VOV4.Êđê - Aguah hruê 28/3, ti Quảng Ninh, Êpul hgŭm bruă hlak mblang gưl dlông, Anôk bruă Hră klei mrâo Cộng sản lehanăn bruă Đảng čar Quảng Ninh bi hgŭm mkŏ mjing Klei kƀĭn trông kreh knhâo gưl ala čar: “Ai dưi, klei mâo lehanăn boh kdrŭt kơ hdră krŭ wĭt, mđĭ kyar bruă duh mkra ala ƀuôn hlăm wưng hdĭp êđăp ênang, ksiêm dlăng tŭ dưn klei ruă Covid 19 – Hnơ̆ng trah dlăng ala čar lehanăn bruă ngă mơ̆ng alŭ wăl”. Blŭ ti knăm anei, Nguyễn Xuân Thắng, Khua Êpul hgŭm bruă hlak mblang gưl dlông hưn mdah leh hdră bi mjĕ mrâo hlăm bruă iêu mtrŭt lehanăn ba yua tŭ dưn djăp klei mâo, bi mklă boh kdrŭt mrâo kơ hdră krŭ wĭt – mđĭ kyar bruă duh mkra – ala ƀuôn.

Phung bi ala hlak mblang leh kơ bruă ba yua dŭm klei găl mâo klă klơ̆ng msĕ si ngăn prăk knŭk kna, lăn ala, mnuih mă bruă; klei bhiăn mđĭ kyar bruă kreh knhâo, kdrăp mrâo lehanăn bi mlih mrâo; hdră mtrŭn bruă ngăn prăk, klei găl mâo hlăm yang ƀuôn; rơ̆ng hdră đru kơ yang ƀuôn;  bruă dhar kreh, klei thâo ba yua kdrăp mrâo lehanăn mđĭ hĭn klei bi hgŭm plah wah dŭm hdră duh mkra; lŏ krŭ wĭt bruă hiu čhưn ênguê, mđĭ boh tŭ bruă kriê dlăng ti alŭ wăl, mđĭ lar klei găl mâo, ai ktang mơ̆ng krĭng wăl êngao knŭk kna./.

H’Nêč pô mblang