VOV4.Êđê - Hruê mbruê 16/9, bruă sang čư êa čar Dak Nông mkŏ mjing leh klei kƀĭn trông kreh knhâo mă klei blŭ bi mguôp kơ hdră čuăl mkă čar Dak Nông wưng thŭn 2021 -2030, hdră tă truh ti thŭn 2050, hŏng klei nao hgŭm mơ̆ng lu phung thơ̆ng kơ bruă, knơ̆ng bruă đru kčĕ mơ̆ng ala tač êngao, pô bi ala dŭm êpul grŭp prŏng.

Hlăm klei kƀĭn, phung bi ala mâo leh klei hlăk mblang, đru mguôp boh blŭ čiăng kơ čar Dak Nông thâo klă dŭm klei dôk mâo leh anăn ba mdah dŭm hdră êlan brei čar bi lar, dưn yua mâo boh tŭ dŭm klei găl, ai ktang, mkŏ mjing klei kdlưn hĭn hlăm klei mđĭ kyar bruă duh mkra ala ƀuôn. Hluê si nai prĭn Nguyễn Trọng Uyên, khua kiă kriê hđăp anôk bruă čuăl mkă leh anăn tă hdră bruă lŏ hma, sa hlăm dŭm boh klei kñăm hlăm klei čuăl mkă anei jing Dak Nông srăng bi lar dŭm klei mdê hĭn, klei găl pô. Klei mdê mơ̆ng čar jing mâo hnơ̆ng bosit lu hĭn hlăm dlông rŏng lăn, mâo yan adiê êđăp, mâo war kriê pioh mnơ̆ng hlăm gŭ lăn UNESCO, leh anăn jing băng bhă mkŏ krĭng Lăn Dăp Kngư hŏng krĭng Ngŏ Dhŭng, jing dŭm klei găl čiăng kơ čar đĭ kyar ktang kơ bruă mă mnơ̆ng gŭ lăn leh anăn bruă hiu čhưn ênguê.

Y-Ƀel pô mblang