VOV4.Êđê- Tlam mbruê, ti Hà Nội mkŏ mjing leh klei kƀĭn trông kơ bruă bi mguôp plah wah Khua lăn čar hŏng Dhar bruă gĭt gai bruă kƀĭn ala. Klei kƀĭn bi tŭ ư ksiêm wĭt hlăm hruê mmông êgao, boh nik hlăm wưng păn bruă kƀĭn ala gưl 13, 14 leh anăn mơ̆ng akŏ wưng păn bruă kƀĭn ala gưl 15 truh kơ ară anei, klei bi mguôp plah wah Khua lăn čar hŏng bruă kƀĭn ala, dhar bruă gĭt gai bruă kƀĭn ala mâo nanao klei mđĭ, ƀrư̆ hruê brư̆ klă hĭn leh anăn mâo boh tŭ jăk, kluôm ênŭm hlăm klei ngă bruă.

Bi kơ bruă klam hlăm hruê mmông kơ anăp, Khua lăn čar Nguyễn Xuân Phúc lŏ bơ̆k bâo klei gĭt gai yuôm bhăn mơ̆ng Khua gĭt gai Đảng Nguyễn Phú Trọng hlăm klei kčưm pŏk klei kƀĭn tal 1, bruă kƀĭn ala gưl 15, hlăm anăn mñă kơ bruă kƀĭn ala čiăng bi lar ktang hĭn bruă klam pô hlăm bruă mkŏ mjing hdră klei bhiăn kơ dŭm bruă ngă hlăm ala čar, đru kơ bruă klam mđĭ kyar bruă duh mkra, ala ƀuôn, rơ̆ng bruă lĭng kahan, bruă hŏng tač êngao.

        Pô mblang: Y-Ƀel Êban