VOV4.Êđê- Hruê 28/2, ti Hà Nội mkŏ mjing leh Knăm siñê klei kuôl kă bi hgŭm bruă bi hrŏ ƀun plah wah Êpul bruă mđĭ kyar Êpul hgŭm lu ala čar UNDP lehanăn Adŭ bruă ala čar kơ bruă bi hrŏ ƀun, Phŭn bruă mnuih ngă bruă - kahan êka êkeh lehanăn yang ƀuôn lehanăn hưn mthâo hdră bruă “Mkŏ mkra hdră lehanăn đru kčĕ kơ hdră mtrŭn bi hrŏ ƀun lu tĭng lehanăn h’ĭt kjăp, wưng thŭn 2021-2023". Hdră anei mđing kơ bruă mjuăt bi hriăm anak mnuih, bruă phŭn jing mkra mđĭ klei thâo mnuih ƀun, bi mklă boh phŭn ngă klei ƀun čiăng msir mghaih jih klei mâo mơ̆ng mnuih ƀun, krĭng ƀun. Blŭ hrăm ti knăm anei, bi ala Êpul bruă mđĭ kyar Êpul hgŭm lu ala čar ti Việt Nam, aduôn Caitlin Wiesen brei thâo: Hluê hŏng hră m’ar bi hdơr hruê anei, UNDP srăng đru kčĕ kơ hdră mtrŭn lehanăn đru kơ hdră kdrăp kơ Phŭn bruă mnuih ngă bruă - kahan êka êkeh lehanăn yang ƀuôn čiăng pŏk mlar dŭm hdră msir mrâo, dưi lông ba yua kñăm bi hrŏ ƀun h’ĭt kjăp wưng thŭn (2021-2025) lehanăn hluê ngă mta kñăm mơ̆ng hdră bruă jing bi hrŏ ênoh gŏ êsei ƀun lehanăn giăm ƀuh dôk mkrah wah hlăm thŭn 2025./.

Pô mblang: H’Nêč Êñuôl