Ară anei grăp hruê, Wăl anôk hiu čhưn ênguê Bàu Trắng U leh anăn ME, ƀuôn hgŭm Hòa Thắng, čar Lâm Đồng drông mơ̆ng 3.000 truh 3.000 gưl čô tuê nao čuă dlăng, mă rup leh anăn hlăp lêñ ti krĭng čŏng čư̆ čuah êbeh 2ha. Nguyễn Văn Hùng – khua kiă kriê anôk bruă brei thâo, mơ̆ng bi mŭt čar truh kơ ară anei, ênoh tuê đĭ hlăm brô 20% leh anăn ăt đĭ ktang êjai mkŏ mơ̆ng krĭng čuah truh kơ krĭng mnga Đà Lạt:

“Mơ̆ng leh bi mŭt mbĭt truh kơ ară anei mâo klei bi mguôp plah wah dliê, êa ksĭ leh anăn kdrăn tač, anăn jing klei bi mguôp prŏng pô dưi mkŏ hlăm čar. Čiăng êdi jing klei mkŏ êlan klông čiăng kơ phung tuê mâo klei găl hĭn mơ̆ng êa ksĭ truh kơ êbâo mnga leh anăn mơ̆ng mnga trŭn kơ êa ksĭ. Klă sĭt hĭn mâo knơ̆ng bruă mđing truh jing mkŏ dŭm anôk bruă hiu čhưn ênguê čiăng mâo dŭm hdră đru ệai truh ti Đà Lạt leh anăn nao ti êa ksĭ”.

Kluôm čar ară anei mâo êbeh 4.200 anôk mdei msăn, giăm 1.400 sang jưh mơ̆ng 1 – 5 mtŭ, dưi drông 48 êklăk gưl čô tuê grăp thŭn. Knŏng hlăm thŭn 2025, čar mdưm mta kñăm iêo jak hlăm brô 23 êklăk gưl čô tuê. Hluê si nai prĭn Phan Bảo Giang, k’iăng khua kiă kriê hlŏng păn ngă Khua anôk bruă Marketing sang hră gưl prŏng ngăn prăk ƀuôn prŏng Hồ Chí Minh, wưng thŭn 2025 – 2030, êjai bi klă dŭm klei găl, kơhưm alŭ wăl, mbĭt anăn mkŏ hŏng anôk mnia mblei, bruă hiu čhưn ênguê Lâm Đồng srăng jing kmeh gơ̆ng bruă duh mkra:

“Drei kač sa hră kak lăn anôk phung tuê kơ grăp anôk hiu čhưn ênguê čar Lâm Đồng mrâo. Drei dưi ƀuh grăp alŭ wăl mơ̆ng Dak Nông, Lâm Đồng truh kơ Bình Thuận hđăp mâo dŭm style mdê mdê, kyuanăn hlăm bruă prŏng sơnei drei mâo klei sa ai, hrăm mbĭt, kâo đăo knang grăp klei dleh dlan drei srăng găn jih”.

Hluê si klei hdră mtrŭn hưn hlăm klei kƀĭn bruă Đảng čar Lâm Đồng gưl tal 1, wưng thŭn 2025 – 2030, bruă hiu čhưn ênguê jing 1 hlăm 3 kmeh gơ̆ng yuôm bhăn mơ̆ng čar, êngao kơ bruă lŏ hma kdrăp mrâo mrang leh anăn bruă tuh tia – rŭ mdơ̆ng  mrâo mrang. Hlăm wưng klei bi ktưn đĭ hĭn, Lâm Đồng kñăm mkŏ mjing mnơ̆ng dhơ̆ng bruă hiu čhưn ênguê phŭn, mtrŭt mđĭ klei ba yua kdrăp mrâo mrang mrô hlăm klei kriê dlăng, mbĭt anăn mđĭ hĭn klei bi mguôp knŭk kna – êngao knŭk kna čiăng iêo jak klei duh bi liê, mđĭ kyar hơĭt kjăp bruă tuh tia amâo mâo asăp. Nguyễn Văn Lộc, khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Lâm Đồng lač, mta yuôm bhăn hĭn jing klei hrăm mbĭt mơ̆ng knơ̆ng bruă. Tơdah ngă bruă hiu čhưn ênguê ƀiădah amâo mâo knơ̆ng bruă amâo srăng tŭ jing ôh:

Sa mta yuôm bhăn anăn jing klei hrăm mbĭt mơ̆ng knơ̆ng bruă. Tơdah ngă bruă hiu čhưn ênguê amâo mâo knơ̆ng bruă nao mbĭt amâo srăng tŭ jing. Dhar bruă dhar kreh, mjuăt asei mlei leh anăn hiu čhưn ênguê hmei ƀuăn hrăm mbĭt hŏng knơ̆ng bruă čiăng kơ drei nao mbĭt. Dŭm knơ̆ng bruă đru kơ alŭ wăl hlăm klei rŭ mdơ̆ng, bi klă bruă hiu čhưn ênguê Lâm Đồng mrâo”.

Mđing truh kơ mta kñăm mđĭ kyar bruă hiu čhưn ênguê hnơ̆ng jăk, čar Lâm Đồng dôk duh bi liê, rŭ mdơ̆ng dŭm anôk hiu čhưn ênguê gưl ala čar leh anăn tar rŏng lăn msĕ si ênao Tuyền Lâm, Mũi Né, Tà Đùng, nao mbĭt hŏng bruă hiu čhưn ênguê phŭn: bruă hiu čhưn ênguê mnơ̆ng dhơ̆ng hdĭp, mdei msăn, knưp, bruă hiu čhưn ênguê bruă lŏ hma, klei mmuñ, kriê dlăng klei suaih pral leh anăn ktuê dlăng dhar kreh alŭ wăl. Hồ Văn Mười, k’iăng khua bruă Đảng čar, khua bruă sang čư̆ êa čar Lâm Đồng brei thâo, čiăng kơ Lâm Đồng jing anôk bruă hiu čhưn ênguê hnơ̆ng jăk, klei  yuôm bhăn hĭn srăng bi râo klei găl prŏng mơ̆ng 3 krĭng: Mnga, čư̆ čhiăng leh anăn ksĭ mtah.

“Klei găl drei prŏng čiăng pŏk truh kơ kbưi. Klei mĭn yuôm bhăn, kdlưn hĭn, mbruă. Alŭ wăl čư̆ dliê, êa ksĭ leh anăn mnga msĕ si tlâo bĕ jơ̆ng, klă sĭt tlâo bĕ jơ̆ng anei ka kpă ôh. Čiăng kơ ênoh phung tuê mâo, êgao hnơ̆ng čuăn jing srăng răng mgang klei êđăp ênang. Rơ̆ng kơ êlan klông êrô êbat, leh anăn klei suaih pral mơ̆ng phung tuê. Grăp čô mnuih ƀuôn sang jing sa čô atăt tuê. Dŭm knơ̆ng bruă hiu čhưn ênguê mâo nanao klei blŭ tlao, mâo klei khăp kơ tuê jing dhar kreh”.

Hŏng hdră tă, klei gĭr mơ̆ng bruă sang čư̆ êa, klei hrăm mbĭt mơ̆ng knơ̆ng bruă leh anăn mnuih ƀuôn sang, Lâm Đồng dôk ƀrư̆ ƀrư̆ bi sĭt klei hmăng hmưi jing anôk bruă hiu čhưn ênguê hnơ̆ng jăk, mâo bruă klam mđĭ kyar bruă duh mkra ala ƀuôn kơ Lăn Dap Kngư leh anăn lăn čar. Bruă hiu čhưn ênguê Lâm Đồng – mơ̆ng klei găl truh kơ klei hmăng hmưi dôk nao hlăm knhuang mrâo mơ̆ng sa hdră mrâo./.