VOV4.Êđê- Aguah mbruê, ti anôk bruă knŭk kna, êpul gĭt gai mơ̆ng ala čar kơ bruă gang mkhư̆ klei truh yan adiê bi mguôp hŏng Dhar bruă gĭt gai ala čar bi mdrơ̆ng hŏng klei truh yan adiê leh anăn tui duah đru dŏng mkŏ mjing klei kƀĭn trông kluôm ala kơ bruă gang mkhư̆ klei truh yan adiê leh anăn tui duah đru dŏng thŭn 2022. K’iăng Khua knŭk kna Lê Văn Thành, gĭt gai klei kƀĭn anei.

Blŭ pŏk klei kƀĭn, Khua phŭn bruă lŏ hma leh anăn mđĭ kyar krĭng ƀuôn sang Lê Minh Hoan, k’iăng khua êpul ngă bruă brei thâo, thŭn 2021, khădah dŭm ala čar dlông rŏng lăn mâo klei gĭr ktưn jih ai bi mdrơ̆ng, ƀiădah klei truh yan adiê ngă leh kơ 16.000 čô djiê, luč amâo thâo ƀuh, hmăi êbeh 340 êklai USD kơ bruă duh mkra leh anăn hmăi truh kơ djăp mta bruă hlăm klei hdĭp, bruă duh mkra ala ƀuôn lu ala čar, alŭ wăl. Hluê si klei bi klă mơ̆ng anôk bruă đăo knăl yan adiê ala čar, thŭn 2022 năng ai srăng mâo klei angĭn êbŭ mklăk hŏng hdră bhiăn hŏng hlăm brô mơ̆ng 10 – 12 gưl angĭn êbŭ leh anăn hjan hlĭm ti alŭ wăl krĭng ksĭ Ngŏ. Hlăm boh sĭt klei truh yan adiê mơ̆ng akŏ thŭn truh kơ ară anei dưi ƀuh, klei truh yan adiê thŭn 2022 srăng dleh dưi ksiêm dlăng.

Pô mblang: Y-Ƀel Êban