Klei kƀĭn trông mâo akŏ “Kyua klei đĭ kyar kjăp leh anăn kluôm” hŏng klei nao hgŭm mơ̆ng êbeh 60 alŭ wăl 2 ala čar mbĭt hŏng dŭm êpul hgŭm bruă, knơ̆ng bruă. Pŏk klei kƀĭn, Khua bruă Đảng ƀuôn prŏng Hà Nội Đinh Tiến Dũng brei thâo, truh kơ ară anei mâo êbeh 28 alŭ wăl mơ̆ng Prăng leh anăn 18 čar, ƀuôn prŏng mơ̆ng Việt Nam nao hgŭm bi mguôp, hŏng 240 hdră mkăp plah wah dŭm alŭ wăl 2 ala čar hlăm dŭ mta bruă msĕ si bruă mdrao mgŭn, mtô mjuăt bi hriăm, kriê pioh ngăn dŏ, êpul êya klei blŭ, mđĭ kyar krĭng ƀuôn sang, đĭ kyar kjăp…

Blŭ hrăm hlăm klei kƀĭn trông, k’iăng Khua knŭk kna Trần Lưu Quang yap yuôm bhăn akŏ klei kƀĭn “Bi mguôp plah wah dŭm alŭ wăl, boh kdrŭt mtrŭt mđĭ klei krŭ wĭt, đĭ kyar kjăp leh anăn kluôm dhuôm wưng êdei klei ruă tưp Covid-19”, pah mni Hà Nội mâo klei klei kčĕ mkŏ mjing klei kƀĭn tŭ dưn anei. Anei jing sa hlăm dŭm mbah yuôm bhăn kñăm mtrŭt mđĭ klei bi mguôp plah wah dŭm alŭ wăl leh anăn mjĕ êrô mnuih ƀuôn sang 2 ala čar.