Khua bruă Đảng đoàn Bruă Kƀĭn Ala, Khua bruă kƀĭn ala Trần Thanh Mẫn leh anăn Êpul khua bruă Đảng knŭk kna, Khua knŭk kna Phạm Minh Chính hrăm mbĭt gĭt gai klei kƀĭn. Blŭ pŏk klei bi kƀĭn, Khua bruă kƀĭn ala Trần Thanh Mẫn brei thâo, klei kƀĭn tal 8 mâo lu mta phŭn hĭn hlăm dŭm gưl kƀĭn mơ̆ng akŏ wưng păn bruă Bruă Kƀĭn Ala gưl 15 truh kơ ară anei.

Bruă Kƀĭn Ala ksiêm dlăng 39 mta phŭn, hlăm anăn mâo 29 mta phŭn hlăm bruă mkŏ mjing hdră bhiăn, 10 mta phŭn kơ bruă duh mkra ala ƀuôn, ngăn prăk knŭk kna, ktuê dlăng, bruă mnuih mă bruă leh anăn dŭm boh klei mkăn. Mĭn tĭng, gưl kƀĭn tal 8 mphŭn pŏk hlăm hruê 21/10 leh anăn mkŏ mjing hlăm 29 hruê, dưi mbha jing dua gưl. Khua Bruă Kƀĭn Ala lač, klei kƀĭn trông dưi mkŏ mjing êlâo kơ klei kƀĭn sa mlan čiăng kơ dŭm anôk bruă čih mkra, bi klă mâo mmông hluê ngă djŏ hdră bhiăn, mbĭt anăn čiăng bi trông, tŭ ư kơ mta phŭn hdră klei kƀĭn tal 8.