K’Ních, Khua ƀuôn Dur 1, să Dur Kmăn, kdriêk Krông Ana, čar Dak Lak, mgei ai tiê leh anăn ktưn hưn tơdah bi tuôm hŏng Khua gĭt gai Đảng Nguyễn Phú Trọng hlăm Knăm mơak bi hgŭm jih jang djuê ana thŭn 2018. Ñu ƀuh klei jĕ giăm, bi đru mơ̆ng khua gĭt gai prŏng hĭn mơ̆ng Đảng hŏng mnuih ƀuôn sang.

“Hmư̆ leh anăn bi tuôm hŏng ñu hruê anăn, kâo ƀuh ñu jing sa čô mnuih ênang, msĕ si ama pô khăp hơiêng. Ñu mtă mtăn kơ jih jang phung knuă druh leh anăn mnuih ƀuôn sang brei bi hgŭm kjăp, thâo msir mgaih klei kƀah čiăng hrăm mbĭt đĭ kyar. Mơ̆ng anăn truh ară anei ăt 5 thŭn leh, mơ̆ng klei mtă mtăn snăn mnuih ƀuôn sang ngă jăk snăk.”

Ktưn hưn grăp 2 blư̆ dưi bi tuôm hŏng Khua gĭt gai Đảng Nguyễn Phú Trọng hlăm dŭm klei bi kƀĭn kơ dhar kreh, pô čih Niê Thanh Mai, Khua Êpul hgŭm klei čih kač Dak Lak hdơr djăp klei blŭ mơ̆ng Khua gĭt gai Đảng kơ klei bi hgŭm djuê ana. Niê Thanh Mai brei thâo, klei gĭt gai mơ̆ng Khua gĭt gai Đảng hlăm klei bi kƀĭn kluôm ala kơ dhar kreh thŭn 2021 mâo čar Dak Lak pŏk ngă klă klơ̆ng.

“Klei bi hgŭm djuê ana hlăm klei čih kač rup, čih klei duê, klei yăl dliê leh anăn hlăm klei čih yăl dliê snăn hmei ăt mkŏ mjing hdră, hdră kčah klei čih mơ̆ng jih jang phung čih; Si ngă čiăng ƀuh bruă klam lehh anăn klei bi hgŭm mơ̆ng jih jang djuê ana leh anăn klei bi hgŭm mơ̆ng lu êpul mơ̆ng kahan ksiêm, lĭng kahan, êdam êra, phung mniê… Leh klei bi kƀĭn dhar kreh kluôm ala ti gŭ klei gĭt gai mơ̆ng Khua gĭt gai Đảng Nguyễn Phú Trọng snăn klă sĭt ai tiê leh anăn klei bi hgŭm djuê ana srăng lar ƀar hĭn leh anăn srăng êdah êdi mơ̆ng dhar kreh, klei čih kač kưt mmuiñ”.

Mpŭ kơ grăp pŏk rup mă mbĭt hŏng Khua gĭt gai Đảng Nguyễn Phú Trọng, H’Yam Buôn Krông, ti ƀuôn Tơ̆ng Jŭ, să Ea Kao, ƀuôn prŏng Ƀuôn Ama Thuôt, čar Dak Lak mgei ai tiê yăl dliê, ñu ktưn hưn dưi bi tuôm 2 blư̆ hŏng Khua gĭt gai Đảng. Boh nik, thŭn 2021, ñu hŏng amai adei mniê lŏ čŏng mñam ao Êđê siam snăk mđup brei kơ Khua gĭt gai Đảng hlăk ñu wĭt kơ ƀuôn.

    “Leh hmư̆ klei hưn mphŭn dưm mrai pơ̆k mñam čiăng mđup brei kơ ñu, mơĭt klei khăp, klei mpŭ pô hŏng Ñu. Tal dua bi tuôm hŏng Ñu jing hlăk kâo nao hlăm Klei bi mni kơ phung mâo klei thâo hră mơar, mnia blei êdah êdi leh anăn mnuih mâo kơhưm djuê ƀiă ti Hà Nội. Kâo ƀuh khăp snăk kơ klei ñu mtă mtăn hŏng mnuih djuê ƀiă leh anăn kluôm ala, brei mkŏ mjing klei bi hgŭm, bi hgŭm kơh srăng tŭ jing”.

       Hà Ngọc Đào, Khua hđăp Knơ̆ng bruă sang hră leh anăn mtô bi hriăm Dak Lak brei thâo, thŭn 2011, Ênuk Khua gĭt gai Đảng Nguyễn Phú Trọng mphŭn ngă bruă klam khua gĭt gai Đảng, ăt jing wưng mprăp kơ hdră mlih mrâo, bi leh bruă sang hră mtô bi hriăm. Hŏng lu klei gĭt gai êlam mơ̆ng Khua gĭt gai, truh ară anei, leh 10 thŭn hlue ngă Hdră mtrŭn 29-NQ/TW, bruă sang hră mtô bi hriăm mâo leh klei đdĭ kyar ktang leh anăn mâo lu boh tŭ yuôm bhăn, boh nik hlăm krĭng mnuih djuê ƀiă, krĭng knông lăn, plao ksĭ. Čiăng năng hŏng klei đăo knang khăp hơiêng mơ̆ng Khua gĭt gai Đảng kơ bruă sang hră mtô bi hriăm, Hà Ngọc Đào brei thâo:

“Awa Trọng djiê leh jing sa klei luč liê prŏng snăk hŏng ala čar. Hjăn kâo mgei ai tiê snăk, klei ênguôt hơưi anei jing prŏng snăk. Jing đảng viên kâo đăo knang kơ Dhar bruă Đảng gưl dlông srăng đru ala čar găn klei dleh dlan anei. Ară anei brei mjing klei ênguôt hơưi jing klei ktang hlăm bruă ngă. Mnuih ƀuôn sang đăo knang kơ Đảng, bi hgŭm grăp čô mnuih jing sa, bi hgŭm jih jang djuê ana, bi hgŭm hlăm Đảng, bi hgŭm hlăm mnuih ƀuôn sang hlue si klei Ñu čiăng hlăk dôk hdĭp.”

 Hdơr kơ klei Khua gĭt gai Đảng mtă mtăn hlăm Knăm mơak bi hgŭm jih jang djuê ana ti Dak Lak thŭn 2018, Y Giang Gry Niê Knơ̆ng, Khua bruă mặt trận čar kwar Việt Nam čar Dak Lak bi êdah:

 “Khua gĭt gai Đảng Nguyễn Phú Trọng dlăng nanao bruă bi hgŭm jih jang djuê ana jing klei yuôm bhăn, jing phŭn kơ klei ktang ala čar. Hlue ngă klei blŭ mơ̆ng Khua gĭt gai Đảng, Knơ̆ng bruă mặ trận čar kwar Việt Nam čar Dak Lak lŏ dơ̆ng ngă jăk bruă bi kƀĭn, bi hgŭm dŭm êpul mnuih ƀuôn sang, djuê ana, klei đăo, hrăm mbĭt kyua êpul êya, mkŏ mkra ƀuôn sang dhar kreh, jăk siam”./.