VOV4.Êđê- Mlan 6/2021, Khua knŭk kna mâo leh Hdră mtrŭn mrô 984 kơ Hdră kčah pŏk ngă klei klah čŭn 82 thŭn 2020 mơ̆ng Phŭn bruă kđi čar gưl XII. Knŭk kna mtă kơ dŭm phŭn, dhar bruă, alŭ wăl ktuê dlăng djăp ênŭm, êlam klei mĭn gĭt gai, hdră tă mơ̆ng Phŭn bruă kđi čar. Mơ̆ng anăn, msir mgaih dŭm klei êdu kƀah, hluê ngă bi jăk dŭm hdră msir, bruă klam phŭn cuăng ruh mgaih klei gun kpăk bruă dăp, mlih mrâo knơ̆ng bruă lŏ hma dliê kmrơ̆ng dôk čiăng hlăm klei hdĭp. Mjưh ruê̆ klei čih “Hdră mtrŭn 30: Brei mâo mơ̆ng boh sĭt knơ̆ng bruă lŏ hma dliê kmrơ̆ng ti Lăn Dap Kngư”, hdră hruê anei hmei mđung klei čih knhal tuič mâo akŏ “Klei čang hmăng mơ̆ng alŭ wăl, anôk bruă duh mkra”.
Hlăm ênoh 16 knơ̆ng bruă đang dliê kyâo ti čar Daknông, mâo leh 3 êpul bruă ngă hdră êlan mkrum ngăn, 6 êpul bruă bi kruh bruă. Nguyễn Xuân Tuấn, Khua adŭ bruă ngă hră mơar klei duh mkra mnia mblei, hlăm knơ̆ng bruă čuăl mkă lehanăn duh bi liê čar Daknông brei thâo, dŭm knơ̆ng bruă mâo ênhă lăn êbeh 500 ha, tui si klei gĭt gai ti anôk mklă mtrŭn mrô 82 mơ̆ng Phŭn bruă kđi čar snăn bi rơ̆ng mâo klei dưi kiă kriê kjăp mơ̆ng knŭk kna hŏng knơ̆ng bruă anăn. Êjai anăn, bruă dăp wĭt, ngă klei mkrum ngăn hdră mă bruă ară anei ti alŭ wăl dôk tuôm hŏng lu klei gun kpăk, čiăng snăk pral mâo hdră êlan ruh mgaih, gĭt gai djŏ hŏng klei mklă mtrŭn mrô 82 kñăm lŏ hlue ngă lehanăn ruh mgaih:
“Hlue ngă klei mklă mtrŭn mrô 82 mơ̆ng phŭn bruă kđi čar hŏng jih jang knơ̆ng bruă mâo ênhă lăn prŏng, êbeh kơ 500ha kơ dlông snăn knŭk kna srăng păn kjăp ênoh ngăn prăk lehanăn mbha klei bi mkrum. Tơdah dưi čiăng kơ bruă dưi kjăp lehanăn dăp bi djŏ, snăn klei dăp bruă bi mâo sa hdră êlan mơ̆ng sa knơ̆ng bruă. Ênoh adôk êjai ară anei srăng čuăl hĕ lehanăn mâo hdră srăng mghaih msir”.
Lê Danh Thắng, k’iăng khua knơ̆ng bruă ngăn prăk čar Daklak, brei thâo, leh mâo klei mklă mtrŭn mrô 82 mơ̆ng Phŭn bruă kđi čar, čar brei mdei mtam klei dăp wĭt, ngă klei bi mkrum ngăn ti 6 hlăm 15 knơ̆ng bruă dliê kyâo (9 knơ̆ng bruă mkăn dưi bi leh bruă mkrum ngăn, lehanăn đuĕ nao hlue hdră êlan sa knơ̆ng bruă mâo dua êpul bi dră). Tui si Tắng, bruă ksiêm wĭt bi mlih klei bhiăn mă bruă srăng đru kơ čar dưi mghaih msir dŭm klei dleh dlan, klei gun kpăk boh nik jing gun kpăk hŏng phung duh mkra lĕ hlăm klei bi kruh bruă:
“Daklak mâo 3 anôk bruă duh mkra bi kruh bruă, êjai mkŏ mjing hdră êlan mă bruă jing luič klei dưi bi kna, đuĕ nao kơ klei luič liê êgao hnơ̆ng, ênoh mâo ba wĭt amâo dưi lŏ bi hnô ôh hŏng ênoh bi liê. Kyua klei anăn yơh hlăm klei Mklă mtrŭn mrô 82 mơ̆ng Phŭn bruă kđĭ čar mâo klei čiăng lač ngăn prăk knŭk kna srăng đru kơ anôk amâo lŏ dưi bi kna, čiăng rơ̆ng dưi mâo ênoh tla, djăp klei găl truh kơ bruă bi kruh anôk duh mkra”.
Trịnh Đình Trường, Khua Êpul gơ̆ng bruă kiă kriê, Knơ̆ng khua gĭt gai knơ̆ng bruă mkrum ngăn kphê Gialai lehanăn knơ̆ng bruă mkrum ngăn Čê Biển Hồ, lač, kle imklă mtrŭn mrô 82 mơ̆ng phŭn bruă kđi čar brei leh phung duh mkra ƀuh klei čang hmăng kơ bruă dưi ruh mgaih hlăm klei bhiăn mă bruă, bi mâo hdră êlan ngă djŏ hŏng hdră bhiăn ară anei. Hlăm anăn, mñă hĭn kơ bruă mlih mrâo, thiăm mbŏ dŭm mta msĕ si kjăp hĭn klei kơ ngăn prăk, kơ jia, lehanăn klei bhiăn ngăn prăk, pioh brei čan hŏng mnga hdjul:
“Klei anei jing klei soh čhuai kơ hdră bhiăn, kơ dŭm mta čuăn, hdră mtrŭn êlâo dih ka mâo klei bi mlih, kyuadah pô jing anôk duh mkra mrâo. Hdră mtrŭn mơ̆ng phŭn bruă kđi čar ba yua djŏ hŏng klei dôk jing bruă bruă knuă, djŏ hlăm klei hdĭp, truh hŏng phung duh mkra, snăn anei jing sa knhuang dôk êbat kbưi lehanăn sui”.
Klah čŭn 82 ơ̆ng Phŭn bruă kđi čar ruh mgaih klei gun kpăk hlăm klei bhiăn, hdră êlan leh anăn hdră bhiăn
Ksiêm dlăng bruă dăp, mlih mrâo, ngă klei mkrum ngăn bruă lŏ hma dliê kmrơ̆ng ti dŭm čar Lăn Dap Kngư, Nguyễn Lâm Thành, k’iăng khua Êpul gơ̆ng bruă djuê ana hlăm Bruă kƀĭn ala, klei tŭ dưn bruă kia kriê, klei dưn yua lăn ala ară anei adôk lu klei awăt kƀah. Tui si Thành, lŏ dơ̆ng hlue ngă hdră mtrŭn mrô 30 mơ̆ng Phŭn bruă kđi čar snăn mđrăm mbĭt bi mlih, thiăm mbŏ dŭm hdră êlan, klei bhiăn ngă bruă lehanăn hdră brei čan prăk ti anôk adôk ka djŏ.
“Hŏng dŭm mta mtrŭn hlue hŏng klei bhiăn ară anei, drei jao leh lăn lu, phăn jao, lehanăn brei mưn hŏng ênoh êlưih. Mơ̆ng bruă kiă kriê ngăn prăk amâo mâo kjăp, snăn ngă kơ bruă lăn ala lĕ hlăm klei amâo lŏ dưi kiă kriê. Boh nik, lĕ hlăm klei bi ksĭng mmiă lăn ala. Bruă dŭm đang dliê kyâo amâo lŏ dưi kiă kriê đang kyâo pô, boh nik hlăm klei bhiăn ngăn prăk, kơ lăn ala snăn akâo kơ knŭk kna lŏ mâo hdră êlan ksiêm duah, mghaih msir hĕ kơ klei anei”.
Gun kpăk kơ lăn ala jing bruă dleh dlan mơ̆ng bruă dăp, mlih mrâo, bi mguôp hnư
Hlăm jih jang bruă dăp wĭt, mlih mrâo, klei bi mkrum ngăn hlăm knơ̆ng bruă dliê kyâo, Khua bruă kƀĭn ala Vương Đình Huệ lač, bruă adôk ksŭn klei kơ lăn ala jing sa klei dleh êdi lehanăn bi mâo sa hdră mă bruă bi jăk. Khua bruă kƀĭn ala mđin hĭn êdi kơ bruă jao lăn kơ dŭm knơ̆ng bruă lŏ hma dliê kyâo kơ alŭ wăl ară anei adôk lu bruă ka dưi ngă, klei mă bruă hŏng klei awăt, lehanăn mtă kơ dŭm Êpul Gơ̆ng bruă ƀuôn sang dŭm čar mâo hdră ksiêm dlăng bi nik. Anăp anei, Bruă kƀĭn ala ăt srăng lŏ wĭt ksiêm dlăng kơ bruă anei:
“Klei mlih mrâo hdră kiă kriê, wăt hlăm ngăn prăk, wăt hlăm klei duh mkra snăn adôk lu snăk bruă năng ngă. Mta kñăm jing si srăng mâo boh tŭ dưn knhal tuič mơ̆ng dŭm knơ̆ng bruă lŏ hma dliê kyâo anăn, kñăm đru kơ klei mđĭ kyar, lehanăn ba wĭt ngăn prăk kơ knuk kna, kyuadah ară anei bruă anăn dôk bi kpleh prŏng êdi. Ênoh lăn ala mâo knơ̆ng bruă bi mlih lehanan ba jao kơ alŭ wăl jing ăt dôk ti ênoh điêt. Tal dua, lăn ba jao kơ alŭ wăl mâo hlăm ênoh brei sua wĭt lăn lehanăn mâo hdră êlan mă bruă djŏ snăn jing ƀiă snăk. Êjai anăn phung ƀuôn sang drei, boh nik mnuih djuê ƀiă, krĭng čư̆ čhiăng kƀah lăn pla mjing lehanăn lăn dôk snăk sơưn. Anei yơh jing bruă brei drei mđing, bi mâo hĕ hdră mă bruă bi djŏ guôp”.
Dưi ƀuh jing, jih jang klei lŏ dăp wĭt, mlih mrâo, ngă klei bi mkrum ngăn mơ̆ng dŭm knơ̆ng bruă lŏ hma dliê kyâo hlăm kluôm ala, lehanăn boh nik jing ti Lăn Dap kngư anei, mâo leh Đảng, knŭk kna dlăng wĭt, lehanăn kiă kriê kjăp, čiăng pral mâo hdră mghaih msir bi djŏ jih jang klei awăt kƀah dôk găn ară anei./.
Pô mblang: Y-Khem Niê
Viết bình luận