VOV4.Êđê - Bri wưng bi hdơr 50 thŭn klei dưi Đăk Tô – Tân Cảnh, aguah mbruê 22/4, phŭn bruă lĭng kahan gĭt gai klei kƀĭn hŏng bruă Đảng čar Kon Tum mkŏ mjing klei kƀĭn trông kreh knhâo hŏng akŏ: “Klei dưi Đăk Tô, Tân Cảnh- klei yuôm bhăn hƀuê ênuk leh anăn klei hriăm”.

 Hŏng êbeh 80 klei hưn mdah, klei ksiêm ksiêm êmuh dưi bi êdah klă hdră mnêč, klei ngă mơ̆ng Mi leh anăn knŭk kna Sài Gòn. Ai dưi leh anăn klei găl mơ̆ng klei krŭ kdơ̆ng krĭng Dhŭng leh anăn mta kñăm ngă klei krŭ kdơ̆ng mâo klei dưi bi rai dŭm mta bruă hlăm hdră “Việt Nam mjing klei bi blah”. Klei kƀĭn trông đru bi klă mngač, bi êlam hĭn dŭm klei hlăk mblang leh anăn boh sĭt mdưm hlăm klei bi blah Đăk Tô – Tân Cảnh. Anei jing tur knơ̆ng klei kreh knhâo čiăng dưn yua hlăm bruă lĭng kahan, đru hlăm bruă mkŏ mjing leh anăn răng mgang ala čar hlăm wưng mrâo. Mbĭt anăn lŏ đru mtô mjuăt knhuah gru klei krŭ kdơ̆ng, bi mbŏ ai tiê khăp kơ ala čar kơ phung knuă druh, lĭng kahan leh anăn mnuih ƀuôn sang.

Y-Bel pô mblang