VOV4.Êđê - Aguah mbruê 14/10, ti anôk bruă Đảng gưl dlông, Khua gĭt gai Đảng Nguyễn Phú Trọng gĭt gai leh anăn mâo klei blŭ yuôm bhăn hlăm klei kƀĭn trông hluê ngă hdră mtrŭn mơ̆ng phŭn bruă kđi čar kơ bruă mđĭ kyar krĭng Lăn Dăp Kngư truh ti thŭn 2030, hdră tă truh ti thŭn 2045. Krĭng Lăn Dăp Kngư mâo 5 čar jing: Kon Tum, Gia Lai, Dak Lak, Dak Nông leh anăn Lâm Đồng, jing anôk hdĭp mda mơ̆ng giăm 6 êklăk čô mơ̆ng 53 hlăm 53 djuê ana hlăm kluôm ala.

Blŭ gĭt gai klei kƀĭn, Khua gĭt gai Đảng mñă klă: Krĭng Lăn Dăp Kngư jing alŭ wăl hdră êlan yuôm bhăn kơ bruă duh mkra, yang ƀuôn, wăl hdĭp mda, bruă lĭng kahan leh anăn bruă hŏng tač êngao hlăm kluôm ala. Mđĭ kyar krĭng Lăn Dăp Kngư hmar leh anăn kjăp jing hdră êlan prŏng mơ̆ng Đảng, knŭk kna leh anăn jing bruă klam kñăm hlăm ala čar. Mkŏ mjing leh anăn mđĭ kyar kjăp krĭng Lăn Dăp Kngư srăng mâo klei bi mguôp mtăp mđơr plah wah mđĭ kyar bruă duh mkra, dhar kreh leh anăn yang ƀuôn, răng mgang wăl hdĭp mda, nao mbĭt hŏng bruă rơ̆ng klei êđăp ênang, bruă lĭng kahan leh anăn mđĭ hĭn bruă hŏng tač êngao. Mă klei đĭ kyar bruă duh mkra, ala ƀuôn, dhar kreh jing tur knơ̆ng kơ bruă rơ̆ng klei êđăp ênang bruă kđi čar, yang ƀuôn.

VOV TâyNguyên/Pô mblang: Y-Ƀel Êban