Lŏ dơ̆ng klei êmuh leh anăn wĭt lač klei êmuh hlăm klei kƀĭn tal 7 mơ̆ng Bruă Kƀĭn Ala, aguah mbruê 5/6, Khua phŭn bruă tuh tia Nguyễn Hồng Diên bi êdah klă phŭn agha bruă tuh tia hlăm lăn čar ka mâo msĕ hŏng klei kñăm jing ai dưi leh ană dŭm hdră êlan iêo mthưr klei duh bi liê mơ̆ng ala tač êngao FDI. Mbĭt anăn, Khua phŭn bruă ăt bi klă dŭm hdră êlan čiăng đru kơ knơ̆ng bruă mnia mblei hlăm wưng kơ anăp mă yua jih hnơ̆ng klei găl mơ̆ng dŭm klei kuôl kă mnia mblei êngiê. Blŭ bi ruê̆ dŭm boh klei hlăm bruă tuh tia, Khua bruă kƀĭn ala Trần Thanh Mẫn mñă klă, gưl êmuh mkŏ mjing hŏng ai êwa hơ̆k mơak, mâo bruă đua klam. Mâo leh 40 gưl čô bi ala êmuh leh anăn 6 čô bi ala bi tăng mgăl. Khua phŭn bruă tuh tia wĭt lač ênŭm dŭm klei êmuh mơ̆ng phung bi ala Bruă Kƀĭn Ala. Hlăm klei ksiêm êmuh, mñă kơ knŭk kna, Khua Phŭn bruă tuh tia leh anăn dŭm Phŭn bruă djŏ tuôm hluê ngă tŭ dưn dŭm hdră êlan, hlăm anăn lŏ dơ̆ng bi ênŭm dŭm hdră bhiăn djŏ tuôm hŏng klei mnia mblei điện tử, răng mgang phung blei ba yua, pŏk mlar, bi lu jơr anôk mnia mblei nao mbĭt hŏng mđĭ hnơ̆ng tŭ jăk mnơ̆ng dhơ̆ng.