VOV4.Êđê- Thŭn 2020 -2021, jing wưng tŭ jing yuôm bhăn mơ̆ng krĭng Lăn Dap Kngư iêô jak duh bi liê tơdah yap hluê si ênoh yuôm dŭm hdră bruă dưi pŏk ngă. Hlăm anăn, knŏng hjăn dŭm hdră bruă pui kmlă êran hŏng ai angĭn, ba kơ krĭng wăl êbeh 85 êbâo êklai prăk, hŏng lu klei čang hmăng kơ klei bruă duh mkra - ala ƀuôn tŭ dưn. Khădadh snăn, leh wưng pioh kơ dŭm hdră bruă anei jih leh, Lăn Dap Kngư lŏ jing krĭng mâo lu klei êdu kƀah. Dŭm hdră bruă mâo ênoh FIT mơ̆ng Knŭk kna hŏng lu klei soh mơ̆ng hdră ngă soh dôk guôn ksiêm dlăng, msir mgaih.

Ktuê êlan dơ̆ng prŏng 14 – êlan Hồ Chí Minh găn kdriêk Dak Song, čar Daknông, dŭm tourbin gơ̆ng pui kmlă hŏng ai angĭn kô̆ phung dlông dŭm êtuh met, ƀiădah dôk ñăt kriêp ti dlông kbuôn čư̆ mtah. Hlăm lu mlan êgao, amâo uê̆n kơ mâo angĭn amâodah hơăi, dŭm tourbin ăt dôk sơnăn mơh, amâo mâo kbiă sa kilowatt pui kmlă ôh. Ti gŭ lăn, dŭm boh kbuôn čư̆ diñu čuk hli ăt dôk mkăm mtŭk mtul gơ̆ng pui leh anăn dhiăr, ƀiădah amâo mâo buh ôh sa mta kdrăp yua ngă bruă. Chẩu Văn Sơn, khua kiă kriê knơ̆ng bruă duh mkra mnia mblei MTV pui kmlă Dak N’Drŭng 1,2 leh anăn 3 brei thâo, knơ̆ng bruă duh bi liê êbeh 15.00 êklai prăk ti nei, mdưm hlăm bruă bi leh, bi mkŏ êlâo kơ hruê 31/10/ 2021 leh anăn dưi ba čhĭ pui kmlă hŏng ênoh 1.928 prăk/1kwh. Ƀiădah knơ̆ng bruă ƀuh pô luič liê mang. Knhal jih mlan 10 thŭn dih, knŏng mâo mă 2 3 gơ̆ng pui hlăm ênoh 89 gơ̆ng dưi mkra bi leh. Mơ̆ng năn truh kơ ară anei, knơ̆ng bruă mlih jih hdră duh bi liê, mơ̆ng mkra bi hmar čiăng mâo prăk mnga, jing ngă êmưt čiăng dưi hdĭp.

“Leh hruê 31/10/2021 leh amâo lŏ mâo ôh ênoh FIT, klei hmei ngă bruă ƀuh mâo klei êmưt. Kyuadah êgao leh mmông mâo ênoh FIT, tơdah ngă hmar ktang luč liê hĭn, ngă êmưt ƀiă čiăng bi hrŏ ênoh duh bi liê”.

Dŭm gơ̆ng pui dôk guôn bring jiă ti Lăn Dap Kngư

Ăt luč liê mang hŏng wưng hruê 31/10/2021, sang măi bi êran pui kmlă hŏng ai angĭn Nam Bình 1 (kdriêk Dak Song, čar Dak Nông), ăt kĕ bơ gei mbah tŭ klei luč liê prŏng. Lê Văn Tiến, k’iăng khua kiă kriê sang măi anei brei thâo:

“Bi leh mâo leh giăm sa thŭn, ƀiădah sang măi êbeh 1 êbâo êklei prăt ăt dôk ñăt kriêp. Kah knar grăp mlan knơ̆ng bruă ăt tla sa ênoh prăk čiăng rơ̆ñg bi êran sang măi leh anăn đăo knăl luč mang 10 êklai prăk hlăm sa mlan.”

            Hlăm dŭm čar krĭng Lăn Dăp Kngư, Gia Lai mâo hnơ̆ng pui kmlă êran hŏng ai ngĭn prŏng hĭn, hŏng 17 anôk bi êran, kluôm hnơ̆ng pui kmlă hlăm brô 1.200 MW. Dŭm hdră bi êran pui kmlă hŏng ai ngĭn ăt lĕ hlăm klei 5 ƀơ̆ng, 5 luč, êjai mâo dŭm êtuh tourbin, hnơ̆ng pui kmlă êbeh 620 MW ti 10 anôk luč ênoh FIT, lĕ hlăm klei “Dôk sa anôk”, ngă kơ knơ̆ng bruă rŭng răng kyua dŭm ênoh prăk brư̆ ƀrư̆ đĭ hluê hruê mmông, ƀiădah knơ̆ng bruă amâo mâo prăk hrui wĭt. Ăt msĕ hŏng lu phung duh bi liê kơ pui kmlă êran hŏng ai angĭn, mâo đa đa knơ̆ng bruă pui kmlă hŏng ai ngĭn ti čar Gia Lai lač, klei lĕ ƀuh ruă hĭn jing diñu kyua lu mta, msĕ si klei ruă tưp Covid-19 ngă truh klei êmưt, dŭm hdră kčah ktang phĭt kơ bruă tŭ ư bi êran djŏ tuôm hŏng klei lông yua, klư̆ phung duh bi liê lĕ hlăm klei luč mang. Ƀiădah hluê si Nguyễn Hữu Quế, khua kiă kriê knơ̆ng bruă Hdră êlan leh anăn duh bi liê čar Gia Lai, knơ̆ng bruă pui kmlă hŏng ai angĭn knŏng thâo ƀuah mă pô đuč. Hlăm wưng čar iêô mthưr duh bi liê thŭn 2020, klei ruă tưp Covid-19 dleh leh dưi ksiêm dlăng. Dŭm hdră êlan mơ̆ng knŭk kna djŏ tuôm hŏng bruă pui kmlă êran hŏng ai angĭn, ăt dưi ba mdah mơ̆ng êlâo čiăng kơ phung duh bi liê ksiêm duah, hrŏng mă. Leh anăn klei klă hĭn jing ăt hlăm sa klei găl mâo hdră dưi bi liê hnưm, kyuanăn dŭm klei êmưt kăn dưi mplĕ hŏng knŭk kna leh anăn hdră êlan lei:

   : “Mâo phung duh bi liê diñu ngă ktang phĭt êdi, ƀiădah ăt mâo phung bi liê mâo klei dleh kpăk, anăn jing boh klei diñu, anei jing hdră êlan mbĭt. Mâo phung duh bi liê diñu hriê êdei, ngă êdei, ƀiădah dưi bi leh djŏ hruê 31/10, mâo phung duh bi liê ngă sơdah mă, sitôhmô amâo ênŭm mnuih mă bruă amâodah klei kuôl kă hŏng phung ngă bruă amâo mâo rơ̆ng bi hrŏ hruê mmông. Anei jing bruă mơ̆ng phung duh bi liê, amâodjŏ bruă knŭk kna ôh”.

Sang măi pui kmlă êran hŏng angĭn Dak Ndrung mơ̆ng êran pral čiăng đĭ mdrŏng bi mlih jing ngă êmưt čiăng dưi krơ̆ng

    Klei êgao mkrah wah ênoh dŭm hdră anăn amâo mâo tŭ jing, luč liê mang, khădah mâo phŭn agha kyua klei awăt êdu mơ̆ng phung duh bi liê, leh anăn mâo prăk mnga ƀơ̆ng, luč liê măng tŭ jing hdră bhiăn hlăm anôk mnia mblei. Ƀiădah, bruă amâo mâo klei tŭ jing dŭm hdră bi êran pui kmlă hŏng ai angĭn krĭng Lăn Dăp Kngư, ngă kơ mkrah hlăm ênoh êbeh 85 êbâo êklai prăk duh bi liê luč hơăi mang, amâodjŏ knŏng jing boh klei hlăm hdră tĭng mkă mnia mblei. Mơ̆ng mmông alŭ wăl ba mdah hră anăn duh bi liê, truh kơ knơ̆ng bruă bi klă, ngă hră mơar… truh kơ hruê ngă bruă knhal tuč, kluôm knŏng mâo mă giăm 3 thŭn, leh anăn klei ruă tưp Covid-19 ăt mâo leh klei hưn brei răng mơ̆ng sui. Ƀiădah dŭm alŭ wăl ăt iêo mthưr duh bi liê leh anăn dŭm knơ̆ng bruă ăt duh bi liê hŏng djăp ênoh, dăp pruê̆ êjai êran êjai. Hŏng klei mĭn msĕ sơnăn, klei duh bi liê anei ăt ngă truh lu klei amâo mâo jăk mkăn.

Pô mblang: Y-Ƀel Êban