŭ mdơ̆ng War mnơ̆ng gŭ lăn tar rŏng lăn UNESCO Dak Nông, dưi mkŏ mjing leh 3 êlan bruă hiu čhưn ênguê hŏng 3 akŏ mdê mdê, anăn jing “Klei mmuñ mơ̆ng pui leh anăn êa”, “Ênai klei bi mlih” leh anăn “Asăp kwang mơ̆ng boh lăn”. Hlăm hdră anăn, phung tuê hiu čhưn ênguê srăng dưi nao truh hŏng knhuah dhar kreh lu jơr leh anăn jăk siam mơ̆ng êpul êya êbeh 40 djuê ana ayŏng adie. Drei hrăm mbĭt ksiêm hriăm kơ klei găl bruă hiu čhưn ênguê ti čar Dak Nông hŏng War mnơ̆ng gŭ lăn tar rŏng lăn UNESCO Dak Nông hlăm thŭn mrâo 2022 anei:

Ƀon Pi Nao, să Nhân Đạo, kdriêk Dak Rlâp jing sa hlăm 10 alŭ, ƀuôn mâo Knơ̆ng bruă sang čư̆ êa čar Dak Nông ruah jing anôk hiu čhưn ênguê êpul êya. Kyua tinei dôk kriê pioh dŭm knhuah dhar kreh jăk siam mnuih Mnông. Gru hmô anei kñăm pioh duh kơ phung tuê hlăm hdră hiu čhưn dlăng ti ƀăng kơưp čư̆ pui kluôm rŏng lăn UNESCO Dak Nông hiu dlăng ênoh yuôm dhar kreh mnuih ƀuôn sang tinei.  Hluê anăn, dhar bruă djŏ tuôm srăng mkŏ mjing Êpul hiu atăt tuê hiu chưn dôk jưh, huă mnăm, êpul tông čing čhar, kdŏ mmuiñ, êpul pơ̆k mñam kdrăp djuê ana, hrĭ mñam, kpiê čeh… Điểu K’bang - Khua ƀuôn Pi Nao mơak brei thâo:

“Hlăm ƀuôn Pinao hmei mâo hdră mtruưn mơ̆ng čar Dak Nông jing ngă bruă hiu čhưn ênguê êpul êya. Phung amai adei hlăm ƀuôn hmei mkŏ mjing Êpul hgŭm bruă pơ̆k mñam kdrăp djuê ana čiăng kriê pioh bruă djuê ana. Ară anei, snăn mâo sa Êpul bi hgŭm čiăng mjing bruă mă kơ phung amai adei mâo thiăm prăk hrui wĭt kơ gŏ sang. Mbĭt anăn, mơ̆ng anăn ăt dưi kriê pioh bruă djuê ana, dhar kreh jăk siam mnuih Mnông pô”.

Klei bi kƀĭn kreh knhâo “Mkŏ mjing gru hmô mđĭ kyar hiu čhưn ênguê êpul êya mguôp hŏng dŭm ênoh yuôm mdê hjăn mơ̆ng kdrăn ƀăng kơưp čư̆ pui kluôm rŏng lăn čar Dak Nông - klei mâo leh anăn hdră msir”

Hdră hiu čhưn ênguê “Klei yăl dliê kơ êa leh anăn pui” hlăm hdră hiu čhưn dlăng Kdrăn ƀăng kơưp čư̆ pui kluôm rŏng lăn UNESCO Dak Nông, phung tuê hiu čhưn mphŭn mơ̆ng ƀuôn prŏng Gia Nghiã truh ti Krông Knô - anôk mâo ƀăng kơưp čư̆ pui prŏng hĭn Ngŏ Dhŭng Asi. Hlăm anăn, anôk jưh jơ̆ng tal êlâo ăt jing anôk ƀuôn sang mnuih Mnông hŏng lu knhuah dhar kreh jăk siam, hƀuê ênuk sui thŭn. Anăn jing “Anôk krŭ kdơ̆ng Nâm Nung”.  Knơ̆ng bruă dhar kreh mjuăt ktang asei mlei hiu čhưn ênguê čar Dak Nông ruah leh lông ngă gru hmô hiu čhưn ênguê êpul êya.

 Mnuih Mnông ti să Nâm Nung mơak snăk leh hmư̆ ƀuôn sang pô dơ̆ng jing anôk hiu čhưn ênguê. Kyua mơ̆ng anăn, phung tuê hlăm leh anăn êngao čar srăng 5thâo săng hĭn ênoh yuôm dhar kreh djuê ana pô. Leh anăn ăt mơ̆ng anăn, mnuih ƀuôn sang dưi hdĭp hŏng bruă hiu čhưn ênguê. Čiăng ngă snăn, hluê si amai H’Thuynh ti ƀuôn R’Kập, să Nâm Nung, kdriêk Krông Knô, brei hriăm thiăm bruă čiăng kơ grăp čô mnuih ƀuôn sang jing sa pô ktrâo lač kơ bruă hiu čhưn ênguê.

“Ti ƀuôn hmei ăt mâo lu mnuih thâo pơ̆k mñam kdrăp djuê ana, tông čing, mmuiñ ênhiang mmuiñ djuê ana. Tơdah mâo adŭ bi hriă, kâo čiăng tui hriăm čiăng kơ thâo leh anăn hưn mthâo hŏng phung tuê thâo săng hĭn kơ dhar kreh djuê ana pô. Mơ̆ng anăn tuê hiu čhưn hlăm leh anăn êngao čar srăng thâo kơ knhuah dhar kreh jăk siam ti ƀuôn pô. Kâo čang hmăng mâo sa adŭ hriăm snăn čiăng kơ grăp čô mnuih thâo hưn mthâo hŏng pô mkăn kơ knhuah dhar kreh jăk siam mnuih Mnông pô”.

Mnơ̆ng kriê pioh dhar kreh hlăm kdrăn ƀăng kơưp čư̆ pui Dak Nông.

Tôn Thị Ngọc Hạnh –  K’iăng Khua Knơ̆ng bruă sang čư̆ êa čar Dak Nông brei thâo, leh Kdrăn ƀăng kơưp čư̆ pui Dak Nông dưi bi mŭt hlăm anăn kluôm rŏng lăn, mâo leh lu phung duh bi liê mđing dlăng. Bruă djŏ tuôm alŭ wăl ngă leh leh anăn hlăk dôk mâo lu bruă ngă kñăm kriê dlăng ênoh dhar kreh yuôm bhăn mơ̆ng 40 djuê ana ayŏng adei, anăn jing mnơ̆ng dhơ̆ng hiu čhưn ênguê mdê hjăn.

“Klei thâo săng mjêč leh anăn hnơ̆ng yuôm bhăn hlăm bruă răng mgang, mđĭ lar ênoh yuôm mnơ̆ng kriê pioh hlăm krĭng kdrăn ƀăng kơưp čư̆ pui Dak Nông, hlăm wưng êgao, Anôk bruă kriê dlăng kdrăn ƀăng kơưp Čư̆ Pui Dak Nông bi hgŭm leh hŏng dŭm knơ̆ng, dhar bruă leh anăn dŭm alŭ wăl pŏk lu gưl hâo hưn, hriăm mjuăt mđĭ klei thâo săng kơ mnơ̆ng kriê pioh ƀăng kơưp čư̆ pui, hdră răng mgang, mđĭ lar ênoh yuôm mnơ̆ng kriê pioh truh hŏng mnuih ƀuôn sang, boh nik êpul êdam êra. Anôk kriê dlăng ăt bi hgŭm hŏng Knơ̆ng bruă sang hră mtô bi hriăm, Êpul êdam êra čiăng bi mguôp dŭm boh phŭn hâo hưn mtô mblang anei hlăm klei hriăm, dŭm bruă mtô bi hriăm djŏ guôp čiăng mđĭ klei săng kơ hđeh sang hră dŭm gưl. Mơ̆ng anăn, mkŏ mjing klei ktưn hưn leh anăn mđĭ klei thâo săng răng mgang, răng kriê ênoh yuôm mnơ̆ng kriê pioh alŭ wăl.

 Mlan 10 thŭn 2021 mrâo êgao, Sang hră kđi čar ala čar Hồ Chí Minh mkŏ mjing leh Klei kƀĭn trông kreh knhâo “Mkŏ mjing gru hmô mđĭ kyar hiu čhưn ênguê êpul êya mguôp hŏng ênoh yuôm mdê hjăn mơ̆ng kdrăn ƀăng kơưp čư̆ pui kluôm rŏng lăn čar Dak Nông - boh klei mâo leh anăn hdră msir”. Klei bi kƀĭn bi mklă: Bruă ksiêm dlăng mkŏ mjing gru hmô mđĭ kyar hiu čhưn ênguê êpul êya mguôp hŏng dŭm ênoh yuôm mdê hjăn mơ̆ng kdrăn ƀăng kơưp čư̆ pui kluôm rŏng lăn čar Dak Nông mơ̆ng klei bhiăn răng kriê leh anăn mđĭ kyar hơĭt kjăp, pioh mđĭ kyar bruă duh mkra - ala ƀuôn ti alŭ wăl jing bruă dưi kčah mjêč snăk. Hlăm hdră ngă bruă mơ̆ng Anôk dlăng bruă Đảng čar Dak Nông hlăm thŭn 2021 mrâo êgao ăt bi mklă: mđĭ kyar hiu čhưn ênguê mguôp hŏng kdrăn ƀăng kơưp čư̆ pui kluôm rŏng lăn UNESCO Dak Nông wưng 2021-2025 jing sa hlăm dŭm boh phŭn kñăm hluê ngă Hdră mtrŭn klei bi kƀĭn phung bi ala bruă Đảng čar tal XII./.

Pô mblang: H’Zawut Ƀuôn Yă