VOV4.Êđê - Hruê mbruê 14/10, ti Hải Phòng, Êpul grŭp klei čih pioh tar rŏng lăn ti Việt Nam (IDG Việt Nam) bi mguôp hŏng Êpul hâo hưn mrô Việt Nam mkŏ mjing klei kƀĭn trông ala čar kơ knŭk kna mrô thŭn 2022 hŏng akŏ “klei bi hmô mnuih ƀuôn sang mrô, sang hră gưl prŏng mrô, bruă ngă logistics, mđĭ kyar klei čih pioh mnuih ƀuôn sang, lăn ala leh anăn hdră êlan mtrŭt mđĭ bruă mlih mrô ala čar”.

Hlăm klei kƀĭn trông, phung thơ̆ng kơ bruă mâo klei hưn kơ klei ane. Hưn mdah kơ dŭm hdră êlan hưn mthâo mrâo mrang kñăm mđĭ kyar bruă duh mkra mrô, yang buôn mrô, mđĭng truh kơ mta kñăm mlih mrô ala čar wưng thŭn 2022 -2025. Êpul mkŏ mjing mđup brei klei pah mni leh anăn pah mni phung khua gĭt gai mlih mrô êdah êdi thŭn 2022 (CDO Awards). Wưng anei, ƀuôn prŏng Hải Phòng ba mdah leh mbah hâo hưn lăn yua ti ƀuôn prŏng. Hŏng mbah anei, mnuih ƀuôn sang, knơ̆ng bruă ti ƀuôn prŏng Hải Phòng dưi mŭt hŏng êlan online, mâo dŭm klei hưn kơ hră ktrâo anôk, klei hưn kơ lăn yua, klei mkăp hră yua lăn…mơ̆ng êpul êya, gŏ sang hŏng klei ênưih.

VOV TâyNguyên/ Pô mblang: Y-Ƀel Êban