VOV4.Êđê - Hruê mbruê 15/8, Êpul hgŭm mđĭ kyar Dhar kreh knơ̆ng bruă Việt Nam brei thâo: Klei kƀĭn ala čar “Dhar kreh hŏng knơ̆ng bruă” gưl tal 2 srăng mkŏ mjing ti Hà Nội hlăm mlan 11 thŭn anei. Klei kƀĭn thŭn anei srăng mâo 3 mta bruă phŭn jing: klei kƀĭn trông hŏng akŏ “Krŭ wĭt dhar kreh – tur knơ̆ng krŭ wĭt leh anăn mđĭ kyar bruă duh mkra kjăp”, knăm pah mni leh anăn mđup brei hră bi klă knơ̆ng bruă mâo ênŭm hnơ̆ng čoh čuăn dhar kreh mnia mblei thŭn 2022, mkŏ mjing êpul bi ala knơ̆ng bruă bi tuôm hŏng phung khua gĭt gai Đảng leh anăn knŭk kna. Vũ Ngoạn Hợp, k’iăng khua kiă kriê Êpul hgŭm mđĭ kyar Dhar kreh knơ̆ng bruă Việt Nam brei thâo: dŭm mta bruă hlăm klei kƀĭn srăng đru mtrŭt mđĭ bruă mkŏ mjing dhar kreh knơ̆ng bruă, dhar kreh mnia mblei hlăm êpul êya knơ̆ng bruă Việt Nam hlăm leh anăn êngao ala čar, ƀrư̆ ƀrư̆ mkŏ mjing dŭm klei kdlưn hĭn hlăm dhar kreh mnia mblei Việt Nam, dưi bi djăp hnơ̆ng čoh čuăn mđĭ kyar kjăp leh anăn ñŭ kma hŏng tar rŏng lăn.

Y-Ƀel pô mblang