Hlăm boh sang kyâo mrâo lŏ mkra, H’Náp Niê, djuê ana Êđê, ti ƀuôn Kplang, să TânTiến, kdriêk Krông Pač, čar Dak Lak, hơ̆k mơak: jih jang gŏ sang êbeh 20 čô mâo 3 gưl, 4 gŏ sang điêt, mbĕ đuĕ leh ti anôk dôk mrâo. Gŏ sang ñu mâo giăm 2000m2 lăn sang dôk leh anăn war sang hlăm hdră kčah mkra êlan dơ̆ng êran pral. Tal êlâo, grăp čô mnuih ăt bi mĭn mơh kyua hnơ̆ng tla hnô, đru ƀiă mkă hŏng   hnơ̆ng čhĭ mnia. Ƀiădah ƀuh knuă druh mơ̆ng kdriêk truh ti să, alŭ gĭr hâo hưn mtô mblang, H’Nap Niê ăt thâo săng hnơ̆ng yuôm bhăn mơ̆ng êlan dơ̆ng êran pral hŏng klei đĭ kyar alŭ wăl, ƀuôn sang.

 “Mnuih ƀuôn sang pô snăn amâo thâo săng lu ôh kơ êlan dơ̆ng êran pral, ƀiădah phung knuă druh hriê mtrŭt mjhar, hâo hưn hŏng jih ai tiê, mnuih ƀuôn sang nao ii, ƀuh djŏ snăn mơak mbĕ đuĕ yơh. Mâo đa đa anôk mnuih ƀuôn sang luč liê ƀiă, ƀiădah kyua bruă mbĭt ăt mơak bi đru mơh. Gŏ sang hriê dôk tinei, phung anak čô ăt ƀrư̆ hơĭtt klei hdĭp mda leh mơh.”

Ƀuôn Kplang jing anôk dôk sui mơ̆ng mnuih ƀuôn sang Êđê. H’Biơi Ƀuôn Yă, Khua dlăng bruă Đảng ƀuôn Kplang, să Tân Tiến, kdriêk Krông Pač brei thâo, hdră bruă êlan dơ̆ng êran pral Khánh Hòa -Ƀuôn Ama Thuôt găn ti krah ƀuôn, hmăo kơ mkrah wah ênoh gŏ êsei mnuih ƀuôn sang. Lu boh sang kjăp, lu đang pla mjing mâo ênoh yuôm mbĕ đuĕ čiăng hli lăn mkra êlan. Tal êlâo, bruă hâo hưn, mtô mblang kơ mnuih ƀuôn sang tŭ ư kơ ênoh tla ruh mgaih anôk ala jing dleh dlan. Khădah snăn, klei dleh dlan anăn ƀrư̆ dưi ruh mgaih tơdah phung knuă druh kdriê mbĭt hŏng phung knuă druh să, alŭ, huă mbĭt, dôk mbĭt, hâo hưn mtô mblang, kah mbha kơ mnuih ƀuôn sang. H’Biơi Ƀuôn Yă brei thâo.

 “Yang hruê snăn mnuih ƀuôn sang nao mă bruă, knŏng mmăt kơh dôk ti sang. Phung knuă druh, khua gĭt gai kdriêk grăp hruê mlan hriê hŏng mnuih ƀuôn sang, blŭ wăt klei Êđê pô. Pô hmư̆ kklei mtrŭt mjhar, mtô mblang djŏ ai tiê, djŏ knga mta mơh, hĭn mơh mnuih ƀuôn sang. Kyua anăn mnuih ƀuôn sang pô ư ai sơăi, mơak myơr lăn mkra êlan dơ̆ng êran pral.”

 Trịnh Minh Tâm, Khua dlăng bruă Đảng hlŏng ngă Khua knơ̆ng bruă sang čư̆ êa să Tân Tiến, kdriêk Krông Pač, čar Dak Lak brei thâo, kluôm să mâo 241 gŏ êsei mnuih ƀuôn sang hmăi djŏ tơdah pŏk ngă hdră bruă êlan dơ̆ng êran pral Khánh Hòa - Ƀuôn Ama Thuôt. Anei jing hdră bruă mâo hnơ̆ng prŏng, hmăi kơ lu gŏ sang hĭn, ƀiădah lŏ mâo klei ư ai lu hĭn lehh anăn ruh mgaih anôk ala pral hĭn.

 “Hŏng să, jih bruă kđi čar ngă bruă hâo hưn mtô mblang kơ dŭm gŏ êsei mnuih ƀuôn sang čiăng kơ diñu thâo kơ hdră êlan. Knuă druh nao bi kƀĭn hŏng mnuih ƀuôn sang, hâo hưn mtrŭt mjhar mnuih ƀuôn sang čiăng hnưm ba jao anôk ala.  Truh wưng anei 241 gŏ êsei mnuih ƀuôn sang jao leh anôk ala kơ anôk bruă rŭ mdơ̆ng.”

Ti “anôk phŭn pla durian” ti Dak Lak, anôk “lăn yuôm, lăn mah” msĕ si kdriêk Krông Pač, bruă ruh mgaih anôk ala hlue ngă dŭm hdră bruă jing sa bruă dleh snăk. Si ngă čiăng dưi mâo klei mnuih ƀuôn sang tŭ ư, Trần Hồng Tiến, Khua dlăng bruă Đảng kdriêk Krông Pač, brei thâo, anăn jing klei gĭr, jhŏng mĭn, jhŏng ngă leh anăn jhŏng đua klam mơ̆ng êpul knuă druh.

 “Klei dleh dlan hĭn tinei jing mjing klei sa ai hlăm mnuih ƀuôn sang, si ngă čiăng ruh mgaih anôk ala. Krông Pač hmăi prŏng snăk hŏng êbeh 300ha lăn, lu jing lăn lŏ hma mâo ênoh yuôm. Mâo ana durian thŭn tal 5-6 jing sa thŭn dưi mâo 30-40 êklăk prăk. Ƀiădah hlue si ênoh knŭk kna snăn knŏng tla hlăm brô 7 êklăk prăk. Ară anei si ngă čiăng kơ mnuih ƀuôn sang tŭ ư, snăn hmei mkŏ mjing anôk bruă gĭt gai gưl kdriêk, gưl să, mkŏ mjing dŭm êpul hâo hưn, mtô mblang.”

 Giăm mnuih ƀuôn sang, thâo săng mnuih ƀuôn sang leh anăn jhŏng mĭn, jhŏng ngă, jhŏng đua klam jing klei bi êdah klă mngač hlăm phung knuă druh, khua gĭt gai, đảng viên ti kdriêk Krông Pač, čar Dak Lak hlăm bruă pŏk ngă hdră ruh mgaih anôk ala hŏng hdră bruă êlan dơ̆ng êran pral Khánh Hòa - Ƀuôn Ama thuôt. Kyua anăn, hdră bruă mâo leh mnuih ƀuôn sang tŭ ư.  Klei mĭn Đảng djŏ ai tiê mnuih ƀuôn sang, luu mnuih ƀuôn sang kdriêk Krông Pač mơak myơr lăn kơ Knŭk kna mkra êlan dơ̆ng êran pral./.