Leh 11 thŭn mơ̆ng hruê mâo Khua gĭt gai Đảng nao čhưn, êmuh hrăm, mđĭ ai, Thào Dìn - sa čô ƀĭng lŏ hma mnuih Mông ti alŭ Cốc Phương, să Bản Lầu, kdriêk Mường Khương, čar Lào Cai ară anei mprăpp mŭt hlăm thŭn 60 ăt hdơr nanao klei mtô mtă yuôm bhăn snăk mơ̆ng khua gĭt gai prŏng hĭn mơ̆ng Đảng.

 Thŭn anăn, ñu jing pô bi ala kơ ƀĭng lŏ hma mkra mjing mbruă sa anăn mơ̆ng Mường Khương, Lào Cai mâo Khua gĭt gai Đảng Nguyễn Phú Trọng nao čhưn ti sang. Êlâo anăn, lu mnuih thâo kơ Thào Din hŏng anăn knăl jing “mtao boh tei nan”, prăk hrui wĭt grăp thŭn mơ̆ng čhĭ boh teinan truh 700 êklăk prăk. Ƀiădah hlăk Khua gĭt gai Đảng nao čhưn, amâo djŏ knŏng mâo klei bi mni ôh, ñu lŏ mâo klei blŭ ngă kơ jih jang mnuih mơ̆ng knuă druh, khua gĭt gai truh kơ mnuih ƀuôn sang bi mĭn. Anăn jing mđĭ kyar bruă duh mkra brei mđing bi đru kpưn đĭ kơ mdrŏng, amâo brei mâo klei bi kpleh mdrŏng ƀun ôh, phung mdrŏng leh brei đru kơ phung ƀun ƀin, đảng viên bi đru kơ phung đảng viên adôk dleh dlan hĭn čiăng “jih jang kpưn đĭ kơ mdrŏng, jih jang bi tlaih ƀun”.

Hmư̆ ñu lač snăn kâo čŏng hriăm, bi mĭn hdră ngă si ngă čiăng kơ gŏ sang mđĭ kyar, leh anăn brei bi hgŭm, mâo bruă dleh dlan brei jih ƀuôn sang bi đru snăn kơh dưi bi mlih.

 Hŏng Thào dìn, klei Khua gĭt gai Đảng mtă mtăn ăt jing boh kdrŭt čiăng kơ hruê anei, wăt tơdah amâo kƀah mnơ̆ng ƀơ̆ng, ngăn drăp ôh, ñu ăt ruah hdĭp hlăm sang gưl 4 đdiêt, grăp hruê mă bruă pưk kma. Mnuih ƀuôn sang alŭ Cốc Phương gĭr mă bruă bi lông, ară anei amâo lŏ mâo gŏ êsei ƀun ôh, mâo truh êbeh 70% jing gŏ êsei mdrŏng sah, dưi yap jing alŭ krĭng ƀuôn sang mrâo bi hmô.

Ăt jing pô tuôm hmư̆ klei blŭ hrăm, čuă êmuh mơ̆ng Khua gĭt gai Đảng, Trung tá Nguyễn Ngọc Hà, Khua Kđông kahan răng mgang knông lăn Bản Lầu, kdriêk Mường Khương ăt hdơr kơ klei mđĭ ai mơ̆ng Khua gĭt gai, hŏng asăp mtă mtăn mơ̆ng knuă druh, lĭng kahan brei ngă jăk, bruă kriê dlăng, mđĭ ai mơ̆ng Khua gĭt gai Đảng, hŏng klei mtă mtăn mơ̆ng knuă druh, lĭng kahan brei ngă jăk bruă kriê dlăng knông lăn, bruă hŏng tač êngao, boh nik brei mkŏ mjing klei găl ai tiê mnuih ƀuôn sang kjăp ktang.

Hlăm ai tiê Khua gĭt gai Đảng Nguyễn Phú Trọng mtă mtăn, hmei đru leh kơ mnuih ƀuôn sang hŏng bruă ngă klă sĭt msĕ si mkăp an mjeh, êđai mjeh, ktrâo lač kơ mnuih ƀuôn sang bi mlih gru hmô čiăng hơĭt klei hdĭp mda, mkŏ mkra anôk sang hră, anôk gang mkhư̆ klei mngăt hlăm êa čiăng hdơr kơ klei khăp mnuih ƀuôn sang đru leh hmei.

 Hdơr kơ klei Khua gĭt gai mtă, gưl bruă Đảng, bruă sang čư̆ êa, êpul lĭng kahan leh anăn mnuih ƀuôn sang 12 djuê ana ti Bản Lầu hlăm thŭn êgao bi hgŭm, gĭr krơ̆ng kjăp klei dưi, hơĭt kjăp knông lăn. Bản Lầu ară anei amâo djŏ jing anôk phŭn pla tei nan, mtei ti Lào Cai ôh, ƀiădah lŏ mâo thiăm dŭm êtuh ha čê, quế, mâo wăt krĭng pla mdiê jăk Séng Cù, gĭr hnưm jing să krĭng ƀuôn sang mrâo hnơ̆ng jăk hlăm êdei anăp amâo sui ôh./.