Êlan dơ̆ng pral Khánh Hòa – Ƀuôn Ama Thuôt, êlan mkŏ dliê hŏng êa ksĭ, êlan dơ̆ng êlâo dih knŏng jing klei êpei mơ̆ng lu mnuih ƀuôn sang ti čar Dak Lak, ară anei dưi mkŏ mjing. Trần Hồng Tiến, Khua bruă Đảng kdriêk Krông Pač, čar Dak Lak brei thâo, leh mrâo kčĕ hdră anei, lu mnuih dôk bi đing kyuadah mĭn tĭng ênoh bi liê truh 22.000 êklai prăk, êbeh 3 blư̆ hnư̆ hrui wĭt prăk knŭk kna sa thŭn mơ̆ng čar. Ƀiădah, leh Bruă Kƀĭn Ala bi hdră hră êlan duh bi liê ti mlan 6/2022 leh anăn trip sa thŭn êdei dưi mphŭn ngă bruă, Êlan dơ̆ng pral Khánh Hòa – Ƀuôn Ama Thuôt, mâo leh klei hmăi jăk ktang phĭt hŏng bruă duh mkra ala ƀuôn ti alŭ wăl.

Trần Hồng Tiến hơ̆k mơak, mơ̆ng thŭn 2022 truh kơ ară anei, mâo lu phung duh bi liê hriê ksiêm dlăng leh anăn mâo leh êbeh 11.000 êklai prăk bi klă duh bi liê kơ Krông Pač. Knŏng hlăm thŭn anei, 4 hdră hlăm bruă tuh tia, bruă lŏ hma, sang măi mkra mjinig boh kroh hŏng ênoh hlăm brô 1.500 êklai prăk dưi kčưm ngă ti alŭ wăl kdriêk.

“Mơ̆ng klei gal êlan dơ̆ng pral găn kdriêk Krông Pač hŏng êbeh 34km, mâo 4 anôk mkŏ, hmei mâo leh klei čuăl mkă dŭm anôk bruă tuh tia, anôk bruă logistics, dŭm alŭ wăl iêo mthưr phung duh bi liê leh anăn mâo čar bi klă, ba hlăm hdră čuăl mkă mbĭt mơ̆ng čar. Kyuanăn, hlăm wưng êgao mâo lu phung duh bi liê uêñ mĭn kơ Krông Pač. Anei jing klei bi knăl năng mơak êdi!”

Truh kơ wưng anei, Dak Lak jing čar tal êlâo ti krĭng Lăn Dap Kngư mphŭn rŭ mjing êlan dơ̆ng pral djŏ hŏng klei pia mkŏ dŭm anôk bruă duh mkra phŭn. Êlan dơ̆ng pral Khánh Hòa – Ƀuôn Ama Thuôt, mâo boh taih 117,5km, hŏng 4 grông êlan êdeh, đĭ pral mơ̆ng 80 – 100 km/h, mĭn tĭng bi leh ti knhal jih thŭn 2025. Võ Ngọc Tuyên, khua kiă kriê knơ̆ng bruă hdră êlan leh anăn duh bi liê čar Dak Lak brei thâo, mơ̆ng phung rŭ mjing truh kơ ară anei, hdră dôk brei ƀuh dŭm klei đăo knăl jăk, alŭ wăl dưi leh anăn mprăp drông lu knơ̆ng bruă, êpul grŭp, phung duh bi liê hriê duah klei bi mguôp.

“Ai tiê mnuih ƀuôn sang, knơ̆ng bruă, phung duh bi liê srăng nao drông êlâo, mprăp ai tiê čiăng ruah dŭm hdră duh bi liê. 5 mlan akŏ thŭn anei, mâo lu knơ̆ng bruă, êpul grŭp hriê ti Dak Lak čiăng ksiêm dlăng, ksiêm duah leh anăn ruah, bi klă duh bi liê. Msĕ si đa đa hdră duh bi liê tač hlăp golf, anôk bruă mnia mblei, lu hdră prŏng kơ dŭm anôk bruă tuh tia… Hmei dôk ngă bruă čiăng hnưm dưi tŭ ư dŭm hdră êlan duh bi liê leh anăn bi klă tŭ yap phung duh bi liê”.

Hŏng čar Dak Nông, êlan dơ̆ng pral Gia Nghĩa – Chơn Thành dôk mâo Bruă Kƀĭn Ala ksiêm dlăng hdră êlan duh bi liê, đru iêo thưr phung duh bi liê ti alŭ wăl. Knhal jih mlan 3 mrâo êgao, Dak Nông mđup brei leh hră tŭ yap duh bi liê 4 hdră hŏng ênoh bi klă 1.700 êklai prăk. Mbĭt anăn, čar bi klă hră bi hdơr bi mguôp hŏng 4 pô duh bi liê, ênoh bi klă 8,4 êklai dolar Mi (knar hŏng 231.000 êklai prăk). Giăm mkrah wah hlăm ênoh anăn mơ̆ng êpul grŭp TH hŏng hdră mkŏ mjing anôk rông êmô mă êa ksâo hnơ̆ng prŏng, mbĭt hŏng krĭng bruă lŏ hma dưn yua kdrăp mrâo, leh anăn pŏk mlar duh bi liê kơ bruă mă mnơ̆ng gŭ lăn, pui kmlă doh…

Pô jhŏng ktang mă bruă Thái Hương, khua gĭt gai êpul gơ̆ng hdră êlan Êpul grŭp TH brei thâo, ti čar Dak Nông leh anăn krĭng Lăn Dap Kngư dôk ƀrư̆ ƀrư̆ kƀĭn ênŭm klei găl čiăng iêo mthưr phung duh bi liê.

“Mta tal êlâo čiăng mâo klei tŭ jing anăn jing ai dưi kriê dlăng mơ̆ng phung duh bi liê. Tal 2 jing ai dưi bruă dhar bruă anăn ti alŭ wăl ti hnơ̆ng ñu. Pô srăng êbat hlăm klei găl mơ̆ng krĭng anăn, amâo mâo djŏ gĭr čiăng ba wĭt. Leh anăn đĭ kyar srăng mâo krĭng logistics čiăng mkra mjing êlam. Mta tal 3, anăn jing klei nao hgŭm mơ̆ng bruă sang čư êa alŭ wăl, boh nik khua gĭt gai yuôm bhăn sơnăk. Ênŭm 3 mta anăn srăng mâo klei tŭ jing”.

Hdră mtrŭn mrô 23 thŭn 2022 mơ̆ng Phŭn bruă kđi čar kơ hdră êlan mđĭ kyar bruă duh mkra ala ƀuôn krĭng Lăn Dap Kngư truh ti thŭn 2030, tă hdră truh ti thŭn 204 mdưm mta kñăm truh ti thŭn 2030 bi leh 5 bĭt êlan dơ̆ng prak mâo boh taih 565km mâo: Quy Nhơn - Pleiku, Khánh Hòa - Ƀuôn Ama Thuột, Gia Nghĩa - Chơn Thành, Tân Phú - Bảo Lộc, Bảo Lộc - Liên Khương. Mbĭt anăn ksiêm duah duh bi liê êlan dơ̆ng pral Dưr –Dhŭng nah yŭ kdrêč êlan Ngọc Hồi - Pleiku - Ƀuôn Ama Thuột - Gia Nghĩa mâo boh taih 355km. Dŭm bĭt êlan dơ̆ng pral, boh nik jing êlan dơ̆ng pral Dưr –Dhŭng nah yŭ kdrêč êlan Ngọc Hồi - Pleiku - Ƀuôn Ama Thuột - Gia Nghĩa dưi duh bi liê srăng jing aruăt êrah, jing klang rŏng, mơ̆ng krĭng Lăn Dap Kngư, mtrŭt mđĭ bruă duh mkra ala ƀuôn đĭ kyar ktang.

Hlăm klei kƀĭn trông hluê ngă hdră mtrŭn mrô 23, Khua knŭk kna Phạm Minh Chính mñă klă, bruă duh bi liê kơ êlan klông krĭng Lăn Dap Kngư jing čiăng mđĭ hĭn klei mkŏ krĭng leh anăn mlir krĭng. Hluê anăn, mkŏ mjing wăl đĭ kyar mrâo, hŏng dŭm anôk bruă duh mkra, wăl ƀuôn prŏng, mđĭ ênoh lăn… Ƀiădah, dŭm alŭ wăl ti krĭng Lăn Dap Kngư amâo mâo knŏng čang guôn mơ̆ng gưl dlông, srăng čŏng pô leh anăn iêo mthưr ai dưi mơ̆ng phung duh bi liê, sơnăn kơh dŭm bĭt êlan dơ̆ng pral găn krĭng anei dưi hnưm duh bi liê. Khua knŭk kna Phạm Minh Chính mñă ktang:

“Ai dưi mơ̆ng drei mă, boh klei tal êlâo ti mâo prăk? Ară anei mâo dŭm hdră êlan: Sa jing dih bi liê bruă knŭk kna, tal dua jing mơ̆ng phung duh bi liê, tal tlâo jing bi mguôp knŭk kna hŏng êngao knŭk kna. Tơdah knŏng čang guôn mă klei duh bi liê bruă knŭk kna knŏng sơnăn đuč, srăng mâo lu ai dưi, mâo wăt ai dưi mơ̆ng knŭk kna (knŭk kna mâo gưl dlông leh anăn alŭ wăl). Hrăm mbĭt ngă bruă, knŏng hjăn alŭ wăl amâo mâo dưi ôh, knŏng hjăn gưl dlông kăn mâo lei. Leh anăn srăng mtrŭt mđĭ hdră bi mguôp knŭk kna hŏng êngao knŭk kna hluê si hdră bhiăn mâo leh, iêo mthưr duh bi liê mơ̆ng ala čar tač êngao srăng mâo hdră êlan, mkŏ mjing wăl duh bi liê jăk”.