VOV4.Êđê - Tlam mbrue (4/4), Klei knŭk kna bi kƀĭn kơ tuôr mlan 3 lŏ dơ̆ng hlăm bruă mkŏ mjing hdră bhiăn. Knŭk kna hmư̆, trông čhai kơ klei akâo mkŏ mjing hdră bhiăn kiă kriê, djă yua ngăn prăk knŭk kna hlăm bruă duh bi liê, kơ bruă duh mkra mnia mblei ti dŭm anôk duh mkra (lŏ mlih mrâo), klei akâo mkŏ mjing hdră bhiăn mđĭ kyar bruă tuh tia, hdră bhiăn mkă dlăng lehanăn mdrao mgŭn, hâo mdah kơ mta mtrŭn čoh cuăn kơ ênhă djă yua lăn hlue si wưng hŏng dŭm alŭ wăl tuh tia mâo ênhă êbeh 500 ha tui si hdră mtrŭn kơ klei kiă kriê alŭ wăl tuh tia. Trông čhai kơ bruă mkŏ mjing hdră bhiăn, phung khua prŏng hlăm knŭk kna bi mngač leh ya mta bruă năng ngă hlăm bruă mkŏ mjing hdră bhiăn, kơ ya mta bruă dôk dleh, klei ka djŏ năng mghaih msir, bi djŏ guôp, mâo klei bi sa hnơ̆ng plah wah dŭm hdră bhiăn... Mjing klei găl djŏ kơ klei hluê nga hdră bhiăn pioh kơ bruă mđĭ kyar. Klah čŭn kơ bruă mkŏ mjing hdră bhiăn, Khua knŭk kna mâo leh klei tŭ ư kơ boh phŭn bruă mkŏ mjing hdră bhiăn, kơ jih jang klei phung khua prŏng hlăm knŭk kna bi êdah leh klei mĭn pô. Khua knŭk kna jao kơ dŭm phŭn dhar bruă djŏ tuôm lŏ kiă kriê mjing hdră êlan mă bruă bi djŏ hŏng klei bhiăn, bi leh jih jang ba mdah kơ bruă kƀĭn ala ksiêm dlăng knhal tuič./.

Y-Khem pô mblang