Jing sa hlăm 4 kdriêk knông lăn čar Kon Tum, leh 9 thŭn mkŏ mjing, Ia H’Drai mâo leh klei bi mlih prŏng hlăm bruă mkra mjing leh anăn hơĭt kjăp klei hdĭp mnuih ƀuôn sang. Tuôm jing krĭng lăn huâng bŏ hŏng gru mơ̆ng klei mblah ngă, ară anei Ia H’Drai liă lia ana sui thŭn, ana boh kroh leh anăn anôk rông mnơ̆ng. Êlan klông ti Ia H’Drai ăt rơ̆ng jăk plah wah dŭm să leh anăn truh ti dŭm kdriêk riêng gah, hlăm dua čar Gia Lai leh anăn Kon Tum, mjing thiăm klei găl kơ bruă mkra mjing ăt msĕ mơh dŭ mdiăng mnơ̆ng lŏ hma. Nao ti Ia H’Drai ngă bruă hŏng dua kngan hŏng, kyua jhŏng hŏng klei kreh kriăng, amai Phan Thị Sương ti alŭ 1, să Ia Tơi brei thâo, ară anei gŏ sang mâo leh đang ana boh kroh hŏng ênhă 6 ha prăk hrui wĭt grăp thŭn dŭm êtuh êklăk prăk:

 “Tal êlâo hriê tinei grăp čô lač pla kphê jing amâo mâo mboh ôh. Tal êlâo pla 500 ana đuč. Pla truh thŭn tal 3 ana kphê ƀuh mtah, siam leh anăn boh lu mơh. Pla ƀrư̆ ƀrư̆ mâo 2.500 phŭn. Tinei guôp hĭn jing anak boh kroh, boh nik boh kneh, durian hŏng boh kruê̆ mmih, kruê̆ dŭng. Truh ară anei snăn pô lač sĭt nao mă bruă ti anôk mkăn amâo hmao ôh tinei. Gŏ sang dôk tinei leh anăn srăng dôk tơl jih klei hdĭp mtam yơh.”

 Wăt tơdah dưi mkŏ mjing ka sui ôh ƀiădah lu bruă mkra mjing kdriêk Ia H’Drai ară anei dôk ba anăp čar Kon Tum. Mbĭt hŏng 25 êbâo ha ksu dôk mă ktăk, kdriêk lŏ mâo mtei ba čhĭ kơ ala tač êngao leh anăn bruă rông kan hnơ̆ng prŏng hĭn ti čar. Tlâo thŭn êgao ênoh gŏ êsei ƀun grăp thŭn ti kdriêk mâo hnơ̆ng kah knar êbeh 19% leh anăn ênoh gŏ êsei ƀun ti kdriêk knŏng adôk ti gŭ 8%. Võ Anh Tuấn, Khua Knơ̆ng bruă sang čư̆ êa kdriêk Ia H’Drai brei thâo, kdriêk dôk mđing kơ hdră kñăm knhal jih thŭn 2025 klă klơ̆ng dưi ngă hdră kñăm kơ krĭng ƀuôn sang mrâo:

 “Kdriêk klă klơ̆ng dưi ngă hnơ̆ng kčah kơ krĭng ƀuôn sang mrâo snăn hlăm dŭm să kdriêk bi mâo să truh hdră kñăm krĭng ƀuôn sang mrâo hnơ̆ng jăk. Ară anei hmei mkŏ mjĭng leh hdră kčah hlăm thŭn 2024 să Ia Tơi srăng truh hdră kñăm krĭng ƀuôn sang mrâo leh anăn să Ia Dom srăng truh hnơ̆ng kčah krĭng ƀuôn sang mrâo hnơ̆ng jăk leh anăn să Ia Đal ăt lŏ dơ̆ng mđĭ kjăp hĭn hnơ̆ng kčah hmei mâo leh. Kơ bruă alŭ wăl truh hdră kñăm krĭng ƀuôn sang mrâo, mnuih ƀuôn sang ti kdriêk mâo klei tŭ ư giăm 100%.

Hlăm dŭm hruê mlan 3 hƀuê ênuk, dua ktuê êlan Duôr čư̆ prŏng găn čar Kon Tum, wăt tơdah dôk hlăm yan không ăt mtah mda ana pla mjing, ana boh kroh. Ti anôk mkŏ Ngŏ - Yŭ Duôr čư̆ prŏng mâo êlan 18A, 18B nao ti čar Attapư, Lào hlăm klei bi blah ară anei jing wăl krah Plei Kần, kdriêk Ngọc Hồi jing sa wăl krah krĭng knông lăn. Ăt mơ̆ng anôk phŭn bi blah ktang anei mơ̆ng kahan êdeh phiơr leh anăn kahan jơ̆ng Mi - Ngụi hlăm klei bi blah ară anei nao thiăm 18km dơ̆ng tĭng nah Yŭ jing truh ti ƀăng jang knông lăn Bờ Y, ƀăng jang mnia blei pŏk ƀăng hŏng dŭm čar Dhŭng Lao, Ngŏ Dưr Campuchia, Thái Lan. Huỳnh Quốc Trung, Khua Anôk bruă kriê dlăng Wăl duh mkra čar Kon Tum, brei thâo anôk bruă dôk jih ai tiê gĭr ngă čiăng kơ bruă mnia blei leh anăn duh mkra knông lăn mơ̆ng čar mđĭ kyar bi knar hŏng klei găl mâo hjăn:

 “Anôk kriê dlăng mđĭ ktang hĭn bruă mkra mlih hră mơar mjing wăl bi liê găl ênưih čiăng mđĭ bruă iêô jak bi liê hlăm bruă mnia blei knông lăn, mnia blei hlăm Wăl duh mkra ƀăng jang knông lăn Bờ Y mơ̆ng dŭm anôk bruă duh mkra hlăm ala čar leh anăn ala tač êngao. Bi hgŭm hŏng dŭm anôk bruă mjing klei găl kơ phung mnia blei leh anăn mnuih ƀuôn sang knông lăn hlăm bruă mnia blei mnơ̆ng dhơ̆ng găn knông lăn hlue si hdră bhiăn. Kčĕ hdră msir iêô jak dŭm anôk bruă mnia blei bi liê kơ anôk bruă nah gŭ hlăm Hdră duh mkra ƀăng jang knông lăn Bờ Y kñăm duh kơ bruă mnia blei mnơ̆ng dhơ̆ng”.

Yap truh jih mlan 2/2024, hlăm 13 să ktuê knông lăn ala čar dlông 292km bi knông hŏng lăn čar Lao leh anăn Campuchia hlăm 4 kdriêk čar Kon Tum mâo 7 să krĭng ƀuôn sang mrâo. Dŭm anôk mngač hlăm klei mđĭ kyar bruă duh mkra- ala ƀuôn ktuê êlan Duôr čư̆ prŏng hlăk đưm găn čar Kon Tum dôk ƀrư̆ hruê lu hĭn leh anăn klei hơ̆k mơak mơ̆ng klei trei mđao, jăk mơak ăt lŏ dơ̆ng mđĭ lar./.