Hruê 26/4/1975, sa sa wưng nao mjêč, nao leh anăn ksŭng mblah mtlaih êngiê alŭ wăl, bi mbŏ êpul êya, 5 êpul kahan phŭn mơ̆ng kahan mtlaih êngiê bi mbha jing 5 êlan mblah sa blư̆ hlăm wăl krah ƀuôn prŏng Sài Gòn – Gia Định. Lĭng kahan hđăp Đoàn Đình Điểu, wĭt bi hdơr: Sư đoàn kahan hàng 968, kahan alŭ wăl 4, ngă bruă klam bi rai kđông mgang mơ̆ng roh ti Đồng Dù ( Củ Chi), mkŏ mjing klei găl kơ lĭng kahan drei ksŭng mblah kluôm ti Sài Gòn. Hruê 29/4, amâo mâo mđing kơ boh ƀom, boh phao mơ̆ng roh, hŏng ai tiê asăn asei kơ lăn čar, ñu leh anăn phung dĭng kna nao êlâo pŏk êlan: Sư Đoàn 968 hmei mâo asăp mtrŭn pŏk 4 êlan bi blah: Nah yŭ, nah dhŭng, ngŏ dhŭng, nah dưr. Hmei kluh nao,hmei klei ƀăng mur kyua dah anôk anăn amâo mâo ana kyâo, nah tluôn jing đang ksu, ti anăp jing kdrăn lŏ…hmei nao 3 blư̆ leh anăn pŏk klei ksŭng mblah.

Lŏ hdơr kơ mnĭt mmông hƀuê ênuk mơ̆ng klei bi blah hlăk êdeh sar 390 mnuh ƀăng jang Sang klei êngiê, kahan hđăp Ngô Sỹ Nguyên, pô mgăt êdeh sar 390 brei thâo: “Klei  bi blah Hồ Chí Minh pral snăk, ba klei tŭ dưn jăk. Ti anôk kñăm phă ngŏ, êpul kâhn 2 hmei mâo 2 boh êdeh sar truh hnưm hĭn jing 843 leh anăn 390, jing 2 boh êdeh mơ̆ng khua êpul Bùi Quang Thận leh anăn Vũ Đăng Toàn. Êdeh sar 390 hmei mnuh êbuh ƀăng jang sang klei êngiê, bi ala kơ klei ktang êpul  lĭng kahan yang ƀuôn Việt Nam mdlưh sa klei gĭt gai, bi ala kơ klei čang hmăng mơ̆ng djuê ana Việt Nam. 21 thŭn bŏ hŏng klei dlan dlan săn asei mâo mnĭt mmông anei.”

Hlăm hruê bi hdơr lăn čar hluh hlir, Hồ Việt Hà, ti kdriêk čar Long Biên, Hà Nội lŏ wĭt hdơr: Kâo hruê tinei hlăm ai êwa hruê 30/4, bi hdơr 50 thŭn mtlaih êngiê Sài Gòn. Kâo pô hriê kơ prŏng hlăm ênuk mblah Mi, leh anăn jing klei dưi răng mgang knông lăn nah Dưr, Nah Dhŭng. Mmông anăn kâo wĭt hdơr tơl čiăng hia. Kâo čiăng lŏ wĭt dlăng klei yuôm bhăn anăn čiăng hlăk mblang: ya ngă Đảng leh anăn Awa Hồ gĭt gai lăn čar pô găn ênuk mblah Prăng, mblah Mi leh anăn mnuih ƀuôn sang mơ̆ng Dưr truh kơ Dhŭng truh kơ ya klei mtlaih êngiê lăn čar”.

Kơ klei ksŭng mblah mơ̆ng dŭm Êpul kahan hlăm klei bi blah Hồ Chí Minh hƀuê ênuk, Đại tướng Phạm Văn Trà, Khua hđăp Khua phŭn bruă lĭng kahan, brei thâo, gưl dlông mbruă, jih ai tiê hlăm klei gĭt gai 5 anôk kñăm mblah. Leh anăn êngao kơ ai ktang lĭng kahan, kđi čar, bruă čung ba mnuih ƀuôn sang mâo lu klei mbruă, ngă kơ phung roh rai răk. “Drei mtlaih êngiê kwar Dhŭng kluôm, mơ̆ng ai ktang jih jang mnuih ƀuôn sang, mơ̆ng ai ktang 3 mta kñăm êpul lĭng kahan jing phŭn. Anei jing klei gĭt gai mơ̆ng Đảng drei, mơ̆ng Phŭn bruă kđi čar kjăp snăk. Klei gĭt gai klă mngač hĭn jing êlâo anăn tơdah Êpul kahan 4 amâo dưi mŭt ôh hlăm Sang Klei êngiê kyua dôk dleh dlan ti Xuân Lộc snăn gĭt gai Êpul kahan 2 găn êa krông Đồng Nai mŭt mtam. Leh Dương Văn Minh hưn amâo dưi,  jih mnuih ƀuôn sang kwar Dhŭng kgŭ kdơ̆ng hŏng êpul lĭng kahan alŭ wăl mtlaih êngiê alŭ wăl. Klei gĭt gai mơ̆ng Đảng t 3 anôk kñăm jing bruă lĭng kahan - kđi čar - čung ba mnuih ƀuôn sang snăn mtlaih êngiê leh kwar Dhŭng, hluh lir lăn čar”./.