VOV4.Êđê - Hruê mbruê 14/4, êpul khua bruă Đảng čar Gia Lai mkŏ mjing leh klei kƀĭn trông gưl tal 7 (pŏk phai). Hluê si klei čih yap hlăm klei kƀĭn, boh sĭt bruă duh mkra ala ƀuôn wưng tlâo mlan tal 1 thŭn 2022 ti čar Gia Lai mâo lu klei bi knăl krŭ wĭt, đĭ kyar. Klă klơ̆ng, klei đĭ kyar GRDP đăo knăl mâo êbeh 7%, prăk knŭk kna hrui wĭt mâo êbeh 1.660 êklai prăk, hnơ̆ng klei mnia mblei hlăm wưng tlâo mlan tal 1 mâo 200 êklăk USD, đĭ 25% mkă hŏng wưng anei thŭn dih.

Dŭm klei đih kyar hlăm mnơ̆ng dhơ̆ng bruă tuh tia, čhĭ hliê mnơ̆ng dhơ̆ng ăt mâo klei đĭ mkă hŏng wưng anei thŭn dih. Klei kƀĭn bi tŭ ư, hlăm hruê mmông kơ anăp, čar srăng kñăm hluê ngă dŭm hdră êlan mkŏ mjing klei găl čiăng krŭ wĭt, mđĭ kyar bruă duh mkra, rơ̆ng hơĭt klei hdĭp yang ƀuôn, ktang phĭt mkŏ wĭt bruă lŏ hma hluê êlan mlih ana kyâo pla mjing, dưn yua kdrăp mrâo mrang, mtrŭt mđĭ bruă mkŏ mkra krĭng ƀuôn sang mrâo hluê êlan êlam hĭn, mâo boh tŭ hĭn. Mđĭ hĭn bruă ksiêm dlăng klei yua lăn, đru kơ knơ̆ng bruă bi hmar bruă duh bi liê, mlih mrâo klei ngă hră mơar knŭk kna.

Y-Ƀel pô mblang