VOV4.Êđê- Hruê 16/8, ti ƀuôn prŏng Hồ Chí Minh, Khua hlăm Phŭn bruă kđi čar, Khua lăn čar Nguyễn Xuân Phúc, Khua Anôk bruă gĭt gai mkŏ mjing “Hdră ksiêm wĭt Hdră mtrŭn gưl dlông tal 8 gưl Xi kơ Hdră bruă răng mgang čar kwar hlăm boh klei mrâo gĭt gai Klei bi kƀĭn reh knhâo “Ksiêm hriăm - boh sĭt kơ răng mgang čar kwar hlăm boh klei mrâo”. Khua lăn čar tŭ ư, bi mni kơ phung bi ala mâo leh lu klei blŭ yuôm bhăn kreh knhâo, bi mklă lu boh phŭn yuôm bhăn hŏng bruă klam răng mgang čar kwar.

 Mbĭt anăn bi mklă klei kluôm dhuôm mơ̆ng Hdră mtrŭn gưl dlông 8 tal XI, djŏ klă mơ̆ng lu hdră mtrŭn, kei klah čŭn mơ̆ng Đảng, đru kơ bruă răng mgang čar kwar hlăm boh klei mrâo hlăm wưng êgao mâo lu klei tŭ dưn yuôm bhăn. Khua lăn čar lač hŏng phung bi ala, brei mđĭ ktang klei bi hgŭn, hlăm anăn mđĭ ai tiê mnuih ƀuôn sang čiăng răng mgang čar kwar yang ƀuôn ngă phŭn dưi dlăng jing hdră msir tur knơ̆ng yuôm bhăn, jing sa hlăm dŭm bruă klam phŭn, mjêč čiăng răng mgang čar kwar ară anei./.

Pô mblang: H’Zawut Ƀuôn Yă