VOV4.Êđê- Aguah mbrue (11/5), ti Hà Nội, mkŏ mjing leh klei trông čhai “Kơ êlan mạng lehanăn bruă răng mgang kdriêl dhar kreh klei mĭn kơ phung hđeh”. Klei trông čhai mâo mkŏ online truh 63 anôk bruă êdam êra čar, ƀuôn prŏng hlăm kluôm ala. Ti anôk trông čhai phung bi ala mđing kơ dŭm klei hmăi amâo mâo mơ̆ng internet, lehanăn dŭm mta klei hluh lăn čar hlăm bruă răng mgang kdriêl klei mĭn dhar kreh hŏng phung hđeh ênuk ară anei. Blŭ hrăm ti anôk trông čhai, Khua kiă kriê bruă hâo hưn gưl dlông Nguyễn Trọng Nghiã mtă kơ dŭm anôk bruă êdam êra bi thâo dưn yua êlan internet hŏng klei jăk, êjai hlăm ênuk bi mlih mrô, kñăm mđĭ hĭn klei thâo săng kơ bruă hmăi amâo mâo jăk mơ̆ng internet, hlăm dŭm bruă ngă hluh lăn čar hŏng bruă kñăm thâo răng kơ kdriêl dhar kreh klei mĭn hlăm ênuk ară anei.

Blŭ hrăm ti anôk trông čhai kơ dŭm gưl hđeh mrâo bi păn kjăp knhuah gru dhar kreh mâo leh mơ̆ng đưm, klei tŭ dưn dhar kreh yuôm bhăn pô bi năng djŏ hŏng bruă mđĭ kyar lăn čar. Jih jang êpul bruă êdam êra mâo bruă klam bi ksiêm duah, mkŏ mjing djăp hdră êlan đru kơ hđeh êdam êra rŭ mjing bruă knuă hŏng klei mĭn knhăk djŏ hŏng dhar kreh, mkŏ mjing klei duh bi liê, bi đru mkŏ mjing dŭm klei bi lông, mkŏ mjing hdră mđĭ kyar dhar kreh, dŭm klei mĭn jăk mâo klei tŭ dưn, mâo klei lar bra hlăm phung hđeh êlăk./.

Pô mblang: Y-Khem Niê