Bruă mkra êlan dơ̆ng prŏng Tân Phú - Bảo Lộc mâo boh taih 66km, hlăm anăn 11km găn kdriêk Tân Phú, čar Đồng Nai lehanăn 55km găn čar Lâm Đồng. Hŏng ênoh bi liê hlue gưl jing 17.200 êklai prăk, hlăm anăn prăk mơ̆ng knŭk kna truh 6.500 êklai prăk (prăk gưl dlông 2.000 êklai prăk, prăk mơ̆ng čar Lâm Đồng 4.500 êklai prăk), prăk pô duh bi liê 1.605 tỷ đồng, dŭm adôk jing prăk iêo mkrum.

Anei jing bruă rŭ mkra dôk hlăm êpul A mâo knơ̆ng bruă sang čư̆ êa čar   Lâm Đồng jing anôk bruă knŭk kna mâo klei dưi, lehanăn pô duh bi liê akâo mkra êlan jing Êpul grŭp Đèo Cả jing pô bi ala. Gưl tal êlâo, kdrêč êlan dơ̆ng prŏng anei mâo boh prŏng ƀô̆ êlan jing 17m hŏng 4 grông êdeh, mâo dŭm kčŭn pioh mjưh mdei êdeh hŏng klei mjêč, hŏng wưng kčah čiăng bi leh jing hlăm thŭn 2026. Gưl tal 2 srăng bi leh kdrêč êlan êran pral, hŏng boh prŏng ƀô̆ êlan jing 22m, mâo 4 grông êdeh lehanăn 2 grông êlan pioh kơ êdeh mâo klei čiăng mdei mjêč, bruă anei mĭng srăng bi leh ti thŭn 2035.

Lê Quỳnh Mai, K’iăng khua Êpul Gơ̆ng kiă kriê Êpul Grŭp Đèo Cả brei thâo, knơ̆ng bruă sang čư̆ êa čar Lâm Đồng jao leh kơ êpul êya mkra êlan nao ksiêm lehanăn mâo klei hâo mdah bruă srăng mkra, lehanăn bruă anei hlăk dôk ngă hŏng klei mjêč. Mkă tĭng klei tă anăp êlan, dŭm anôk bi kuh, dŭm anôk êlan mur, êlan pioh kơ mnuih ƀuôn sang êrô... Hlăm êlan dơ̆ng êran pral mâo leh klei bi tŭ ư kơ hdră êlan mkra mjing. Lê Quỳnh Mai, lač:

“Hlăm brô 7/2023 snăn êpul grŭp Đèo Cả srăng mâo hră mơar hâo mdah hŏng knơ̆ng bruă sang čư̆ êa čar Lâm Đồng hâo mdah hdră êlan anăp srăng mkra êlan. Leh kơ anăn knơ̆ng bruă sang čư̆ êa čar Lâm Đồng mơĭt kơ phŭn bruă êlan klông dŭ mdiăng lehanăn Êpul gơ̆ng ksiêm bi mklă mơ̆ng lu dhar bruă čiăng lŏ mñă bruă amrra ngă ti gưl knhal tuič. Ăt čang hmăng truh mlan 9/2023 srăng bi leh bruă ksiêm bi mklă, pioh kơ knơ̆ng bruă sang čư̆ êa čar Lâm Đồng klă klơ̆ng bi mklă kơ bruă brei mkra yơh”.

Mbĭt hŏng êlan dơ̆ng prŏng Tân Phú - Bảo Lộc, Knơ̆ng bruă sang čư̆ êa čar Lâm Đồng ăt dôk mkra djăp mta bruă pioh mkra êlan dơ̆ng prŏng čuê anăn jing mơ̆ng Bảo Lộc – Liên Khương mâo boh taih 74km, boh prŏng 4 grông êdeh, hŏng ênoh bi liê jih jang jing 19.521 êklai prăk. Hlăm anăn, prăk knŭk kna êbeh 7.760 êklai prăk, prăk mơ̆ng pô duh bi liê jing 11.760 êklai prăk, dŭm adôk jing prăk iêo mkrum. Hoàng Việt Lâm, K’iăng khua knơ̆ng bruă čuăl mkă duh bi liê čar Lâm Đồng brei thâo, êlan dơ̆ng prŏng anei hlăk dôk mprăp hŏng klei pral kñăm djăp dưi mkra mjing êlan klông:

“Mdê hŏng bruă mkra êlan dơ̆ng prŏng Tân Phú – Bảo Lộc, bruă mkra êlan dơ̆ng prŏng Bảo Lộc – Liên Khương jing êlan dơ̆ng dôk hlăm kdrêč lăn čar Lâm Đồng sơăi. Kyuanăn anôk bruă mâo klei dưi jing knơ̆ng bruă sang čư̆ êa čar Lâm Đồng lehanăn jing anôk bruă bi mklă hdră êlan duh bi liê jing Êpul gơ̆ng bruă ƀuôn sang čar Lâm Đồng. Ară anei bruă mkra êlan anei hlăk dôk ngă klei hâo mdah kơ jih jang bruă srăng dưi ngă”.

Bruă mkra êlan dơ̆ng prŏng Tân Phú – Bảo Lộc lehanăn Bảo Lộc - Liên Khương jing kdrêč êlan phŭn mkŏ bruă duh mkra mnia mblei čar Lâm Đồng hŏng ƀuôn prŏng Hồ Chí Minh, lehanăn dŭm boh čar nah Dhŭng. Tơdah êlan dơ̆ng anei mâo bi leh srăng mjing djăp klei găl kơ bruă duh mkra mnia mblei mơ̆ng čar Lâm Đồng lehanăn dŭm čar hlăm alŭ wăl mđĭ kyar./.