VOV4.Êđê - Aguah mbruê 10/5, ti ƀuôn prŏng Hồ Chí Minh mkŏ mjing leh klei kƀĭn kluôm bruă mnia mblei điện tử Việt Nam thŭn 2022 hŏng akŏ “Bruă mnia mblei điện tử mtrŭt mđĭ bruă duh mkra wưng leh jih klei ruă tưp”. Hlăm klei kƀĭn phung bi ala lač: bruă mnia mblei điện tử ngă leh klei mlih prŏng hlăm klei mnia mblei mơ̆ng dŭm knơ̆ng bruă leh anăn klei mưng mblei yua mơ̆ng phung blei ba yua, boh nik hlăm wưng leh mâo klei ruă tưp Covid-19.

Bruă mnia mblei điện tử đĭ kyar ktang hĭn hlăm wưng 2020 – 2021 leh anăn đăo knăl srăng mâo hlăm brô 39 êklai USD ti thŭn 2025. Anei ăt jing hdră ta đĭ kyar kjăp hlăm bruă bi lu jơr dŭm mbah čhĭ mnia hlăm hruê mmông kơ anăp, khădah mâo klei ruă tưp amâodah hơăi. Yap truh kơ knhal krah thŭn 2021, Việt Nam mâo hlăm brô 8 êklăk čô blei ba yua êlan online mrâo. Ară anei, phung mnia mblei êlan điện tử lu jing knăm ti Hà Nội leh anăn ƀuôn prŏng Hồ Chí Minh. Mơ̆ng thŭn 2021 truh kơ ară anei, hnơ̆ng mnơ̆ng dhơ̆ng čhĭ mnia hlăm anôk mnia mblei điện tử đĭ mơ̆ng 1,5 truh kơ 2 blư̆ mkă hŏng wưng êlâo kơ mâo klei ruă tưp.

Y-Ƀel pô mblang