VOV4.Êđê -  Aguah mbruê 21/3, tui ƀuôn prŏng Viêng Chăn, ala čar Lao, Khua phŭn bruă hdră êlan leh anăn duh bi liê Việt Nam, khua gĭt gai dhar bruă bi mguôp Việt Nam – Lao Nguyễn Chí Dũng leh anăn, Khua phŭn bruă hdră êlan leh anăn duh bi liê Lao, khua gĭt gai dhar bruă bi mguôp  Lao - Việt Nam Khăm-Chên Vông-Phô-Sỷ hrăm mbĭt gĭt gai klei kƀĭn dŭm knơ̆ng bruă Việt Nam – Lao kñăm mtrŭt mđĭ tui ngă dŭm hdră êlan duh bi liê hnơ̆ng prŏng mơ̆ng knơ̆ng bruă Việt Nam ti ala čar Lao leh anăn mtrŭt mđĭ đa đa hdră mkăp bi mguôp, duh bi liê mrâo, mâo knhuah hdră êlan hlăm hruê mmông kơ anăp.

 Blŭ hlăm klei kƀĭn, čih yap kơ klei bi mguôp, duh bi liê plah wah 2 ala čar, khua phŭn bruă Nguyễn Chí Dũng mñă klă, lu hdră mkăp duh bi liê mơ̆ng knơ̆ng bruă Việt Nam ti ala čar Lao dôk ngă bruă mâo boh tŭ dưn, đru mguôp lu kơ klei đĭ kyar bruă duh mkra, ala ƀuôn, mkŏ mjing bruă mă leh anăn mđĭ ênoh prăk ba wĭt kơ dŭm êbâo čô mnuih mă bruă, bi mbŏ prăk hrui wĭt kơ ala čar Lao, boh nik jing dŭm mta bruă dăng kông, knơ̆ng bruă ngăn prăk, pla leh anăn mkra mjing ksu, mnơ̆ng ƀơ̆ng huă, êa ksâo êmô… Đăo knăl đru kơ prăk jia leh anăn ngăn prăk mkăn mơ̆ng dŭm knơ̆ng bruă Việt Nam kơ knŭk kna Lao hlăm 5 thŭn giăm anei mâo êbeh 1 êklai USD.

Y-Ƀel pô mblang