Khua Bruă Kbĭn ala Trần Thanh Mẫn lač klă, bruă mkŏ mjing hdră ala čar kñăm kơ bruă sang hră mơar jing bruă klam hdră êlan, čiăng mâo klei duh bi liê lu kơ ai dưi leh anăn hruê mmông. Mta kñăm knhal tuč jing mđĭ hnơ̆ng jăk bruă sang hră mơar hŏng klei kluôm dhuôm, boh nik jing êpul phung nai mtô leh anăn knuă druh kriê dlăng. Čiăng bi mlih mơ̆ng klei mĭn đưm jing mđing hmư̆ klei hriăm, mđĭ hĭn ai dưi mgaih msir boh klei, klei yuôm bhăn hĭn jing dưi rơ̆ng kơ phŭn agha bruă sang hră mơar anăn jing “Tal êlâo hriăm kơ hdră bhiăn, knhal tuč jing hriăm hră mơar”.

Bi kơ hdră ala čar kñăm kriê dlăng klei suaih pral, mnuih ƀuôn sang leh anăn mđĭ kyar wưng thŭn 2026 - 2035, anei jing tur knơ̆ng mđĭ ai dưi anôk bruă mdrao mgŭn să, ƀuôn hgŭm, mtrŭt mđĭ bruă mdrao mgŭn mkăp, mđĭ klei suaih pral mnuih ƀuôn sang hŏng ai tiê gang mkhư̆ klei ruă hĭn kơ mdrao klei ruă. Khua Bruă Kbĭn ala Trần Thanh Mẫn ăt mñă brei dưn yua kdrăp mrâo mrang, bi mlih mrô leh anăn kdlưn hĭn ai dưi mđĭ kyar phung mă bruă mdrao mgŭn. Kyuadah anak mnuih jing mta bi klă hnơ̆ng jăk bruă mdrao mgŭn, mâo wăt mtô mjuăt bi hriăm, ba jao kdrăp mrâo, hdră đru, mđĭ klei thâo phung nai aê mdrao, ngăn prăk.