Čiăng ksiêm wĭt, bi klă đa đa mta phŭn dôk hlăm klei dưi jing klei mjêč, yuôm blăm kñăm hluê ngă jăk bruă klam mđĭ kyar bruă duh mkra ala ƀuôn thŭn 2023 leh anăn dŭm thŭn kơ anăp. Hlăm gưl kƀĭn anei, Êpul gơ̆ng bruă ƀuôn sang čar Dak Lak srăng ksiêm dlăng, bi klă dŭm mta phŭn hlăm bruă ngăn prăk, knơ̆ng prăn, lăn ala, duh bi liê bruă knŭk kna, dŭm hdră ala čar kñăm, hdră êlan hŏng phung knuă druh, phung mă bruă knŭk kna.

Năng mđĭng jing dŭm hdră mtrŭn mkăp brei ngăn prăk hŏng bruă hluê ngă dŭm hdră ala čar kñăm thŭn 2023, hdră mtrŭn klei čuăn hnơ̆ng mkra mlih ênoh lăn yua hlăm thŭn 2023 ti alŭ wăl čar Dak Lak. Hdră mtrŭn brei bi kdung bruă hluê ngă leh anăn brei čan duh bi liê bruă knŭk kna thŭn 2022 jing thŭn 2023 mơ̆ng ngăn prăk alŭ wăl, hdră mtrŭn bi mbŏ ngăn prăk mơ̆ng čar kơ hdră rŭ mjing êlan dơ̆ng Hồ Chí Minh kdrêč êlan dar Ngŏ ƀuôn prŏng Ƀuôn Ama Thuôt ( đĭ kyua ênoh ruh mgaih anôk ala)…