VOV4.Êđê- Klei kƀĭn phung bi ala mniê kluôm ala tal 13, wưng thŭn 2022 -2027 srăng mkŏ mjing mơ̆ng hruê 9 truh kơ hruê 11/3/2022. Anei jing wưng păn bruă tal êlâo tui ngă hdră êlan mđĭ kyar êpul hgŭm bruă phung mniê Việt Nam truh thŭn 2030, hdră tă truh thŭn 2035. Anei jing klei hâo hưn mâo êpul hgŭm bruă phung mniê Việt Nam brei thâo hlăm klei kƀĭn bruă klei mrâo aguah mbruê 1/3 ti Hà Nội. Hŏng akŏ “Bi lar knhuah gru, bi mguôp, hŏng thâo mbruă, kyua klei mdrŏng sah ala čar”. Klei kƀĭn tal anei srăng čih yap hdră ngă bruă mơ̆ng phung mniê leh anăn bruă ngă mơ̆ng êpul hgŭm bruă phung mniê Việt Nam wưng thŭn 2017 – 2021, ba mdah bruă kñăm, hdră tă, bruă klăm, dŭm bruă ngă êdah kdlưn wưng thŭn 2022 – 2027 leh anăn ruah êpul khua gĭt gai êpul hgŭm bruă phung mniê Việt Nam gưl 13. Mĭn tĭng, klei kƀĭn anei srăng mâo 1.000 čô bi ala klă klơ̆ng jing phung mniê êdah kdlưn, pô bi ala dŭm êpul êya bruă phung mniê, dŭm djuê ana, klei đăo knang leh anăn dŭm mta bruă mkăn hlăm kluôm ala nao hgŭm.

Pô mblang: Y-Ƀel Êban