VOV4.Êđê- Tlam mbruê 3/10, ti Hà Nội, Phŭn bruă tuh tia bi mguôp hŏng êpul hgŭm knơ̆ng bruă Ơrôp ti Việt Nam mkŏ mjing klei kƀĭn bruă klei mrâo hưn kơ klei kƀĭn trông gưl dlông leh anăn rang mdah bruă duh mkra mtah 2022. Mkŏ mjing mơ̆ng hruê 28-30/11 ti ƀuôn prŏng Hồ Chí Minh, klei kƀĭn anei mâo boh tŭ yuôm bhăn hlăm bruă hluê ngă tŭ jing dŭm klei kčĕ đĭ kyar kjăp, djŏ guôp hŏng klei kluôl kă 2 tĭng Việt Nam leh anăn Êpul hgŭm Ơrôp, đru hluê ngă hdră ala čar kơ klei mđĭ kyar mtah ti Việt Nam. Klei rang mdah bruă duh mkra mtah srăng hưn mdah, rang mdah dŭm mta kdrăp mrâo mrang, mnơ̆ng dhơ̆ng hnơ̆ng tŭ jăk, klei kčĕ leh anăn klei bi hmô bruă duh mkra mtah, bruă duh mkra dar mơ̆ng dŭm knơ̆ng bruă Ơrôp leh anăn Việt Nam. Êngao kơ anăn, dŭm klei kƀĭn leh anăn klei bi trông hlăm klei rang mdah jing tur knơ̆ng mđĭ hĭn klei bi mguôp plah wah êpul êya dŭm knơ̆ng bruă Ơrôp leh anăn Việt Nam, đru mtrŭt mđĭ sa bruă duh mkra mtah, kjăp hlăm bruă kah mbha klei thâo, klei mĭn leh anăn kdrăp mrâo mrang.

Pô mblang: Y-Ƀel Êban