VOV4.Êđê- Aguah mbruê 11/2, phŭn bruă hŏng tač êngao Việt Nam mkŏ mjing klei kƀĭn trông ASEAN kơ bruă pluă mbĭt klei kƀĭn kyua phung mniê, klei êđăp ênang leh anăn hơĭt kjăp kmeh gơ̆ng êpul êya ASEAN hŏng êlan online bi mguôp hŏng êlan klă anăp. Anei jing bruă yuôm bhăn kñăm lŏ mkŏ dŭm klei gĭr mtrŭt mđĭ bruă kyua phung mniê, klei êđăp ênang leh anăn hơĭt kjăp (WPS) hlăm ASEAN mơ̆ng Việt Nam mơ̆ng wưng păn bruă jing khua gĭt gai ASEAN hlăk thŭn 2020. Blŭ hlăm klei kƀĭn trông anăn, k’iăng khua phŭn bruă hŏng tač êngao Nguyễn Minh Vũ mñă klă, Việt Nam mâo leh lu klei đru mguôp klă klơ̆ng kñăm mtrŭt mđĭ klei kƀĭn bruă kyua phung mniê, klei êđăp ênang leh anăn hơĭt kjăp hlăm ASEAN, boh nĭk hlăm wưng păn bruă jing khua gĭt gai ASEAN thŭn 2020. Klei bi kƀĭn trông tal anei jing klei lŏ čuê dŭm klei gĭr mơ̆ng Việt Nam mđing truh kơ bruă mkŏ mjing leh anăn tui ngă dŭm hdră êlan rơ̆ng klei dưi êngiê kơ phung mniê, mkŏ mjing klei găl kơ phung mniê dưi nao hgŭm hlăm dŭm klei bi klă, bi lar bruă klam hlăm bruă mgaih msir dŭm klei hmăi amâo jăk, klei lông dlăng arưp aram kơ klei êđăp ênang hlăm alŭ wăl. Mơ̆ng klei kƀĭn trông anei, phung bi ala hmăng hmưi ASEAN srăng mâo dŭm hdră êlan čiăng mkŏ mjing klei ngă bruă kyua phung mniê, klei êđăp ênang, leh anăn hơĭt kjăp (RAP) hŏng dŭm mta kñăm, bruă ngă klă klơ̆ng.

Pô mblang: Y-Ƀel Êban