VOV4.Êđê - Klei pah mni bruă klei mrâo ala čar 2021, Êpul hgŭm mkŏ mjing klei bi lông ruah leh 152 klei čih mŭt hlăm tuôr bi lông knhal tuič lehanăn srăng jao 10 klei pah mni mta A, 22 klei pah mni mta B, 48 klei pah mni mta C, 25 klei pah mni mtrŭt mđĭ ai kơ phung mâo boh tŭ êdah êdi. Hluê si klei tĭng dlăng mơ̆ng Êpul hgŭm mkŏ mjing klei bi lông bruă klei mrâo ala čar 2021, klei bi lông tal anei mâo lu klei čih êlam, pral hmao ƀuh, bi êdah klei gĭr jh ai tiê, hŏng klei mĭn mrâo, mâo klei tui ksiêm, bi êdah klei thâo kơ bruă, tluh tlưiñ, ba ai êwa mơ̆ng bruă klei mrâo ênuk mrâo mrang. Dŭm klei čih mâo klei duh lu hruê mmông, jing bruă djŏ tuôm kơ klei ruă Covid 19. Mâo lu klei čih mâo hlăm klei sĭt ti grăp alŭ wăl, ngă kpư̆ mgei ai tiê mnuih, bi êdah klei săn asei mơ̆ng phung mă bruă klei mrâo, mâo ai lar bra hlăm yang ƀuôn.

Hlue si klei ksiêm dlăng, klei čih mơĭt hlăm Klei bi lông ngă djŏ dŭm hnơ̆ng kčah hrŏng ruah mơ̆ng Êpul hgŭm Klei bi lông, lač kluôm leh anăn êlam klei hdĭp kđi čar, bruă duh mkra, dhar kreh, ala ƀuôn, klei êđăp ênang, lĭng kahan, hŏng tač êngao mơ̆ng lăn čar hlăm thŭn 2021. Dŭm klei čih êdah kdlưn mâo klei duh bi liê djŏ tuôm kơ klei ruă Covid-19 mâo hnơ̆ng lu hĭn hlăm jih jang mta klei mrâo. Lu klei bi lông mâo klei pah mni bi êdah klei gĭr ktưn phung čih klei mrâo hŏng hdeă kñăm ba ênoh yuôm klă sĭt leh anăn jăk siam mgei ai tiê lu mnuih.

Klei pah mni tal anei, Sang mđung asăp blŭ Việt Nam kruăk knăl hŏng lu klei bi lông êdeh kdlưn. Hlăm anăn mâo 2 klei pah mni mrô A, 2 klei pah mni B leh anăn sa klei pah mni mrô C. Dua klei pah mni mrô A kơ klei čih “Dŭm hruê amâo wơr” mơ̆ng êpul čih klei mrâo Nguyễn Vũ Duy, Bùi Thị Thu Trang, Nguyễn Thị Minh Hạnh (Anôk čih klei mrâo-VOV1) leh anăn 4 klei čih “Klă sĭt djiêu êlan rông hlei pô”? mơ̆ng êpul čih Trang Công Tiến, Phạm Trung Tuyến, Nguyễn Hữu Thịnh, Chu Trung Đức, Nguyễn Hải Bằng (Hdră mđung VOV kơ êlan klông).  Dua klei čih mâo klei pah mni mrô B jing “Klei bi kdơ̆ng mơ̆ng ya klei ka tuôm mâo” mơ̆ng êpul čih Đinh Thị Thu Trang, Kiều Thanh Phượng, Nguyễn Thị Ánh Tuyết, Lê Phương Thảo, Phạm Thị Thu Trang (Êpul dhar kreh - ala ƀuôn –VOV2) leh anăn “Klei in jin dôk ti tluôn klei duh bi liê ngăn prăk hlăm yan klei ruă tưp” mơ̆ng êpul čih Nguyễn Sỹ Đoan, Nguyễn Phú Huân, Nguyễn Văn Tùng, Nguyễn Duy Bùi (Hdră mđung asăp KTS VTC).

Hlăm anăn, klei čih mâo klei pah mni mrô A “Dŭm hruê amâo wơr” mơ̆ng êpul čih Nguyễn Vũ Duy, Bùi Thị Thu Trang, Nguyễn Thị Minh Hạnh – Êpul čih klei mrâo Sang mđung asăp blŭ Việt Nam lač ktang phĭt mơ̆ng klei mdrơ̆ng hŏng klei ruă Covid-19 ƀiădah dưi bi êdah hlăm sa kdrêč hjăn, mbruă snăk. Anăn jing klei čih bi êdah klei ktang mơ̆ng hdră mđung asăp, ba yua ênai hlăm anôk anôk mâo klei truh, ênhiang mmuiñ, boh klei klui gĭt ktưn mơ̆ng phung čih klei mrâo, amâo uêñ kơ klei dleh dlan nao ti dŭm krĭng mâo klei ruă tưp msĕ si Bạch Mai, ƀuôn prŏng Hồ Chí Minh… Bi ala kơ êpul čih, pô čih klei mrâo Bùi Thị Thu Trang (VOV1) brei thâo: čiăng mâo klei hâo hưn jăk, klă sĭt, mâo lu mnuih khăp hmư̆ hlăm boh klei ruă tưp mâo lu, hmaĭ amâo jăk, jih jang mnuih, klei mâo, klei yăl dliê mơ̆ng giăm 2 thŭn kluôm ala gĭr mdrơ̆ng hŏng klei ruă tưp Covid - 19 (2020-2021), ekip čih leh klei mrâo êdah kdlưn mâo anăn knăl phung čih klei mrâo Sang mđung asăp blŭ ala čar, hŏng klei blŭ, ênai hâo hưn djŏ, jăk leh anăn mrâo mrang, hŏng klei čih mâo lu mnuih khăp, mñă kơ ênuk êdei - sĭt lŏ hmư̆ klei čih anei: “Năng lač, tơdah hlăm boh klei yang đar, bruă ngă ti năn mtam, snăn hŏng klei čih anei, êkip mâo 3 čô, - sa čô jing F0 - ti anôk mâo klei ruă lu hĭn Ƀuôn prŏng Hồ Chí Minh, sa jing pô čih klei mrâo Nguyễn Thị Minh Hạnh, dua čô mkăn jing pô čih klei mrâo Nguyẽn Vũ Duy - Khua Anôk čih klei mrâo -VOV1 leh anăn kâo Bùi Thị Thu Trang, mâo truh 4 blư̆ bi ktlah hjăn hlue si klei kčah mtrŭn, anăn grăp klei bi trông ba yua jih tur knơ̆ng mrô. Dleh dlan - lông dlăng ăt jing klei jăk- năng hdơr mơ̆ng êkip “Dŭm hruê amâo wơr”.

Thŭn 2021, klei ruă Covid-19 bluh mâo kpĭ kơ klei găl ngă bruă, huĭ huưt ƀiădah ăt ba lu klei găl kơ phung čih klei mrâo săn asei hlăm klei dleh dlan hlăm klei hdĭo, hgao klei dleh dlan, huĭ hyưt čiăng mâo ƀô̆ mta ti anôk mâo klei ruă tưp, hrăm mbĭt hŏng êpul knuă druh, aê mdrao, dŭm êpul anôk phŭn mdrơ̆ng hŏng klei rua wtưo. Hlue si Phạm Mạnh Hùng, K’iăng Khua, Khua Dhar bruă Êpul čih klei mrâo Sang mđung asăp blŭ Việt Nam, dŭm klei čih phung čih klei mrâo Sang mđung asăp blŭ Việt Nam mâo klei pah mni Klei mrâo ala čar thŭn 2021 kƀĭn hlăm klei mâo lu mnuih mđing. Anăn jing klei mdrơ̆ng hŏng klei ruă tưp Covid-19, pŏk ngă Hdră mtrŭn Klei bi kƀĭn Đảng čiăng răng mgang tur knơ̆ng klei mĭn mơ̆ng Đảng… Mơ̆ng klei dleh dlan kyua klei ruă tưp ngă kơ êpul čih klei mrâo mơ̆ng sang mđung asăp bi êdah klei knhâo ngă bruă hlămk djăp boh klei, yua klei thâo čih klei mrâo ênuk mrâo mrang mơ̆ng tur knơ̆ng kdrăp mrâo mrang, mâo lu klei mrâo jăk, lač kơ boh sĭt ăt msĕ mơh klei mnuih ƀuôn sang ruă êka, ênguôt hnĭng “Bruă lu klei čih hŏng lu mta dưi mŭt hlăm tuôr knhal tuič bi êdah klei kluôm ênŭm, lu jơr mơ̆ng êpul čih klei mrâo yua lu kdrăp mơ̆ng VOV hlăm jih jang mta klei mrâo. Anei ăt jing klei bi mklă hdră mtrŭn tă hdră mkŏ mjing sa anôk bruă klei mrâo hnơ̆ng ala čar - anôk bruă klei mrâo phŭn mơ̆ng Knŭk kna jing djŏ klă. Lu thŭn êgao drei duh bi liê leh anăn hlăm wưng anei drei mâo klei tŭ klă mngač. Klei tŭ yan bi lông klei mrâo tal anei năng ktưn hưn mơ̆ng êpul čih klei mrâo mơ̆ng VOV”

Săn asei, nao ti anôk dleh dlan, boh nik giăm truh klei djiê, klei čih “Kdriêl bi knông” mơ̆ng êpul čih klei mrâo Tạ Quỳnh Tư, Kiều Viết Phong, Êpul čih klei mrâo Sang mđung rup Việt Nam, mâo klei pah mni A mta phim rup ngă kơ lu phung dlăng lu êa ală hŏng rup klă sĭt. Phung dlăng ƀuh klă klei săn asei jih ai tiê mơ̆ng phung aê mdrao hlăm klei mdrơ̆ng hŏng klei ruă tưp, hlăm anăn mâo klei săn asei phung čih klei mrâo ngă phim anei. Pô čih klei mrâo Tạ Quỳnh Tư - Sang mđung rup Việt Nam, bi ala êpul čih brei thâo: “Klei pha mni ngă kơ kâo hdơr kơ phung djŏ Covid-19, boh nik phung aê mdrao hlăm klei dleh dlan anei, diñu brei kơ kâo klei hriăm kơ klei hdĭp, klei mpŭ kơ klei hdĭp leh anăn hdĭp kơ êpul êya. Mơ̆ng leh kâo hlue bruă čih klei mrâo leh anăn mphŭn ngă phim snăn kâo bi mĭn, bruă ngă djŏ jing ba klei mơak, bruă ngă soh jing ba klei amâo jăk anăn kâo amâo huĭ ôh săn asei hlăm akŏ kâo mĭn srăng bi êrâo hlăm lam ai tiê anak mnuih Việt Nam drei”.

Hlue si pô čih klei mrâo Nguyễn Đức Lợi, K’iăng Khua Êpul hgŭm čih klei mrâo Việt Nam, hlăm 2 thŭn 2020-2021, ti anăp klei dleh ktuê dlăng mơ̆ng klei ruă Covid-19, lu phung čih klei mrâo mơ̆ng dŭm anôk bruă klei mrâo săn asei hlăm anôk huĭ hyưt, boh nik jĕ giăm hŏng klei djiê. Kyua klei jhŏng, jhŏng mĭn, jhŏng ngă phung čih klei mrâo ba leh lu klei dưi msir mgaih, mâo anôk bruă djŏ tuôm ngă bruă. Anăn jing knuih jăk siam phung čih klei mrâo brei mđĭ lar ktang: “Dŭm akŏ mâo klei huĭ hyưt, wăl hlăm hdră gang mkhư̆ klei ruă tưp snăn brei drei mâo klei săn asei snăn. Ƀiădah wăt hlăm klei mdrơ̆ng hŏng bruă ƀơ̆ng ngăn, bi kdơ̆ng hŏng klei amâo jăk snăn dưi lač mâo lu klei jhat, klei arưp aram, boh nik mâo klei arưp kơ klei hdĭp phung čih klei mrâo leh anăn gŏ sang digơ̆. Hmei mĭn phung čih klei mrâo brei mprăp klei thâo êlâo kơ klei mprăp klei thâo hdră bhiăn. Khădah phung čih klei mrâo amâo săn asei, amâo jhŏng ngă boh sĭt klei mâo, boh nik hlăm klei ƀơ̆ng ngăn snăn drei amâo dưi mâo ôh klei čih jăk leh anăn ăt mâo klei čih mâo lu mnuih khăp dlăng”.

Čiăng dưi săn asei, phung čih klei mrâo mâo nanao sa ai tiê khăp hŏng bruă, ai tiê bi êdah kơ diñu hdră čiăng ngă bi jih klei mâo, đru kơ ala ƀuôn jăk siam hĭn djŏ si ai tiê phung čih klei mrâo cách mạng - anăn jing “Mă klei jăk lăm lui klei jhat”./.