Mâo 4 boh klei dưi ba ksiêm êmuh, dôk hlăm klei kriê dlăng mơ̆ng dŭm Phŭn bruă: Mnuih mă bruă, kahan êka êkeh leh anăn yang ƀuôn, Phŭn bruă kreh knhâo leh anăn mrâo mrang, Phŭn bruă êlan klông leh anăn dŭ mdiăng, Dhar bruă djuê ana. Phŭn khua phŭn bruă, khua dhar bruă klam bruă wĭt lač dŭm klei êmuh, 3 čô k’iăng Khua knŭk kna: Lê Minh Khái, Trần Lưu Quang, Trần Hồng Hà, Khua phŭn bruă Ngăn prăn, Khua phŭn bruă hdră êlan leh anăn duh bi liê, Khua phŭn bruă Bruă lŏ hma leh anăn mđĭ kyar krĭng ƀuôn ăt mâo klei wĭt lač, hlăk mblang, bi klă dŭm mta phŭn djŏ tuôm.

Khua bruă kƀĭn ala Vương Đình Huệ bi klă gưl ksiêm êmuh dưi mkŏ mjing êngiê, djŏ hŏng hdră bhiăn, mâo klei uêñ mĭn mơ̆ng phung bi ala leh anăn mnuih ƀuôn sang kluôm ala. Wăt kơ phung khua phŭn bruă mâo lu klei hriăm amâodah mrâo ăt dưi bi êdah klă boh sĭt mơ̆ng dhar bruă leh anăn bruă pô klam ngă, klă mngač, amâo mâo mdêč mdar, dêč đuê̆, wăt kơ dŭm boh klei dleh.