Klei êa lip lêč hlăm alŭ wăl nah ngŏ čar Daklak hlăk dôk đĭ hriê bŏ hŏng klei huĭ hyưt, êjai anăn dŭm boh phŭn pui hlăk hlê bi pŏk êa, ba klei êa lip lêč prŏng hlăm nah tluôn. Ksiêm dlăng bruă mdrơ̆ng hŏng klei êa lip lêč anăn dŭm boh ƀuôn hgŭm  nah dưr tlam mbrue, K’iăng khua knŭk kna Hồ Quốc Dũng mtă kơ dŭm êpul êya bi đru mbĕ mnuih ƀuôn sang bi pral êlâo kơ adiê mmăt, mdưm bruă đru mnuih ƀuôn sang jing tal êlâo. Êa lêč mơ̆ng hnoh krông Pa lehanăn dŭm hnoh krông mơ̆ng alŭ wăl Dưr Daklak đĭ ti hnơ̆ng prŏng hĭn hlăk thŭn 1993. Êlan dơ̆ng prŏng mrô 1A lehanăn lu êlan klông amâo lŏ dưi găn êrô, ba klei dleh dlan kơ bruă đru dŏng. Hjan prŏng ăt dôk sui êa ăt dôk đĭ nanao ti dŭm boh ƀuôn hgŭm ktuê hnoh krông Tam Giang, krông Cái, krông Pa lehanăn krông Bàn Thạch, ba klei huĭ hyơt kơ dŭm êbâo gŏ sang mnuih ƀuôn sang. Dŭm êpul bruă djŏ tuôm ngă mtam djăp bruă răng mgang klei êđăp ênang kơ mnuih ƀuôn sang./.

Mlam 19/11, Khánh Hòa lŏ mâo hjan prŏng. Lu krĭng êngăp êlam hlăm êa, bi ktlah hjăn; hnơ̆ng êa đĭ, huĭ srăng klưh hroh kjham. Ti anăp klei dleh dưi ksiêm dlăng anei, Anôk kriê dlăng bruă Đảng čar Khánh Hòa mâo leh klei hưn mthâo mjêč, mtă kơ dŭm êpul ba yua jih klei găl mâo mdrơ̆ng hŏng klei adiê hjan, rơ̆ng klei êđăp ênang kơ mnuih ƀuôn sang. Hluê si klei hưn, čang rang aguah hruê 20/11, adiê hjan prŏng lŏ mâo, hnơ̆ng êa đĭ lu srăng ngă êngăp êa ti lu anôk. Hlăm 48 h ti anăp, kluôm čar năng ai srăng lŏ mâo adiê hjan ktang hĭn; êa ti dŭm krông msĕ si krông Cái Nha Trang, Cái Phan Rang, krông Dinh (Ninh Hòa)… lŏ dơ̆ng đĭ. Anôk kriê dlăng bruă Đảng čar mtă kơ Anôk gĭt gai hdră răng mgang sowil čar lehanăn êpul djă phao ktuang iêu ba jih kdrăp mnơ̆ng, mjêč mbĕ mnuih ƀuôn sang mơ̆ng krĭng huĭ hyưt./.

Mlam mmăt mbrue 19/11, Gia Lai găn klei êa lêč prŏng êdi, knŏng hlăm sa hrue mlam mâo leh 3 čô mnuih djiê, êbeh 10.400 gŏ êsei bi ktlah hŏng tač êngao. Ti anăp klei hlăk mjêč anăn, khua knơ̆ng bruă sang čư̆ êa čar Gia Lai Phạm Anh Tuấn mtă kơ phung kahan ksiêm, lĭng kahan lehanăn bruă sang čư̆ êa nah gŭ mbĕ mduĕ mnuih ƀuôn sang hŏng djăp hdră. Kahan ksiêm mbĕ leh êbeh 3.000 gưl čô mnuih, mâo dŏng truh 184 čô mnuih mơ̆ng krĭng êngăp êa. Hlăm dŭm alŭ wăl msĕ si Ia Tul, Ia Pa, Pờ Tó, Ia Rsai, Uar…, êpul đru dŏng yua ca nô, klei ktŭng, lehanăn lue nao truh kơ dŭm anôk gŏ sang dôk ti krah êa lip, ktue hnoh krông Pa, dŭm êtuh gŏ sang mnuih ƀuôn sang ti dŭm boh ƀuôn mâo mbĕ leh hŏng klei êđăp ênang.

Ăt hlăm mlam 19/11, ti kčŭn čư̆ Mimosa, dôk hlăm ƀuôn hgŭm Xuân Hương – Đà Lạt, čar Lâm Đồng mâo klei kdlŭ lăn prŏng. Jih jang ƀŏ êlan joh jih, hlăm klei huĭ hyưt anei, êpul đru dŏng mơ̆ng čar Lâm Đồng gak rang nanao hlăm dŭm anôk amâo mâo jăk, bi tiŏ êran hŏng hrue mmông dŏng đru mâo 12 čô mnuih đuĕ kơ anôk êđăp ênang./.