Ti gŭ êyui kyâo djiêo êlan dơ̆ng mrô 14, ti anăp ƀăng jang sang hră gưl tlâo Quang Trung, să Dak R’la, kdriêk Dak Mil, čar Dak Nông, phung kahan ksiêm dôk ksiêm dlăng bruă hluê ngă hdră bhiăn klei êđăp ênang êlan klông phung hđeh hđeh sang hră đĭ êdeh p’phŭt. Tinei, mbĭt hŏng bruă ksiêm dlăng, kahan ksiêm ăt lŏ mtô, mtă kơ phung hđeh sang hră hluê ngă djŏ hdră bhiăn hlăm êlan klông, Adei Nguyễn Anh Trung, hđeh sang hră adŭ 12A6 brei thâo:

 “Phung kahan ksiêm jêñ jêñ ksiêm dlăng čiăng ñĕ kơ dŭm klei ngă soh jing jăk êdi. Diñu ksiêm dlăng êdeh đĭ, hmao ƀuh leh anăn mgaih msir klei ngă soh”.

Êlâo kơ wưng ksiêm dlăng, Êpul kahan ksiêm nao leh ti sang hră gưl 3 Quang Trung čiăng hâo hưn, mbha hră hlăk mblang dŭm klei čuăn mơ̆ng hdră bhiăn lăn čar kơ klei êđăp ênang êlan klông. Kahan ksiêm bi mguôp hŏng sang hră ksiêm dlăng, bi klă boh sĭt ti sang dưm êdeh leh anăn dŭm anôk dưm êdeh giăm sang hră, hâo hưn, mtă kơ phung hđeh sang hră amâo mâo đĭ êdeh êbeh 50cm3 êjai ka ênŭm thŭn. Leh bi klă klei ƀuăn hluê ngă djŏ hdră bhiăn êlan klông, adei Trần Thị Thu Thanh, ti adŭ 12A1 brei thâo:

 “Kâo ƀuh klă sĭt leh anăn tŭ dưn êdi êjai đru kơ hmei bi mbŏ thiăm klei hriăm kơ dŭm klei čuăn êđăp ênang hlăm êlan klông, leh anăn hŏng bruă anăn dưi ñĕ kơ dŭm klei ngă soh ênưih tuôm êjai nao hlăm êlan klông.”

Nai Nguyễn Văn Ngọc, khua kiă kriê Sang hră gưl 3 Quang Trung brei thâo, sang hră dôk ti êlan dơ̆ng mrô 14, jing anôk mâo lu êdeh êdâo găn êrô, kyuanăn mâo klei huĭ hyưt tuôm hŏng klei truh hlăm êlan klông. Sang hră bi mguôp hŏng dŭm êpul êya djŏ tuôm ngă bruă hâo hưn čiăng kơ hđeh sang hră thâo săng leh anăn hluê ngă dŭm hdră bhiăn hlăm êlan klông:

 “Tal 1, sang hră brei phung hdeh bi klă klei ƀuăn rơ̆ng, tal 2 jing jêñ jêñ ktuê dlăng bruă hluê ngă dŭm klei čuăn, leh anăn ăt jêñ jêñ mtă kơ phng hđeh sang hră hlăm dŭm mmông kƀĭn grăp hruê kăm. Grăp thŭn sang hră bi mguôp hŏng kahan ksiêm mkŏ mjing hdră mtô êngao klei hriăm kơ phung hđeh čiăng ksiêm hriăm kơ hdră bhiăn hlăm êlan klông čiăng rơ̆ng kơ klei êđăp ênang.”

Hlăm wưng êgao, êpul kahan ksiêm êlan klông čar Dak Lak ngă jêñ jêñ bruă hâp hưn, mtô mblah hdră bhiăn lăn čar kơ klei êđăp ênang hlăm êlan klông truh kơ phung hđeh sang hră ti alŭ wăl. Thượng tá Phạm Quốc Lập, khua adŭ bruă kahan ksiêm êlan klông – kahan ksiêm čar Dak Nông brei thâo, mbĭt hŏng bruă jêñ jêñ ngă klei ksiêm dlăng, ƀuah mkra dŭm klei ngă soh, anôk bruă bi klă bruă hâo hưn mđĭ klei thâo săng, klei mĭn hluê ngă hdră bhiăn ăt jing hdră mrô 1 čiăng răng mgang klei êđăp ênang hlăm êlan klông kơ phung hđeh sang hră:

 “Êpul kahan ksiêm êlan klông čŏng pô bi mguôp hŏng Êpul răng mgang klei êđăp ênang êlan klông čar mđĭ hĭn bruă hâo hưn ti dŭm sang hră, ti anăp jing ktuê êlan dơ̆ng Hồ Chí Minh, ti êlan dơ̆ng mrô 28 leh anăn dŭm wăl krah kdriêk, ƀuôn prŏng mơ̆ng čar Dak Nông. Tal 2 jing čŏng pô bi mguôp hŏng dŭm êpul, dhar bruă hâo hưn truh kơ amĭ ama hđeh sang hră amâo mâo brei anak čô pô đĭ êdeh êjai ka truh thŭn. Mbĭt hŏng anăn, ngă bruă hâo hưn truh kơ dŭm krĭng taih kbưi leh anăn mkŏ mjing dŭm klei bi hmô ƀăng jang sang hră êđăp ênang êlan klông hlăm kluôm čar”./.