Hriăm ruê̆ sang hră gưl prŏn kơ bruă Hdră bhiăn bruă duh mkra thŭn 2021, hŏng lu bruă ngă êdah êdi, mlan 7 hlăm thŭn anăn, ayŏng A Nguyên, djuê ana Bahnar, ƀuôn Kon Gung mâo đăo knang dưi ngă K’iăng Khua dlăng bruă êdam êra să Đăk Mar, kdriêk Đăk Hà. Ñu pô jing mnuih đăo Khop, mđĭ lar knhuah gru leh anăn ai ktang, mlan 10/2022 ti alŭ Đăk Mút, ayŏng A Nguyên mkŏ mjing êpul êdam êra mâo klei đăo mđĭ kyar bruă duh mkra mâo 15 čô hgŭm. Mơ̆ng gru hmô rông mnơ̆ng, mkra mđĭ đang pla mjing, kriê dlăng ana kphê, pla ana boh kroh hlue si hdră doh, êpul hgŭm bruă ba leh prăk hrui wĭt kơ phung hlăm êpul hgŭm dưi mjing klei lar bra jăk hŏng êpul êya. Lê Xuân Hưng, Khua dlăng bruă Đảng să Đăk Mar, brei thâo, Bruă Đảng bi mni kơ boh tŭ ngă bruă mơ̆ng Êpul hgŭm anei.

 “Mơ̆ng bruă ksiêm dlăng kâo ƀuh Êpul hgŭm bruă ngă bruă tŭ dưn. Ară anei phung hlăm êpul hgŭm bi ktrâo lač kơ klei kriê dlăng ana pla mjing, mnơ̆ng rông ăt msĕ mơh klei thâo mđĭ kyar bruă duh mkra. Bruă ngă anei mâo bruă Đảng gĭt gai bi lar ti 2 alŭ hlăm să. Bruă êdam êra kdriêk Đăk Hà bi lar leh gru hmô êdam êra phung đăo mđĭ kyar bruă duh mkra kluôm kdriêk”

Mâo bruă Đảng să Đăk Mar, kdriêk Đăk Hà thâo ƀuh, hriăm mjuăt ayŏng A Nguyên amâo mdei hriăm mbŏ. Mlan 7/2023, A Nguyên mâo dŭm gŏ êsei alŭ Đăk Mŭt đăo knang ruah ngă Khua ƀuôn. Ăt hlăm wưng anei A Nguyên ktưn hưn klă sĭt dưi mŭt hlăm êpul Đảng. Ayŏng A Nguyên brei thâo:

 “Kâo pô khăng êmuh hrăm dŭm gŏ sang dleh dlan kơ bruă duh mkra, kơ ai tiê hâo hưn truh kơ mnuih ƀuôn sang jing bi mlih klei mĭn, hdră ngă mnuih ƀuôn sang. Brei mkra mđĭ đang pla mjing amâo lui lăn huâng. Truh wưng anei snăn Đăk Mŭt amâo lŏ mâo ôh gŏ êsei lui lăn huâng. Ară anei grăp gŏ êsei pla kphê, leh anăn durian, boh kneh”.

 Dŭm gưl bruă đảng, bruă sang čư̆ êa mơ̆ng čar truh kơ ƀuôn sang ti Kon Tum mđing mkŏ mjing êpul knuă druh mnuih djuê ƀiă, boh nik ti gưl nah gŭ. Ară anei, hlăm êbeh 2000 čô knuă druh mă bruă ti 102 să, ƀuôn hgŭm, wăl krah ti čar mâo giăm 1.400 čô knuă druh jing mnuih djuê ƀiă mâo giăm 68%.

 Êdah êdi msĕ si să Măng Bút, kdriêk Kon Plông, hlăm ênoh 22 čô knuă druh să mâo truh 17 čô knuă druh mnuih Sêdang. Ayŏng A Dân, K’iăng Khua Knơ̆ng bruă sang čư̆ êa să Măng Bút, dưi mă bruă mơ̆ng Hdră lông ruah 600 čô phung thâo hră mda asei hriăm gưl prŏng wĭt ngă K’iăng Khua Knơ̆ng bruă sang čư̆ êa să hlăm 63 kdriêk ƀun hlăm kluôm ala, bi mklă, hdră hriăm mjuăt, gĭr ktưn, ñu mâo klei mdidng dlăng, đru mơ̆ng dŭm gưl bruă đảng leh anăn bruă sang čư̆ êa alŭ wăl. Klei anei đru ñu thiăm klei mđĭ ai gĭr ktưn hriăm mjuăt leh anăn duh myơr lu hĭn kơ ƀuôn sang:

 “Kâo hgŭm hlăm Hdră bruă 600 čô K’iăng Khua Knơ̆ng bruă să, mâo Đảng, Knŭk kna mđing dlăng mkŏ mjing jing êpul knuă druh mda asei, mnuih djuê ƀiă lŏ čuê bruă, kâo đăo knang gĭr ktưn leh anăn dưi ruah ngă K’iăng Khua knơ̆ng bruă sang čư̆ êa să wưng 2. Kâo hriăm leh adŭ mtô bi hriăm kđi čar, adŭ thơ̆ng kơ bruă. Ară anei mâo bruă đảng leh anăn bruă sang čư̆ êa să mđing dlăng brei mprăp nao hriăm adŭ gưl dlông hlak mblang kđi čar”.

Leh 33 thŭn lŏ mkŏ mjing čar, Kon Tum mkŏ mjing leh êpul knuă druh, phung mă bruă knŭk kna êbeh 18 êbâo čô, hlăm anăn knuă druh mnuih djuê ƀiă êbeh 4.100 čô mâo êbeh 22%. Hŏng gưl čar Kon Tum mâo 82 čô knuă druh mnuih djuê ƀiă ngă k’iăng khua adŭ bruă kơ dlông; gưl kdriêk mâo 225 čô knuă druh mnuih djuê ƀiă ngă bruă mơ̆ng K’iăng khua adŭ bruă kơ dlông; gưl să mâo 397 čô knuă druh mnuih djuê ƀiă ngă khua dlăng bruă đảng, k’iăng khua dlăng bruă đảng; khua, k’iăng khua Êpul gơ̆ng bruă ƀuôn sang, Knơ̆ng bruă sang čư̆ êa leh anăn gưl khua, k’iăng khua êpul bruă kđi čar ala ƀuôn. Lê Viết Nam, K’iăng Khua Knơ̆ng bruă kriê dlăng bruă knuă čar Kon Tum brei thâo, bruă mjing mnuih mă bruă, čuăl mkă, ruah mdưm knuă druh mnuih djuê ƀiă mâo Bruă Đảng čar mđing leh anăn Knơ̆ng bruă sang čư̆ êa mđing dlăng:

“Čar mâo leh hdră bruă mkŏ mjing êpul knuă druh mnuih djuê ƀiă. Leh anăn dŭm gưl bruă đảng mâo hră mơar gĭt gai čiăng hlăm bruă čuăl mkă, ruah mdưm mđing kơ êpul knuă druh mă bruă knŭk kna jing mnuih djuê ƀiă. Ară anei mprăp kơ klei bi kƀĭn wưng păn bruă lu knuă druh jing mnuih djuê ƀiă ti dŭm anôk bruă dưi čuăl mkă leh anăn kčah bruă srăng gĭt gai mơ̆ng dŭm gưl, boh nik jing dŭm knơ̆ng, dhar bruă, ƀuôn prŏng mâo ênoh phung knuă druh mnuih djuê ƀiă dưi čuăl mkă hlăm ênoh anei”./.