Jing sa hlăm 84 čô djŏ ruah bi ala Êpul gơ̆ng bruă ƀuôn sang čar Dak Lak wưng thŭn 2026-2031, H’Giang Niê, khua Êpul gơ̆ng bruă ƀuôn sang să Ea Mdroh, lŏ dơ̆ng mâo klei đăo knang mơ̆ng mnuih ƀuôn sang leh sa wưng păn bruă hgŭm hlăm Êpul gơ̆ng bruă ƀuôn sang čar. Hlue si ñu, bruă lŏ djŏ ruah amâo djŏ klei čih yap hŏng asei ñu ƀiădah lŏ mâo klei čuăn ktang hĭn kơ bruă ngă klă klơ̆ng. Grăp pŏk hră mplĕ mơ̆ng mnuih ƀuôn sang jing klei đăo knang kơ sa klei bi mlih, mđĭ kyar ktang mơ̆ng krĭng lăn anei. H’Giang brei thâo:

“Hlăm gru hmô bruă knŭk kna dua gư hmei bi klă bruă klam pô jing kdrông mkŏ klă anăp leh anăn giăm hŏng mnuih ƀuôn sang hĭn. Kâo srăng krơ̆ng kơ klei mjĕ giăm hĭn, bi êdah klei klă mngač leh anăn hmao hưn klei akâo mơ̆ng mnuih ƀuôn sang kơ klei kƀĭn Êpul gơ̆ng bruă ƀuôn sang čar, čiăng rơ̆ng kơ hdră mtrŭn êjai ba mdah klă sĭt djŏ hŏng klei čiăng boh sĭt mơ̆ng alŭ wăl. Hlăm anăn, kâo uêñ mĭn hŏng bruă hluê ngă dŭm hdră êlan djuê, mtrŭt mđĭ mkŏ bruă hiu čhưn ênguê bruă lŏ hma nao mbĭt hŏng kriê pioh dhar kreh, đru kơ mnuih ƀuôn sang bi hơĭt hdră duh ƀơ̆ng leh anăn kpưn đĭn tlaih ƀun hơĭt kjăp”.

Bi hŏng  Ngô Thị Minh Trinh, khua Êpul gơ̆ng bruă ƀuôn sang să Ea Knuêč, čar Dak Lak, ƀuh hlăm wưng đĭ kyar mrâo, bi ala mnuih ƀuôn sang ruah amâo djŏ knŏng mđing hmư̆, bi êdah klei hmăng hmưi, răng mgang boh tŭ dưn kơ mnuih ƀuôn sang ƀiădah lŏ čiăng mâo klei jhŏng, klei thâo leh anăn klei duh myơr nao hgŭm hlăm bruă mkŏ mjing leh anăn ktuê dlăng hdră êlan, boh nik hlăm dŭm bruă alŭ wăl mâo klei găl ƀiădah ka ba yua tŭ dưn. Ngô Thị Minh Trinh brei thâo:

“Anei jing klei ktưn hưn hŏng kâo pô leh anăn kâo čiăng jing klei ktưn hưn leh anăn bruă đua klam nao mbĭt nanao. Kyuanăn srăng bi êdah jăk hĭn bruă klam pô bi ala kơ mnuih ƀuôn sang. Hŏng čar Dak Lak klei găl jing mdĭ kyar bruă lŏ hma, jing sa čô pô bi ala, kâo srăng mbĭt hŏng bruă knŭk kna dŭm gưl čiăng mkŏ mjiing boh tŭ hŏng dŭm mta boh mnga mâo ênoh čiăng ba wĭt klei hơĭt kơ mnuih ƀuôn sang ăt msĕ mơh klei đĭ kyar mbĭt mơ̆ng čar boh nik jing kñăm kơ klei đĭ kyar 2 ênoh mrô”.

Klă sĭt brei ƀuh, Dak Lak mâo klei găl kơ bruă lŏ hma leh anăn adôk kƀah kơ bruă tuh tia – mkra mjing, klei kreh knhâo mrâo mrang. Wưng păn bruă 2026 – 2031, bi ala Êpul gơ̆ng bruă ƀuôn sang leh anăn dŭm anôk bruă ti čar, srăng bi djăp ênŭm lu klei čiăng mơ̆ng mnuih ƀuôn sang hlăm lu mta bruă, boh nik jing sang hră mơar, mlih mrâo mbruă – čô̆ kơ bruă, lăn ala, bruă tuh tia mkra mjing, mkŏ mjing anăn knăl leh anăn mkŏ anôk mnia mblei.

Leh mplĕ hră, klei uêñ mĭn lu hĭn mơ̆ng phung bi ala jing mnuih pô ruah ngă srăng bruă truh hnơ̆ng dŭm boh klei lač leh hlăm hdră ngă bruă. Hluê si Trần Xuân Định, khua êpul bruă mặt trận, êpul bruă mrô 2, ƀuôn hgŭm Thành Công, čar Dak Lak, phung bi ala srăng ktuê lăng leh anăn čiăng kơ dŭm klei ƀuăn êlâo kơ mplĕ hră dưi bi êdah hŏng boh tŭ dưn klei ngă bruă grăp thŭn.

“Jing phung bi ala mơ̆ng mnuih ƀuôn sang, jing kdrông mkŏ plah wah klei mĭn Đảng leh anăn ai tiê mnuih ƀuôn sang. Kâo hmăng hmưi hĭn jing diih jĕ giăm, bi mguôp hŏng mnuih ƀuôn sang, thâo săng klei hdĭp mnuih ƀuôn sang leh anăn mkŏ mjing čar đĭ kyar hlăm wưng kơ anăp.”

Hlue si Cao Thị Hòa An, khua hlăm bruă Đảng gưl dlông, k’iăng khua bruă Đảng čar, khua Êpul gơ̆ng bruă ƀuôn sang čar, khua dhar bruă ruah khua čar Dak Lak, klei mplĕ hră ruah phung bi ala Bruă kƀĭn ala leh anăn Êpul gơ̆ng bruă ƀuôn sang dŭm gưl wưng thŭn 2026 – 2031 ti alŭ wăl čar dưi mprăp leh anăn mkŏ mjing jăk êdi, djŏ hdră bhiăn, êngiê, êđăp ênang leh anăn tŭ jing.

84 čô bi ala Êpul gơ̆ng bruă ƀuôn sang čar gưl 16 mâo phung mplĕ hră ruah jing phung êdah êdi kơ klei thâo, knuih hdĭp, bi ala kơ klei mĭn, klei hmăng hmưi mnuih ƀuôn sang dŭm djuê ana hlăm čar. Anei jing klei ktưn hưn, jing bruă klam prŏng, čiăng kơ grăp čô bi ala amâo mâo mdei klei gĭr, bi lar bruă klam hlăm wưng mrâo:

“Phung bi ala, phung êdah êdi kơ klei thao leh anăn knhuih hdĭp, čiăng bi lar ai tiê bruă klam, krơ̆ng klei mjĕ giăm leh anăn bi êdah klei blŭ mnuih ƀuôn sang. Mbĭt anăn, phung bi ala nao hgŭm bi klă dŭm boh klei yuôm bhăn mơ̆ng alŭ wăl leh anăn ktuê lăng bruă hlue ngă dŭm hdră êlan, klei bhiăn ti alŭ wăl, čiăng mđĭ hnơ̆ng klei ngă bruă mơ̆ng anôk bruă mnuih ƀuôn sang ruah hlăm wưng kơ anăp.”

Dưi ƀuh klei tŭ dưn mơ̆ng klei mplĕ hră amâo djŏ knŏng mdei hlăm bruă bi leh dŭm klei čuăn ƀiădah lŏ pŏk êlan nao mrâo hŏng lu klei hmăng hmưi. Phung bi ala dưi ruah  hruê anei srăng ba mbĭt klei đăo knang mơ̆ng phung mplĕ hră, kčưm ngă bruă klam pô hŏng jih ai tiê, bruă ngă klă klơ̆ng, đru ba čar Dak Lak đĭ kyar pral leh anăn hơĭt kjăp.