Aguah mbruê 29/8, ti anôk bi kƀĭn Diên Hồng, Sang Bruă Kƀĭn Ala, Bruă Đảng dŭm anôk bruă gưl dlông bi mguôp hŏng adŭ bruă Khua lăn čar, adŭ Bruă Kƀĭn Ala, anôk bruă kđi čar ala čar Hồ Chí Minh leh anăn Sang kđăm mkra bruă kđi čar ala čar Klei Sĭt mkŏ mjing Klei kƀĭn trông “55 thŭn ngă klei mtă mơ̆ng khua gĭt gai Hồ Chí Minh hlăm dŭm anôk bruă gưl dlông (1969 - 2024)”.

Blŭ hrăm hlăm klei kƀĭn, Khua bruă kƀĭn ala Trần Thanh Mẫn mñă klă, 55 thŭn êgao, klei mĭn leh anăn klei mtă mơ̆ng Awa hrăm mbĭt nanao hŏng djuê ana, ktrâo atăt Đảng, jih jang mnuih ƀuôn sang, lĭng kahan kjăp leh sĭt suôr hŏng bruă krŭ kdơ̆ng mơ̆ng Ñu, Lŏ čuê bruă krŭ kdơ̆ng hing ang mâo ñu jih klei hdĭp duh myơr leh anăn săn asei. Hlăm wưng kơ anăp, khua Bruă Kƀĭn Ala mñă klă čiăng nao klă hŏng klei gĭt gai mơ̆ng Đảng gưl dlông, Phŭn bruă kđi čar, Êpul khua bruă Đảng, čiăng ngă kluôm dhuôm, hrăm mbĭt, bi êlam bruă mkŏ mjing Đảng, rơ̆ng kjăp hdră bhiăn ngă phŭn mĭl pô, bi lar bruă klam gĭt gai mơ̆ng êpul bruă Đảng, tal êlâo ngă jăk bruă klam kđi čar hlăm klei mĭn, bi kdơ̆ng hŏng dŭm klei mĭn soh čhuai, bi roh, răng mgang kjăp tur knơ̆ng klei mĭn mơ̆ng Đảng.