Hlăm hruê mă bruă tal 1, Klei kƀĭn hmư̆ klei hưn mdah mơ̆ng Êpul khua gĭt gai gưl dlông Êpul hgŭm ƀĭng ngă lŏ hma Việt Nam gưl 7, hmư̆ hră hưn mdah kơ bruă mkra mlih, bi mbŏ hdră bhiăn Êpul hgŭm ƀĭng ngă lŏ hma Việt Nam leh anăn hdră mkăp kơ hdră bhiăn Êpul hgŭm ƀĭng ngă lŏ hma Việt Nam mkra mlih, hmư̆ klei hưn Bi klă bruă mkŏ mjing dŭm anôk bruă bi trông leh anăn mtô kơ klei bi trông. Hruê mă bruă tal êlâo hŏng lu mta bruă yuôm bhăn mâo: Ruah êpul khua kiă kriê, êpul čih hră, bi klă bruă klam phung bi ala, hưn mdah boh tŭ ksiêm dlăng bruă klam phung bi ala, ngă klei bi klă hdră mă bruă mơ̆ng klei kƀĭn trông.

Êlâo kơ mŭt hlăm gưl mă bruă tal 1, Khua kiă kriê êpul hgŭm ƀĭng ngă lŏ hma Việt Nam Lương Quốc Đoàn ba anăp êpul bi ala nao hgŭm hlăm klei kƀĭn trông dưm kwang mnga ti msat khua gĭt gai Hồ Chí Minh, myơr brui mngưi bi hdơr kơ phung jhŏng ktang, djiê êngiă ti knưng bi hdơr Bắc Sơn, Ba Đình, Hà Nội