Mkŏ mjing hlăm 2 hruê, 23-24/9, Hruê mơak mphŭn čô̆ kơ bruă mrâo čar Dak Lak thŭn 2024 (Techfest Dak Lak 2024) mâo lu hdră bruă msĕ si: Rang mdah hưn mthâo, hâo mdah dŭm hdră bruă, hdră mphŭn čô̆ kơ bruă, OCOP, mnơ̆ng tuh tia krĭng ƀuôn sang, mkăp kơ hdră hiu čhưn ênguê; dŭm klei bi kƀĭn trông kơ hdră mphŭn čô̆ kơ bruă mrâo, mphŭn čô̆ kơ bruă mtah, hdră msir mtrŭt mđĭ klei mphŭn čô̆ kơ bruă hlăm dŭm mta bruă, êpul mnuih… Anei jing hdră bruă dưi mkŏ mjing grăp thŭn, kñăm mjing klei găl bi mjĕ mjuk hlăm êpul êya mphŭn čô̆ kơ bruă, bi hgŭm duh bi liê, tui duah ƀĭng hgŭm, pŏk mlar wăl anôk mnia mblei.

        Hlăm hdră Hruê mơak mphŭn čô̆ kơ bruă mrâo čar Dak Lak thŭn 2024, Knơ̆ng bruă Tuh tia mnia mblei Dak Lak mkŏ mjing Klei kƀĭn bi hgŭm bruă mnia mblei, hrui blei mnơ̆ng dhơ̆ng thŭn 2024. Klei kƀĭn mđing truh kơ mta kñăm mjing boh kdrŭt, lar bra lehanăn mđĭ kyar ai tiê mphŭn čô̆ kơ bruă, ai tiê phung mă bruă duh mkra mnia mblei hlăm mnuih ƀuôn sang hŏng hdră mphŭn čô̆ kơ bruă mrâo, bi hgŭm hŏng phung mă bruă kreh knhâo, kriê dlăng, êpul êya anôk bruă duh mkra kñăm đru, tă hdră êlan mđĭ kyar mnơ̆ng dhơ̆ng. Nao ti knăm anei, Đường Văn Quân, Khua Anôk bruă mguôp hnư mnơ̆ng dhơ̆ng tŭ jăk Cao Nguyên brei thâo:

“ Hlăm hdră anei, kâo čiăng kah mbha hŏng dŭm anôk bruă mrâo mphŭn čô̆ kơ bruă amâo dah mphŭn mâo mnơ̆ng hưn mthâo hlăm wăl anôk mnia mblei, diñu ƀuh si hdră srăng ba mnơ̆ng dhơ̆ng kơ wăl anôk mnia mblei. Mơ̆ng klei mĭn, truh kơ hruh đŭng mnơ̆ng, dŭm hră mơar djŏ tuôm tơdah diñu čiăng nao hgŭm hlăm wăl anôk mnia mblei. Pô mâo sa êpul êya čiăng đru mjuăt bi hriăm amâo mâo liê prăk kăk.

Ƀri gưl anei, ti ƀuôn prŏng Ƀuôn Ama Thuôt ăt mkŏ mjing Klei bi kƀĭn trông mtrŭt mđĭ hdră mphŭn čô̆ kơ bruă mrâo čar Dak Lak. Nao ti knăm anei, Kơiăng nai prŏng, nai prĭn Lê Đức Niêm, Kơiăng khua Sang hră gưl prŏng Lăn dap kngư brei thâo, wăl anôk mphŭn čô̆ kơ bruă mrâo ti Dak Lak dôk mâo ti gưl 2, jing gưl tur knơ̆ng, ka ngă leh. Kyua anăn, brei ngă leh dŭm myta klei, mâo wăt phŭn mkăp prăk, hdră mjuăt bi hriăm…

Êlâo hĭn brei djăp ênŭm, djăp gưl mnuih, sang hră gưl prŏng, anôk bruă duh mkra, anôk bruă ba akŏ, dŭm êpul êya bruă, boh nik, mâo klei tă hdră êlan mơ̆ng čar, hlăm anăn mâo mnuih hur har jih ai tiê kơ bruă čiăng mtrŭt mđĭ kyar hdră mphŭn čô̆ kơ bruă. Tal dua jing ngă êlam hĭn, brei ngă lu bruă hĭn amâo djŏ knŏng hưn mdah mă snăn, brei ngă klă sĭt hĭn, đru kơ anôk bruă duh mkra đĭ kyar. Tơdah wăl mphŭn čô̆ kơ bruă tŭ dưn snăn anôk bruă duh mkra srăng nao ti wăl anôk anăn”.

Hlăm dŭm Hruê mơak mphŭn čô̆ kơ bruă mrâo čar Dak Lak thŭn 2024, dŭm êpul hưn mthâo leh giăm 150 mta mnơ̆ng mphŭn čô̆ kơ bruă mrâo, mnơ̆ng OCOP, mnơ̆ng tuh tia krĭng ƀuôn sang, dŭm mtahiu čhưn ênguê mơ̆ng êpul, anôk bruă duh mkra hlăm čar.

  Nguyễn Tuấn Hà, Kơiăng khua Anôk bruă sang čư̆ êa čar Dak Lak tĭng dlăng, klei tŭ jing mơ̆ng hruê mơak jing boh kdrŭt prŏng kơ ai tiê mphŭn čô̆ kơ bruă hlăm mnuih ƀuôn sang, phung hđeh hriăm hră, sinh viên. Mtrŭt mđĭ hdră mlih mrâo, mkŏ mkra wăl anôk mphŭn čô̆ kơ bruă mrâo mơ̆ng čar ƀrư̆ hruê hơĭt kjăp, klă sĭt lehanăn tŭ dưn.

Dŭm klei bi kƀĭn trông nao mŭt êlam hlăm dŭm mta bruă, msĕ si klei bi kƀĭn trông djŏ tuôm kơ klei mlih mrâo snăn Sang hră gưl prŏmg Lăn dap kngư mđing kơ klei bi mlih hlăm phung hđeh sinh viên, bi Knơ̆ng bruă Hdră kčah lehanăn Duh bi liê mđing mlih mrâo hlăm dŭm anôk bruă duh mkra, êpul hgŭm bruă. Ngă snăn srăng ba wĭt boh tŭ dưn. Dŭm mta mnơ̆ng mơ̆ng hdră mphŭn čô̆ kơ bruă mnia mblei ƀrư̆ hruêƀrư̆ siam lehanăn mđĭ boh tŭ yuôm, lar bra lu hlăm mnuih ƀuôn sang.

Dưi lač, dŭm hdră mphŭn čô̆ kơ bruă mơ̆ng čar mjing leh klei bi mlih jăk, đru mkŏ mkra wăl anôk mphŭn čô̆ kơ bruă ti Dak Lak đĭ kyar êlam hĭn, lar bra ai tiê mphŭn čô̆ kơ bruă hlăm jih jang mnuih ƀuôn sang./.