VOV4.Êđê- Mbĭt hŏng bruă klam răng mgang kdriêl knông lăn êbeh 141 km bi knông hŏng čar Mondulkiri, ala mtao Campuchia, lĭng kahan răng mgang knông lăn čar Dak Nông mâo leh lu hdră bruă hlăm yang ƀuôn tŭ dưn. Amâo djŏ knŏng nao hgŭm mkŏ mkra anôk bruă kđi čar ti 7 să knông lăn, đru kơ mnuih ƀuôn sang mđĭ kyar bruă duh mkra – ala ƀuôn, lĭng kahan răng mgang knông lăn čar Dak Nông lŏ ngă jăk hdră bruă hŏng tač êngao, đru ksŭl mbŭ klei bi mjĕ jăk siam, hgŭm bruă plah wah dua ala čar.

Adiê lĕ mmăt, yang hruê lĕ leh ti tluôn čŏng čư̆ ti nah knông lăn Campuchia, Đại úy Tôn Đức Thái khua bruă kđi čar ti kđông kahan ƀăng jang knông lăn Thuận An, lĭng kahan knông lăn čar Dak Nông mbĭt hŏng đa đa phung lĭng kahan lŏ ksiêm dlăng knhal tuč 2 bruă mkŏ mkra, rŭ mdơ̆ng Sang bi mguôp čiăng hmao mđup brei hlăm mlan 6/2022. Anăn jing hnư mnơ̆ng mơ̆ng lĭng kahan knông lăn čar Dak Nông leh anăn Dhar bruă mặt trận čar mđup brei kơ gŏ sang Y-Sa Ly Môn leh anăn gŏ sang aduôn H’Piơk, jing 2 gŏ sang ƀun ƀin mnuih djuê ana Mnông ti ƀuôn Sar Pa, să Thuận An, kdriêk Dak Mĭl. Mbĭt hŏng 100 êklăk prăk mơ̆ng 2 anôk bruă mkăp brei, phung knuă druh, lĭnh kahan ƀăng jang knông lăn Thuận An, keh prăk kyua mnuih ƀun ƀin să Thuận An lŏ đru mguôp 15 êklăk prăk leh anăn bi mguôp hruê ai đru kơ 2 gŏ sang rŭ mdơ̆ng sang dôk. Đại úy Tôn Đức Thái brei thâo, êngao kơ bruă rŭ mdơ̆ng sang dôk, anôk bruă ăt dôk mâo lu bruă mâo boh tŭ yuôm bhăn mkăn.

            “Boh nik, hlăm dŭm thŭn êgao, hluê ngă hdră êlan mơ̆ng lĭng kahan knông lăn, anôk bruă ngă leh bruă đru rông ba lu hđeh sang hră hlăm alŭ wăl. Hŏng klei đru mguôp prăk mlan mơ̆ng phung knuă druh, lĭng kahan čiăng đru kơ phung hđeh sang hră, hlăm anăn mă rông 1 čô leh anăn đru rông 6 čô hđeh. Anok bruă ăt bi mguôp hŏng dŭm dhar bruă, êpul êya hluê ngă dŭm klei bi hmô đru kơ mnuih ƀuôn sang lăm lui klei ư̆ êpa, bi hrŏ klei ƀun knap, msĕ si hdră “êmô mjeh kơ mnuih ƀun ƀin”, “Rông bê brei êđai”, mkŏ mjing klei găl kơ mnuih ƀuôn sang mđĭ kyar klei hdĭp mda, bi hơĭt klei hdĭp, gĭr ktưn tlaih mơ̆ng klei knap mñai.

            Hluê ngă bruă klam hlăm alŭ wăl, hlăm dŭm thŭn êgao, kđông kahan ƀăng jang knông lăn Thuận An hluê ngă leh hdră mkŏ mjing anôk bruă kđi čar ti alŭ wăl, đru mkŏ mjing gưl bruă alŭ ƀuôn, êpul kriê dlăng dŭm alŭ ƀuôn kjăp ktang, đru hlăm klei đĭ kyar bruă duh mkra – ala ƀuôn. Klă klơ̆ng, anôk bruă tiŏ nao leh sa čô hgŭm hlăm bruă Đảng nah gŭ, ară anei jing khua êpul Klei bhiăn êpul gơ̆ng bruă ƀuôn sang să Thuận An, 10 čô đảng viên ngă bruă hlăm alŭ, ƀuôn, 37 čô đru bruă kơ dŭm gŏ sang.

            Thượng tá Phan Quốc Tuấn – Khua kiă kriê kđông kahan ƀăng jang knông lăn Thuận An brei thâo, hlăm dŭm thŭn êgao, anôk bruă mâo nanao klei uêñ mĭn kơ bruă ƀuôn sang. Mâo klei đrŭ kčĕ hŏng gưl bruă Đảng nah gŭ, bruă sang čư êa, êpul êya bruă Đảng mơ̆ng kdriêk, bruă sang čư êa kdriêk Dak Mil, mbĭt hŏng dŭm êpul kahan ksiêm, lĭng kahan knông lăn…nao čuă leh anăn mđup brei hnư mnơ̆ng kơ mnuih ƀuôn sang leh anăn êpul răng ngang knông lăn čar Mondulkiri, Campuchia. Mrâo anei, êpul knuă druh kdriêk Dak Mĭl mbĭt hŏng lĭng kahan knông anăn mâo leh klei nao čuă leh anăn hơêč hmưi knăm knhuah gru Chol Chham Thmay ti kdriêk Pechr Chenda, čar Mondulkiri. Kđông kahan mkŏ mjing nanao klei găl kơ mnuih ƀuôn sang alŭ wăl knông lăn, lu hĭn jing 2 ƀuôn Sar Pa leh ană Bu Dak, să Thuận An nao čuă găp djuê ti să Bu Sa Ra, kdriêk Pechr Chenda, čar Mondulkiri, ala mtao Campuchia. 

“Knŏng ti alŭ wăl să Thuận An mâo leh êbeh 150 gŏ sang mâo găp djuê kơ dih. Mnuih ƀuôn sang kreh găn êrô, wăt kơ drei nao ti dih leh anăn diñu hriê tinei hlăm dŭm wưng mâo dŭm mta knăm, thŭn mrâo mơ̆ng dŭm gŏ sang. Anôk bruă ăt mkŏ mjing klei găl, mtô lač, hâo hưn čiăng kơ mnuih ƀuôn sang găn êrô djŏ hŏng klei bhiăn ala čar, mkŏ mjing klei mjĕ giăm kjăp pla wah mnuih ƀuôn sang 2 tĭng. Hluê anăn ăt ngă jăk bruă răng mgang knông lăn. Hŏng mnuih ƀuôn sang, hmei ăt dưi mâo lu klei hâo hưn đru kơ bruă răng mgang knông lăn mơ̆ng anôk bruă”.

Lĭng kahan knông lăn bi hgŭm hŏng bruă sang čư̆ êa mđup brei sang klei khăp kơ gŏ sang H’Piơk

Čar Dak Nông mâo êlan knông lăn hŏng boh taih êbeh 141 km, bi knông hŏng čar Mondulkiri, ala mtao Campuchia. Alŭ wăl mdưm kahan mơ̆ng lĭng kahan knông lăn mâo boh taih găn 7 să knông lăn, hŏng 32 djuê ana hdĭp mda hlăm 4 kdriêk bi knông hŏng alŭ wăl 4 să hlăm 2 kdriêk Pet Chăn Đa leh anăn Ô Răng ti čar Mondulkiri, ala mtao Campuchia.

Knơ̆ng gĭt gai lĭng kahan knông lăn čar Dak Nông mâo lu klei kčĕ kơ bruă Đảng čar, bruă sang čư êa hluê ngă jăk bruă hŏng tač êngao mơ̆ng mnuih ƀuôn sang, bruă tač êngao mơ̆ng lĭng kahan. Wưng klei ruă tưp Covid-19 dlei dưi ksiêm dlăng, čar Dak Nông mkŏ mjing leh lu êpul nao čuă, mđup brei hnư mnơ̆ng, hlăm anăn mâo mnơ̆ng ƀơ̆ng huă, kdrăp yua bruă mdrao mgŭn gang mkhư̆ klei ruă tưp Covid-19. Mrâo anei hĭn, leh klei ruă tưp Covid-19 dưi ksiêm dlăng, lu êpul ngă bruă mơ̆ng čar Dak Nông nao čuă čar Mondulkiri leh anăn hơêč hmưi knăm knhuah gru Chol Chham Thmay. Hluê si Đại tá Phan Quý Vỹ, k’iăng khua bruă kđi čar ti knơ̆ng gĭt gai lĭng kahan knông lăn čar Dak Nông, bruă hŏng tač êngao đru mguôp leh sa kdrêč yuôm bhăn hlăm bruă bi mbŏ klei mjĕ giăm, klei bi mguôp plah wah 2 ala čar leh anăn wăt kơ 2 čar Dak Nông leh anăn Mondulkiri, boh nik lŏ hyuă kjăp hĭn klei bi mguôp mơ̆ng, mnuih ƀuôn sang 2 ala čar ti krĭng knông lăn.

“Ară anei dôk ngă hdră mjĕ mjing dŭm kđông kahan knông lăn hŏng dŭm anôk bruă lĭng kahan mơ̆ng Campuchia, leh anăn dôk mtrŭt mjhar bruă mjĕ mjing plah wah dŭm ƀuôn 2 tĭng knông lăn. Bruă Đảng čar mâo leh klei gĭt gai leh anăn bruă sang čư êa čar ăt mâo leh hdră êlan, dŭm kdriêk knông lăn leh anăn dŭm kđông kahan knông lăn dôk hluê ngă. Hluê anăn dưi bi kjăp hĭn klei mjĕ giăm mơ̆ng mnuih ƀuôn sang 2 tĭng knông lăn. Mbĭt anăn bi klă hdră đru kơ mah jiăng hlăm bruă mđĭ kyar klei duh mkra – ala ƀuôn, dhar kreh – mtô bi hriăm. Msĕ si hdră “đru adei nao sang hră”, Lĭng kahan knông lăn čar Dak Nông đru kơ 12 čô hđeh sang hră ti Campuchia grăp mlan 500 êbâo prăk, leh anăn đru rông ba diñu êla truh kơ hriăm jih gưl 3. Hlăm klei mjĕ mjing srăng dưi mtô mjuăt knuah gru, sa ai ktang, sa ai tiê 2 tĭng čiăng dưi răng mgang klei dưi kiă kriê, klei êđăp ênang knông lăn 2 ala čar, bi hgŭm, bi mguôp mđĭ kyar.

Pô mblang: Y-Ƀel Êban