VOV4.Êđê - Knhal jih mlan 8 mrâo êgao, Êpul hgŭm phung hđeh êdam êra čar Dak Lak mkŏ mjing leh klei kƀĭn Klei hmăng hmưi Hđeh êdam êra. Hlăm klei kƀĭn, phung hđeh êdam êra mâo leh klei bi trông klă nik kơ lu boh klei djŏ tuôm hŏng klei čô̆ kơ bruă leh anăn dŭm mta phŭn djŏ tuôm hlăm bruă mđĭ kyar, bi mguôp, bi kƀĭn hđeh êdam êra.

Ti anôk bi kƀĭn, phung đoàn viên êdam êra bi trông leh kơ lu mta bruă msĕ si: Hưn mthâo dŭm gru hmô jăk, hdră ngă tŭ dưn, mrâo mơ̆ng phung êdam êra ti grăp alŭ wăl, êpul êya đru mguôp kkuh m’ak tŭ jing Klei bi kƀĭn prŏng bruă Đoàn dŭm gưl. Bi êdah klei čang hmăng, gưl êdam êra êlâo, hlăm lehanăn êdei kơ Klei bi kƀĭn prŏng bruă Đoàn dŭm gưl lehanăn êlâo kơ Klei bi kƀĭn prŏng bruă Đoàn kluôm čar lehanăn kluôm ala čar tal 12, wưng thŭn 2022 – 2027. Hưn lač klei mĭn mơ̆ng grăp čô kơ bruă klam mơ̆ng phung êdam êra hlăm ênuk gưl mrâo.

Phung bi ala lač klă: Hlăm wưng êgao, bruă mđĭ kyar êpul bruă đoàn, êpul ti dŭm alŭ wăl mâo leh klei mđing dlăng, êpul bruă đoàn bi êdah leh klă bruă klam hlăm hdră mă bruă mơ̆ng êpul lehanăn alŭ wăl, bi êdah klei ba anăp mơ̆ng phung êdam êra. Khă snăn, ti dŭm alŭ wăl, bruă bi hgŭm, iêu jak phung êdam êra dôk êdu kƀah, hdră bruă đoàn ka kjăp, ka dưi mđĭ lar boh tŭ dưn hlăm bruă jak iêu phung êdam êra nao hgŭm. Ayŏng Nguyễn Văn Thành, ti alŭ 7, să Êa Kiêt, kdriêk Čư̆ Mgar hưn lač snei:Phung đoàn viên êdam êra hlăm ƀuôn thŭn lu ƀiă amâo lŏ nao hgŭm ôh, bi phung dôk hlăm gưl thŭn hriăm hră m’ar snăn knŏng mâo mă ƀiă phung hđeh nao hgŭm, pô nao jak ăt dleh dlan mơh. Ară anei iêu jak diñu hŏng loa kčaĭ asăp amâo dah Facebook, pô nao bi tuôm dlăng diñu m’ak mơh ƀiădah ênoh nao hgŭm hlăm hdră bruă anei amâo lu ôh.

Ti anăp klei anei, lu phung đoàn viên êdam êra ăt hưn mdah bruă ngă tŭ dưn ti êpul êya pô. Hluê anăn, čiăng kơ bruă bi hgŭm, jak iêu phung êdam êra ba wĭt klei tŭ dưn snăn brei drei thâo săng klă klei čiăng mơ̆ng phung đoàn viên êdam êra, thâo ya klei diñu čiăng tơdah nao hgŭm hlăm êpul bruă đoàn. Boh sĭt, ară anei kyua hdră duh mkra, êpul đoàn viên êdam êra bi nao mă bruă kbưi lu snăk ăt hmăi truh kơ bruă jak iêu phung êdam êra mđĭ lar hdră bruă đoàn, êpul ti alŭ wăl pô dôk. Kyua anăn, lu phung bi ala lač, čiăng jak iêu phung êdam êra, brei bi mguôp hdră bruă đoàn hŏng hdră mphŭn čô̆ kơ bruă lehanăn mđĭ kyar hdră duh mkra ti alŭ wăl. Ayŏng Lê Công Nhận, ti alŭ Tân Tiến, să Êa Ana, kdriêk Krông Ana brei thâo snei:Čang kơ hdră bruă êdam êra ti alŭ wăl đĭ kyar ktang brei drei mđĭ kyar hdră mphŭn čô̆ kơ bruă, si srăng ngă čiăng kơ phung êdam êra hgŭm kngan mkŏ mkra ƀuôn sang, mđĭ kyar bruă duh mkra gŏ sang, alŭ wăl kjăp ktang. Čiăng mđĭ kyar bruă duh mkra, brei drei mâo dŭm gru hmô, grăp alŭ wăl, drei duh kơ sa čô mnuih, đru kơ diñu, leh diñu tŭ jing snăn srăng lar bra hdră anei kơ phung đoàn viên, êdam êra mkăn, mơ̆ng anăn srăng mjing hdră duh mkra kluôm./.

H’Nêč pô mblang